JOB 14 - Qullan Arunaka DC

1Jaqin jakäwipax mä juk'a urutakikiwa,

t'aqhisiñanakampi phuqhantata.

2Panqarar uñtataw panqart'i,

ukatsti wañsuwayxakiwa;

ch'iwir uñtataw chhaqtawayi.

3¿Ukham jaqiruti uñtanta,

jupatakit taripäwi wakichañ muntasti?

4Janiw khitis q'añu kankañatxa,

q'uma kankañ apskaspati,

5Jumaw jaqirux qawqha pacha jakañapatakis arstaxa,

uka arsutamarusti janiw jilakipaykaspati,

6janiy jupar juk'amp uñch'ukxamti; samarayxamaya,

¡ch'amapamp jikxatasit qullqipamp kusispan, samaya!

7Mä quqaru khuchhunuktan ukapachax,

ch'ichtaniñapaw suyt'atäski,

ch'ich'iqiripan utjañapax suyt'atäskapuniwa.

8Saphipax achachïskpasa,

alipas uraqin ñusantaskpan,

9umampi warxatatax, ch'uxñtanxaniwa;

mä machaq quqar uñtataw layminakapax jilantxani.

10Ukampisa, jaqix jan mayampitakiw jiwxi;

jiwxasinsti, ¿kawkirurak sarxisti?

11Jach'a qutan umapas wañsuwayxakispawa,

jawiranakas wañantawayxakispawa,

12ukampis alaxpachan utjañapkamasti,

jaqix janiw amay imäwipat sartkaniti;

janirakiw ikïwipatsa p'arxtkaniti.

13¡Q'apisiñam t'akuñapkamax,

manqha pachar imantitasma,

nayat amtasiñamatak mä uru wakt'ayasma!

14¿Mä jaqisti jiwxasin wasitat jaktanxaspati?

Nayasti qawqhaya wakischispa ukkhakamaw suyt'irista,

t'aqhisiñanakaxan tukusiñap puriniñapkama.

15Jumatix jawsitasmaxa, nayax jaysirismawa;

munasiñampiw uñtanitasma,

jumaxay nayar irnuqaschistaxa.

16Jichhax sapa chillqtatax uñch'ukiskistaxa,

ukapachasti janiw nayan juchanakax amuykasmati;

17pantjasitanakaxsa armanukxasmawa,

jucha luratanakaxat q'umachxarakitasma.

18Qullunakas lluxitattiwa,

qarqanakas yaqha chiqaruw jittapxi.

19Umax qalar mirq'suwa,

jallu umasti uraqit laq'anak aptawayi,

ukar uñtat jumax jaqin suyt'añap tukjtaxa.

20Jan mayampitakiw jaqir tukusiytaxa,

uraqipatsa apanuktawa,

jupasti q'ala tukjataw amay imäwir sarxi.

21Wawanakapax jach'añchatäsipkpasa,

janiw jupax uk yatkiti;

jan walt'añarus purisipkpan, janiw jupax uk amuykiti;

22jupan janchipan usutapak yati,

jupa kipkan t'aqhisitapak yatiraki.