HEBREOS 11 - Qullan Arunaka DC

IV. IYAWSAÑAMPI, CH'AMAN SAYT'AÑAMPI(11.1—12.13)Nayra awkinakan iyawsäwipa

1Iyawsañax taqi chuymampi katuqañ suyktan ukawa; jan uñjkasin taqi chuymampi iyawsktan ukawa.

2Nayra awkinakasax iyawsañanïpxatap laykuw askit uñt'atänxa.

3Jiwasanakax iyawsäwi laykuw yattan, Diosan arupampik alaxpachampi, akapachampi luratapa, kuntix jichhax uñjktan ukax jan uñjkayat luratänwa.

4Abel chachax iyawsäwi laykuw Caín jilapat sipan Diosarux suma waxt'äwi luqtäna, ukat Diosax juparux askit uñt'äna, waxt'äwinakapsti katuqarakïnwa. Ukhamasti Abel chachax jiwatäkchisa, iyawsañap tuqix parlaskakiwa.

5Henoc chachax iyawsäwi laykuw janïr jiwkas alaxpachar aptatäxäna, ukatsti juparux janiw khitis uñjkxänti, Diosaw juparux apasiwayxatayna. Qillqatasti siwa: “Janïr aptatäkasax Henoc chachax Diosaruw kusisiyatayna” sasa.

6Jan iyawsañampix janiw Diosarux kusisiyksnati, Diosar jak'achasiñatakix maynix Diosan utjatap iyawsañapawa, jupar thaqhirinakar askinak waxt'irïtap iyawsañaparakiwa.

7Noé chachax iyawsäwi laykuw Diosar jaysäna, ukatsti mä barca luräna, utapankirinakar qhispiyañataki, kunapachatix Diosax jan uñjatäkänsa ukanakan lurasiñap yatiykän ukkhaxa. Noé chachax uka pachpa iyawsañampiw akapachankir jaqirux juchañchäna, ukham iyawsatap laykuw askit katuqatäna.

8Abrahamax iyawsäwi laykuw Diosan jawsatap jaysäna, ukatsti kawkharutix Diosax churämaw siskän uka chiqar sarañatakiw mistuwayäna. Uraqipat mistusax janiw kawkir saratapsa yatiskänti,

9iyawsañap utjatap laykuw yaqha markankir jaqjam jakasïna, Diosax kawkïr uraqtix jupar churañatak arskän uka uraqina. Jupax chhujllu utanakan jakasïna, ukhamarak Isaac, Jacob chachanakasa, jupanakasti, Diosax jupanakar churañatak arskäna uka uraq katuqapxarakïna.

10Abrahamax uka suma utt'ayat marka suyt'askäna, Diosan lurt'at marka.

11Sara warmix iyawsäwi laykuw jan wawachasirïkasina, Abrahamas wali chuymanïkasin wawanïñatak ch'am katuqäna; wawachasiñapatak Diosax arskatayna ukan arupar iyawsatap layku.

12Ukhamasti Abrahamax niy ch'ama qaritäxasinsa, alaxpachankir warawaranakjama, quta thiya ch'alljam jan jakt'kay wawanakaniw tukuwayi.

13Taqi uka jaqinakax kuntix Diosax churañatak arsuwaykän uk jan katuqasaw jiwarapxäna; ukampis iyawsañanïpxatap laykux jayatak uñtapxäna, aruntapxarakïna, ukhamat akapachan mä juk'a pacha sarir jaqinakäpxatap yatisipxäna.

14Khitinakatix ukham arsupki ukanakaxa, mä marka thaqhasipkatap amuyayistu.

15Jupanakatix kawkha uraqittix mistunipki ukat lup'isipkasapän ukkhaxa, pachpa uraqiparuw kutt'apxasapäna,

16ukampis jupanakax mä suma marka munapxäna, ukasti alaxpach markawa. Ukat Diosax jupanakan Diosap satäñxa jan p'inqaskiti, jupanakatakisti mä markaw wakichatäski.

17Abrahamax iyawsäwi laykurakiw kunapachatix Diosax yant'kän ukapachax Isaac wawap wilañcha luqtañatak irpäna. Jupax uka mä sapa wawap luqtañatak jank'akïnwa, Diosax jupar akham arsuwaykchïn ukasa:

18“Isaac wawam tuqiw jumax wawanakanïyäta” sasa.

19Abrahamasti Diosarux jiwatanak jaktayañatak ch'amanïtap uñt'äna; ukatarak Abrahamax wawaparux jiwatanak taypitsa kutsuyaskaspa ukham wasitat katuqxäna.

