ÉXODO 36 - Qullan Arunaka DC

1Ukhamasti, Besalel, Oholiab chachanakaru, taqi suma amuyt'an chachanakaruw Tatitux kunayman lurañ yatiñanaka, amuyunak churi, Tatitump Jikisiñ Qullan chiqawjataki kunanakatix munaski ukanak lurapxañapataki, kunjämtix Tatitux siskäna ukhamarjama.”

Jaqinakax walja churäwinak apanipxi

2Moisesasti Besalel, Oholiab chachanakaruw jawsäna, ukhamarak suma amuyumpi kunanaksa lurir chachanakaru; jupanakaruw Tatitux luräwinak lurañatak churatayna, yatiñ kankaña, suma chuyma, jupanakax chuymapatjam jutapxarakïna uka luräwinakan yanapasiñataki.

3Moisesasti israelitanakax apanipkatayna uka churäwinak jupanakar katuyäna, kunanakatix Tatitump Jikisiñ Carpa lurañatakix wakiski ukanak lurañ qalltañataki.

Sapüruw israelitanakax chuymapatjam churäwinak apasinipkakïna.

4Ukat khitinakatix qullan chiqawjatak wakiski ukanak lurasipkän ukanakasti, lurañanakap apanukusaw Moisesan ukar sarapxäna,

5juparusti sapxänwa: “Tatitun mayitaparjamax, jaqinakax kunanakatix lurañatak wakiski, ukat juk'amp walja apanxapxi” sasa.

6Ukat Moisesax campamentonkirinakar yatiyañatak khithäna akham sasa: “Jan khiti chachasa, warmisa Tatitump Jikisiñ Carpa lurañatak churäwinak apankxpati” sasa. Ukatsti jaqinakax janiw churäwinak apankxapxänti,

7apanipkän uka churäwinakax waljapuniw jilt'äna, taqi yänak lurañatak wakiskän ukanakatxa.

Tatitumpi Jikisiñ Carpa lurapxi(Ex 26.1-37)

8Khitinakatix mayninakat sipan juk'amp suma lurañanak yatipkäna ukanakax Tatitump Jikisiñ Carpa lurapxäna. Uka Carpsti lino k'anthitamp lurat tunka cortinanakampiw lurapxäna, morado telata, wila morado telata, wila telata, ukanakxarusti pä chhiqhaninak wali suma p'itakipapxäna.

9Sapa cortinasti pachpa tupunikïnwa: sayt'urux tunka payan metro chikatani, iranarusti pä metroni.

10Ukatsti phisqa cortinanak mayarukiw ch'ukthapipxäna, mayat mayxaru, chikat phisqa cortinsa uka pachparak ch'ukthapipxäna.

11Ukatsti morado ch'ankhat ojalanak uchapxäna phisqa cortinanak ch'ukthapitäki uka thiyanakaru, ukhamarak chikat phisqa cortinanakan thiyaparusa.

12Ukatxa nayrïr phisqa ch'ukthapit cortinanakaru, chikat yaqha phisqa ch'ukthapit cortinanakarusa, phisqa tunka ojalanak uchapxäna, ukhamat sapa maya ojalan purap uñthapisitäñapataki.

13Ukxarusti phisqa tunka t'iriñanak qurit lurapxäna, cortinanak mayat mayampi t'irthapiñataki, ukhamat qullan chiqawjax taqpach mayaki sayt'ayatäna.

14Besalel chachasti tunka mayan cortinanak cabra t'awrat lurarakïna, uka carpa patxata qullan chiqawja imxatañataki.

15Sapa cortinasti sayt'urux tunka kimsan metro chikatanïnwa, iranarusti pä metroniraki. Taqpach cortinanakax mä tupunikïnwa.

16Phisqa cortinanak mayarukiw ch'ukthapïna, ukhamarak suxta cortinäki uksa.

17Ukxarusti nayrïr phisqa ch'ukthapit cortinanakax janthaptki uka thiyaparusti, phisqa tunka ojal p'iyanak luräna, chikat suxta ch'ukthapit cortinanakan thiyaparux phisqa tunka ojal ucharakïna.

18Ukxarusti, thiyanakat t'irthapiñatakix phisqa tunka t'iriñanak broncet luräna, ukhamat uka carpan mayakïñapataki.

19Uka carpxar utachxatañatakisti Besalel chachax wilar samichata oveja lip'ichinakat mä imxatañ luräna, ukat uka patxar utachxatañatakisti suma lip'ichinakat imxatañ lurarakïna.

20Ukxarusti qullan chiqawjatakix, acacia lawat tablanak luräna, ukanaksti chiqak sayarayäna.

21Sapa tablasti sayt'urux pusi metro chikatanïnwa, iranarusti suxta tunka phisqan centimetronïnwa,

22ukasti pä achuntañanïnwa, ukhamat mayat maya suma lip'thapiñapataki. Ukhamkamak qullan chiqawjatak taqpach tablanak luräna.

23Aynach tuqitakix pä tunka tablanak luräna,

24ukatsti qullqit lurat pusi tunka takxäsirinak aynach tuqipar uchäna. Sapa tabla aynach manqhirusti pä takxäsirinïnwa, paypach achuntiripataki.

25Qullan chiqawja amsta tuqitakisti pä tunka tablanak lurarakïna,

26qullqit lurat pusi tunka takxäsirinakapampi, sapa tablanakan pä takxäsirinak utjañapataki.

27Ukxarusti qullan chiqawja qhipäxa, inti jalanta tuqitakisti suxta tablanak luräna,

28qhipäx esquinanakatakisti pä tablanak lurarakïna.

29Uka tablanakasti ukham purakïnwa, aynachat amstakama, lip'thapitänwa. Ukham luräna paypach tablanakxa, paypach esquinataki.

30Ukhamasti kimsaqallqu tablanakaw utjäna, qullqit lurat tunka suxtan takxäsirinakapampi, sapa tablan kayupansti pä takxäsirinakaw utjäna.

31Besalel chachax phisqa muruq'u lawanak acacia lawat lurarakïna, Tatitump Jikisiñ Carpa maysäxankir tablanakar ayxatañataki,

32carpa khursäxa tablanakar ayxatañatakisti, phisqa muruq'u lawanak luräna, ukatsti yaqha phisqa muruq'u lawanakxa qhipäxa inti jalanta tuqitakiw lurarakïna.

33Tablanak chikachika taypi sarakipki uka jach'a muruq'u lawsti, mä thiyat maysa thiyakam mistkir luräna.

34Ukxarusti qurimpiw tablanakarux lip'suyäna, ukatsti quri argollanak lurarakïna, ukanjam jach'a muruq'u lawanakax mistuñapataki.

35Ukxarusti morado telat cortina luräna, wila morado telata, wila telata, lino k'anthitampita, uka cortinxarusti pä querubín sat chhiqhaninakar uñtatanak wali sum p'itakiparakïna.

36Ukatsti, quri t'iriñanakampiw uka cortinxa acacia lawat lurat pusi sayirinakar warkkatäna, uka sayirinakasti qurimpi lip'suyatkamakïnwa, qullqit lurat pusi takxäsirinakxana.

37Tatitumpi Jikisiñ Carpar mantañ punkutakisti mä cortina luräna, wila morado telata, wila telata, lino k'anthitampita, ukasti wali suma p'itakipatänwa.

38Ukxarusti phisqa sayirinak lurarakïna t'iriñanakapampi, broncet lurat takxäsirinakapamppacha, ukatsti qurimpiw sayirinakapa, anillonakapsa lip'ikipayäna.