SALMOS 21 - Qullan Arunaka DC

SALMO 21Atipjäwi q'uchu 1 Q'uchurinakan yatichiripa, Davidan q'uchupa.

1 1 (2) Tatay,

reyix ch'am churatamat walpun kusisi;

¡atipjayatamat wal kusisiraki!

2 2 (3) Munataparjamaw phuqtaxa;

mayisitanakaparuw ist'araktaxa.

3 3 (4) Jach'a askinak churasaw jupar katuqtaxa,

p'iqiparusti quri pillumpiw asxattaxa.

4 4 (5) Jupax jakañ mayisïyätam, jumasti churtawa:

walja maranak jakañampi, jan tukusir jakañampi churtaxa.

5 5 (6) Yanapt'am laykuw jupax ch'aman uñjasi;

aytat jaqiruw tukuytaxa,

aski jaqiruw tukuytaxa.

6 6 (7) Jan tukuskir askinak jupar churtaxa;

jupamp chik sarnaqatam laykuw kusisiytaxa.

7 7 (8) Jumasti rey, janipuniw tinkkätati,

Tatitur taqpach chuymamp katuyasitam layku;

¡Taqi ch'aman Tatituruw katuyastaxa!

8 8 (9) Ch'iqa amparamax taqpach timanakamaruw katuntani;

kupi amparamasti uñisirinakamaruw katjarakini;

9 9 (10) taripañatak uñstkät ukapachaxa,

parintat hornorjamaw jaquntäta.

Tatitux q'apisiñapampiw ninampi nakhantayani.

10 10 (11) Jumaw akapachat wawanakapar chhaqtayäta.

Jumaw aka uraqit allchhinakapar chhaqtayäta.

11 11 (12) Ñanqha lurañsa munapkchïtam,

jan walinak lurañsa amtapkchïtam,

janiw kamachapkätamsa,

12 12 (13) kunapachatix jalxatkäta ukkhasti,

taqi tuqiruw jaltxapxani.

13 13 (14) ¡Tatay,

ch'amamampiy sayt'asim!

¡Nanakasti q'uchunakampiw atipjäwimat kusisipxä!