JEREMÍAS 41 - Qullan Arunaka DC

Guedaliasar jiwayapxatapa(2 R 25.25-26)

1Paqallqu phaxsi saraqatarusti, Netaniasan yuqapa Elisamá sat jaqin allchhipa Ismael jaqix, khititix reyin wila masipäki ukax Mispá chiqan Guedaliasampi parliriw saräna. Tunka jaqinakampi chikt'ataw saräna. Ukatsti Mispá chiqan manq'kasinxa,

2Ismael chachax uka tunkanimpi sartasin Guedaliasarux espadampiw jiwayapxäna, khitirutix Babiloniankir reyix Judá uraqi apnaqañapatak utt'ayawaykatayna ukaru.

3Ismael chachax taqi judionakaru, qawqha babilonio soldadonakatix Guedaliasampi chika Mispá chiqan qhiparapkatayna taqi ukanakaruw jiwarayarakïna.

4Qhipürusti, janiw khitis Guedaliasan jiwayatätap yatkänti,

5ukapachasti Siquem, Siló, Samaria tuqinakat kimsaqallqu tunka jaqinakaw purintanipxäna, sunkhanakapas mururata, isinakapas ch'iyanuqata, janchinakapas jupanakpachan q'ala chhuxriñchjasita. Ukhamarus granonaka, inciensonaka apanipxäna Tatitun utapan Tatitur luqtañataki.

6Ukatsti Ismaelax Mispá chiqat mistuwayasin jupanakar jikxatiriw thakhinjam jacht'asis saräna. Jupanakampi jikisisasti sarakïnwa:

—Jutapxam Ahicam jaqin Guedalías yuqapar uñjiri —sasa.

7Ukampis markar purinipkipanxa, Ismaelampi jaqinakapampix uka jaqinakaruw jiwarayapxäna, ukatsti mä waña phuch'uruw jaquntapxäna.

8Ukampisa, uka jaqinakat tunka chachanakaw Ismael chacharux sapxäna:

—Janikiy jiwayapxistati. Nanakanxa trigo, cebada, aceite, misk'i ukanakaw pampan imantat utjasipkitu —sasa.

Ukhamasti Ismael chachax janiw mayni masinakaparjam jiwaraykänti.

9Kawkïr phuch'urutix Ismael jaqix uka jiwarat jaqinakan janchinakap jaquntkäna ukasti, Asá sat reyin lurayasit pachpa phuch'ünwa, uksti Baasá sat Israelan reyipax jupampi nuwasir sarkatayna ukat jark'aqasiñatakïnwa. Uka phuch'usti wali jach'änwa, ukampis khitinakarutix Ismael jaqix jiwaraykatayna uka jiwatanakan janchipampi phuqhantatäxänwa.

10Ukhamarus Ismael jaqix reyin phuchhanakaparu, kawkïr jaqinakatix Mispá chiqan qhiparapkatayna taqi uka jaqinakaruw katuntayatayna, khitinakarutix Nebuzaradán jilïrix Guedalías chachan apnaqatäpxañapatak uskuwaykatayna taqi ukanakaru. Taqi uka katuntat jaqinakampisti, Ismael chachax amonitanakan uraqip tuqiruw saräna.

11Caréah sat jaqin Johanán sat yuqapa, khitinakatix jupampïkän uka jilïrinakasa, Ismael jaqin mayninakar ukham jiwarayatap yatisinxa,

12taqi jaqinakaparuw tantachthapïna, ukatsti uka Ismael jaqimpi nuwasiriw sarapxäna. Gabaón chiqan mä jach'a uma imaña utjki uka chiqaruw jikxatapxäna.

13Kunapachatix Ismael jaqin katuntat apat jaqinakax Johananampiru, mayni jilïrinakampir uñjapkän ukapachasti, wal kusisipxäna,

14kuttanisinsti Johanán jaqimpi chikaw sarxapxarakïna.

15Ukampis Ismael jaqimpi, yaqha kimsaqallqu jaqinakampix, janiw Johanán jaqimpi katuyasipkänti, jan ukasti, Amón tuqiruw jaltxapxäna.

16Mä tuqitsti Johanán jaqimpi, kawkïr jilïrinakatix jupampi chikäpkän ukanakampisti, khitinaktix Ismael jaqix katuntat Mispá chiqat Guedaliasar jiwayasin apkatayna, uka jaqinak wasitat jupax anxarxarakïna, ukanakasti soldadonaka, warminaka, wawanaka, jilïrinak ukanakänwa. Ukat Johanán jaqix jupanakarux Gabaón chiqatpacha wasitat kuttayanxäna.

17Ukhamaw jupanakax Guerut-quimam sata chiqar puriniñkam jutantasipkäna, ukasti Belén sata jak'ankänwa, uka chiqanarak samart'apxäna. Jupanakan amtatanakapasti Egipto markar puriñänwa;

18ukhamat babilonionakat jaltxañataki, Ismael chachan Guedaliasar jiwayatap laykuw uka babilonionakarux wal axsarapxäna, Guedaliasasti Babiloniankir reyin utt'ayatarakïnwa uka marka apnaqañapataki.