APOCALIPSIS 2 - Qullan Arunaka DC

Éfeso iglesiatak yatiyäwi

1“Éfeso iglesiankir angelar qillqasin apayam: ‘Kupi amparapar paqallqu warawar apt'atäki, paqallqu quri candeleronak taypin sarnaqki ukax akham siwa:

2Nayax taqi luratanakam yatta; ch'ama tukutamsa, llamp'u chuymanïtamsa yattwa. Ñanqha lurir jaqinakar jan uñkatañ munatamsa yatiraktwa. Jan apostolükasin ‘Tatitun apostolupäpxtwa’ siri jaqinakar yant'atam yatiraktwa, ukham yant'asin uka jaqinakan k'arisipxatanakap katjaraktawa.

3Jumax llamp'u chuyma kankañanïtawa, sutix laykusti jan qarjasisaw wal t'aqhisiraktaxa.

4Ukampis jumatak arsuñaxaw utjitu: qalltan utjkäyätamsa uka munasiñamax janiw utjkxtamti.

5Amuythapisim, nayra pachan kunjämäyätas ukat amtasim, ukatsti Tatitur kutikipstam. Jan wali luräwinak apanukum, kunjämtix qalltan sarnaqkäyätas ukham sarnaqam. Janitix ukham lurkätaxa, nayax jumar mutuyiriw jutä, ukatsti candeleromxa uchañapat apaqarakï.

6Ukampis aski luratamax utjaskiwa, uka nicolaíta sat jaqinakan luratanakap jumax uñisisktawa, nayax jupanakar uñisiraktwa.

7¡Khititix jinchunïki ukax, ist'pan kuntix Tatitun Ajayupax iglesianakar siski uka! Jan walt'añanakar atipjirirusti, Diosan suma markapan utjki uka jakañ churir quqan achupat manq'ayä’ sasa.

Esmirna iglesiatak yatiyäwi

8“Esmirna iglesiankir angelarux qillqarakim: ‘Khititix nayrïrïki, qhipïrïki, jiwasin jaktirïki ukax akham siwa:

9Nayax taqi luräwinakam yatta, t'aqhisitamsa, pist'añan sarnaqatamsa yatiraktwa, ukampis ajay tuqin qamirïtawa. ‘Judiöpxtwa’ siri jaqinakan jumxat jan wali parlatanakap yatiraktwa, ukampis chiqpachan jupanakax supayan tamapankasipkiwa.

10Kuna t'aqhisiñanakatix jumxar jutkani ukanakat jan axsaramti, supayax jumanakat yaqhipanakarux carcelaruw jist'antayani, taqpach jumanakan yant'atäpxañamataki; tunka ururakiw t'aqhisipxäta. Ukampis jiwañkam sayt'asim, nayasti wiñay jakañ churäma.

11¡Khititix jinchunïki ukax, ist'pan kuntix Tatitun Ajayupax iglesianakar siski uka! Jan walt'añanakar atipjiristi, janiw payïri jiwäkis ukan, kuna t'aqhisiñsa katuqkaniti’ sasa.

Pérgamo iglesiatak yatiyäwi

12“Pérgamo iglesiankir angelarux qillqarakim: ‘Khititix purapar arini espada ayt'atäki ukax akham siwa:

13Nayax taqi luratanakam yatta, kawkhantix supayax reyi qunuñanïki uka markan jakatamsa yatiraktwa, ukampis taqi chuymampiw sutix katxäsisktaxa, nayar iyawsatam janipuniw jaytanukktati. Uka markan Antipas sat aski arsurixar jiwayapxi, ukham jiwayapkipansa, janiw ukapachas nayar iyawsañam apanukktati.

14Ukampisa, jumatak arsuñaxaw utjitu: Balaam sat jaqin yatichäwinakap jan apanukuñ munirinakaw ukan utjaski, jumasti janiw kamsktasa. Uka Balaam jaqix Balac chacharuw amtayäna israelita jaqinakar juchar puriyañataki, idolonakar luqtatäkis ukanak manq'ayasa, uka idolonak nayraqatan wachuqa jucha lurayasa.

15Janirakiw jumax nicolaitanakan yatichäwinakap arkirinakarux kamsktasa.

16Ukhamasti, Diosar kutikipstam, jan ukasti, nayax mäkiw juman ukar jutä, ukatsti jupanakampix lakaxat mistki uka espadampiw nuwasï.

17¡Khititix jinchunïki ukax, ist'pan kuntix Tatitun Ajayupax iglesianakar siski uka! Jan walt'añanakar atipjirinakarusti, maná sat imantat t'ant'at manq'ayä; ukatsti mä janq'u qala churarakï, uka qalansti mä machaq sutiw qillqt'ata, uka sutsti janiw khitis yatkiti, uka qala katuqirikiw yati.’ sasa.

Tiatira iglesiatak yatiyäwi

18“Tiatira iglesiankir angelarux qillqarakim akham sasa: ‘Diosan Yuqapax, khititix nina lawranakjam nayranïki, kayunakapas suma lliphipkir broncer uñtatäki ukax akham siwa:

19Nayax taqi luratanakam sum yatta; munasiñamsa, iyawsañamsa, yaqhanakar luqtatamsa, llamp'u chuymanïtamsa sum yatta, jichhax qalltat sipan juk'amp jupanakar yanapaskatamsa yatiraktwa.

20Ukampis jumatak arsuñaxaw utjitu. Jumax uka Jezabel warmirux janiw kamsktasa. Uka warmix ‘Diosaw khithanitu’ sasaw sarnaqi, yatichäwipampix luqtirinakaxaruw pantjayaski, wachuqa juchan jakayasa, idolonakar luqtatäkis ukanak manq'ayasa.

21Nayax uka warmin kutikipstañap suyta; jupasti janiw jaysaskiti, janirakiw k'ari diosanakar iyawsañap apanukuñ munkiti.

22-23Jichhasti, uka warmirux usuntayäwa, ikiñar jaqt'añkama, ukatsti jupan yatichäwinakapar jaysirinakampi, k'ari diosanakar iyawsirinakampix jiwarasipkpan. Ukampis jupanakatix kutikipstapxani, ukatsti nayar jaysapxarakitani ukaxa, janiw kuna jan walsa lurkäti. Ukhamat taqpach iglesianakax yatipxani, jaqin amuyupsa, chuymapsa nayan uñt'irïtaxa; jumanakarusti luräwinakamatjam sapaqat maynirus mutuyä.

24Ukampis jumanakat khitinakatix Tiatira iglesian uka yatichäwinakar jan arkapkta, janirak kuntix jupanakax ‘supayan imantat yatichäwipa’ sapki, ukanaksa uñt'apkta, jumanakaruw sapxsma, janiw kunampsa mayipkämati.

25Ukampis katxäsipxam kuntix yatipkta ukxa, nayan jutañaxkama.

26Khitinakatix jan walt'añanakar atipjkani, ukatsti kuntix nayax munkta ukhamarjam tukuykam lurarakini ukarux, nayaw markanak apnaqañapatak ch'aman kankañ churä,

27-28kamisatix Awkixax nayar munañanïñ kankañ churkitu ukhama; markanakarusti hierro thujrumpiw apnaqapxani, ñiq'i phukhunakarjamaw t'unthapipxani. Jupanakarusti qhantati warawara churarakï.

29¡Khititix jinchunïki ukax, ist'pan kuntix Tatitun Ajayupax iglesianakar siski uka!’ sasa.