EZEQUIEL 47 - Qullan Arunaka DC

Diosan utapat jalsuri uma

1Uka jaqisti uka qhipat Tatitun utapar mantañawjaruw wasitat irpitu. Ukapachaw nayax uñjarakta punku manqhat uma jalsusinkiri, uka umasti inti jalsu tuqiruw jalaskäna, kawksarutix Tatitun utapax uñtatäkän uksaru. Uka umasti Tatitun utap kupïxap jalaqaskäna, altarat aynach tuqiru.

2Ukatsti Tatitun utapat amstäx punku chiqanjam irpsurakitu, anqäx tuqi muytayanisasti, inti jalsu tuqit mantaniñäkis ukkharuw irpitu. Ukansti aynach punkut mantaniñäkis ukat uma jalsuniskir uñjarakta.

3Uka jaqisti tupt'añ wiska apt'ataw inti jalsu tuqir mistuwayi, ukansti phisqa pataka metronak tupt'araki, nayarusti uka jalir uma chiqanjam irpkatitu; umasti kayu muqunakkamaw makhatitu.

4Ukatsti yaqha phisqa patak metronak tupt'araki, ukatsti uka jalaskir umanjam wasitat irpkatitu, ukansti umax qunqurkamaw makhatxitu. Yaqha phisqa patak metronak tupt'aniraki, ukatsti uka umanjam wasitat irpkatitu; jichha mänxa uka umanakax cinturkamaw purxarakitu.

5Yaqha phisqa patak metronakampi tupt'askakiwa, uka jalir umasti mä jach'a jan makhatkay jawiraw tukxäna, umanakapan waljätapatsti, tawumpi makhatañjamakïnwa.

6Ukat sarakitu: “Jichhax wal amuyam kuntix uñjktas uka” sasa.

Ukatsti jawir thiyaruw wasitat kuttayanitu,

7uka jawir thiyanakansti walja quqanak uñjta.

8Ukat sarakitu: “Aka jawirax inti jalsu tuqiruw sari, Jordán jawirar puriñkama, ukatsti Mar Muerto sat jach'a qutaruw mantxani. Uka qutar purkani ukkhasti, uka qutan umanakapax muxsa umaruw tukxani.

9Kawki chiqansa, kawkharutix aka umanakax purkani ukansti, kunayman walja animalanakampi walja chawllanakampiw jakasipxani. Aka jawiran umanakapasti k'allk'u umanakxa suma muxsa umaruw tukuyxani, ukatsti kunayman chawllanakaw utjarakini.

10En-gadi chiqat qalltasina En-eglaim chiqakamaw chawlla katurinakax utjani, ukan qänanakapsa wañacht'asipxani. Ukansti kunjämatix Mediterráneo jach'a qutan kunayman walja chawllanakax utjki ukhamarakiw utjani.

11Ukampis juqhu chiqanakana, ñiq'inakansa janiw suma muxsa umax utjkaniti; jan ukasti, k'ara umakiw utjani, ukasti jayu apsuñatakikiw askirakïni.

12Uka jawir thiyanakansti purapkatan muxsa achunak churir kunayman quqanakaw utjani. Uka quqanakan laphinakapasti janipuniw willirtkaniti, jan samart'asaw uka quqanakax achurakini. Sapa phaxsiw achunak churani, Tatitun utapat misturi umampi qarpatäpxatap layku. Uka achunakasti manq'añatakïniwa, laphinakapasti qullt'asiñatakirakïniwa.Israel uraqin qurpanakapa

13“Naya, Tatituw akham sista: Israelan tunka payan ayllunakapax tuti katuqkani uka uraqin qurpanakapax akhamäniwa. (Josearusti pä ukkhaw wakt'arakini).

14Nayasti jumanakan nayra awkinakamaruw aka uraqi churañatak juramentompi arsüyäta. Jichhax taqinis mä ukch'akamak jaljasipxam. Aka uraqisti jumanakan uraqimäniwa.

15“Amsta tuqinkir qurpasti, Mediterráneo sat jach'a qutat qalltasina, Hetlón, Sedad,

16Berotá, Sibraim sata markanak chiqa sarakipani, uka markanakasti Damasco, Hamat ukan jikxatasi, ukkhatsti Hazar-haticón sata chiqakama, ukasti Haurán sata uraqimpiw qurpasiraki.

17Ukhamaw amsta tuqinkir qurpax Mediterráneo sata jach'a qutat qalltasina, Hazar-enán sata ukakam purini, amsta tuqirusti Damasco, Hamat uraqinakaw qhiparani.

18“Inti jalsu tuqitsti, Haurán, Damasco sata uka markanakat qurpax sartanini, Tamar sata markakamaw purini, ukasti Mar Muerto sat quta jak'ankiwa, Galaad sata uka uraqimpi, Israel uraqimpi qurpapsti, Jordán jawiraw jaljarakini.

19“Aynach tuqinkir qurpasti Tamar sata markat qalltani, Meribá-cadés sata uka suma uraqi chiqa sarakipasa, Egipto jawiranjama, Mediterráneo jach'a qutaru puriñkama.

20“Inti jalanta tuqitsti qurpax Mediterráneo jach'a qutatäniwa, Egipto qurpata sartasin, Hamat markar mantaña uñkatasinkki uka jach'a quta lakar puriñkama.

21“Uka uraqinakat Israelan tunka payan ayllunakaparux lakintatäni.

22Uka uraqisti jumanakaru wakt'apktam uka tutiwa, ukhamaraki kawkïr jaqinakatix yaqha markanakat jutasin jumanak taypin jakapkani, wawanakanïpkarakini ukanakarus wakt'arakini. Jupanakarusti Israel uraqin yurirïpkaspas ukham uñjapxäta. Israel ayllunakar uraqi lakintapkäta ukkhasti, jupanakarux wakt'arakiniwa.

23Yaqha markat jutirinakarusti, kawkïr ayllunxay jakapxchini ukan uraqix jupanakaru wakt'arakini. Naya, Tatituw uk arsta.