20Isaacax iyawsäwi laykuw Jacobumpiru, Esaumpiru qhipa urunakan walja askinak churañatak arsuwayäna.

21Jacobux iyawsäwi laykuw niya jiwañampïkasin Josean sapa mayni wawanakapar walja askinak churañatak arsüna, ukatsti Diosarux thujrupat thujrt'asisaw yupaychäna.

22Joseax iyawsäwi laykuw jiwañampïkasas säna: “Israelitanakax akat qhiparux Egipto markat mistxapxaniwa” sasa, ukatsti kuntix ch'akhanakapampi lurapxañapäkän uksa arsuwayarakïna.

23Moisesax yurkän ukkhax iyawsäwi laykuw awkipa taykapax kimsa phaxsi imantäna; jupanakax wawan wali jiwakïtap uñjapxäna, ukatsti janiw reyin “jiwayapxam” sat arsutaparus axsarapkänti.

24Moisesax iyawsäwi laykuw chacha wakt'ankxasax faraonan phuchhapan yuqapawa sas jan sayasiñ munkänti;

25jan ukasti Diosan markapamp chika uñisitäñ munäna, mä juk'a urunak juchan kusist'añanakat sipansa.

26Jupax Cristo layku t'aqhisiñan askïtap amuyäna, Egipto markan qamir yänakat sipansa; Diosan jupar churañapäkän uk suyt'askäna.

27Iyawsäwi laykurakiw Moisesax Egipto markat sarxäna, reyin thithitapar jan axsarasa; kuntix amtkän uksti amtapunïnwa, jan uñjkay Diosarus uñjkaspa ukhama.

28Moisesax iyawsäwi laykuw Pascua uruyäna, ukatsti wilampiw uta punkunakar ch'axch'ukipayäna, ukhamat jiwayir angelax israelitanakan tayna wawanakapar jan jiwarayañapataki.

29Israelitanakax iyawsäwi laykuw Mar Rojo sat qutxa wañanjam makhatapxäna; ukatsti, kunapachatix egipcionakax ukham makhatañ munapkarakïn ukkhaxa, umampi axskatasaw jiwarapxäna.

30Jericó markan jach'a pirqanakapas iyawsäwi laykuw allitattäna, israelitanakax paqallq uru muytapkän uka qhipata.

31Rahab sat jan wal sarnaqir warmix iyawsäwi laykuw jan ist'asir jaqinakamp chikax jan jiwkataynati, Israelankir uñaqa jaqinakar suma chuymampi katuqatap layku.

32¿Kunat juk'ampirak arsüsti? Gedeón, Barac, Sansón, Jefté, David, Samuel taqi jupanakat arsuñ janiw tukuykiristti, ukhamarak profetanakatsa.

33Iyawsäwi laykuw yaqha markanakarus atipapxäna, chiqaparuw apnaqapxarakïna, kuntix Diosax arskatayna uk katuqapxäna. Leonanakan lakanakapsa jist'antapxarakïnwa,

34jan jiwarkay ninsa jiwarayapxänwa, espadampi jiwayatäñatsa jaltapxarakïnwa, jan ch'amanïkasas ch'am apsusaw nuwasiñatakix sayt'asipxäna, uñisirinakapan ejercitopar atipjasa.

35Warminakasti jiwirinakapar jakaskir katuqasxapxäna.

Yaqhipanakax t'aqhisiñ taypin jiwarapxäna, qhispiyatäñ jan jaysasina, ukhamat mä suma jakañar jakatatañataki.

36Yaqhipanakasti sawkch'ukita, jawq'jata, cadenanakampi ñach'antata, carcelanakar jist'antataw t'aqhisipxäna.

37Yaqhipanakax qalamp k'upjataw jiwapxäna, payar khuchjata, jan ukax espadampi jiwarayata; ovejan lip'ichipampi, cabriton lip'ichipampi uskuntataw uksar aksar sarnaqapxäna; jan kunani, llakt'ata, chhuxriñchjataraki.

38Akapachax janiw jupanakatakix askïkänti; wasaranakana, qullunakana, putunakana, uraq p'iyanakan khuy aka sarnaqapxäna.

39Taqi jupanakasti suma iyawsañanïpkchïn ukasa, janiw maynis kuntix Diosax churañatak arskatayna uk katuqapkänti.

40Diosasti jiwasanakat amtasisax juk'ampi sumanak wakichatayna, ukhamat jupanakan jiwasanakamp chikachasisin q'umachatäpxañapataki.