SALMOS 64 - Qullan Arunaka DC

SALMO 64Diosampi arxatayasiñatak mayisiña 1 Davidan q'uchupa.

1 1 (2) Diosaxay,

ayqutaxar ist'akimaya;

axsarkay uñisirinakat jakañax jark'aqita.

2 2 (3) Ñanqha lurir jaqinakat imantita,

nayatak ñanqha amtir jaqinakat jark'aqita,

nayar jiwayañ munirinakat qhispiyita,

3 3 (4) jupanakax espadar uñtat laxranakap ariptayapxi,

mich'inakar uñtat ñanqha arunak antutt'apxi.

4 4 (5) Jan juchan jaqirux jamasat chhuxriñchapxi,

jan khuyapt'ayasisaw akatjamat chhuxriñchapxi.

5 5 (6) Ñanqha lurañatakix purapat ch'amañchasipxi;

jamasar imantat sipitanak uchañatakiw amtapxi,

janis khitis uñjkaspa ukham amuyapxi,

6 6 (7) janis khitis ñanqha luratanakap yatxatkaspa

ukham amuyapxaraki.

Ukampis jaqin chuyma manqhip uñt'iristi,

taqi jan wali luratanakap yatxatani.

7 7 (8) Diosaw mich'inakapampi chhuxriñchjani,

akatjamat chhuxriñchjataw uñjasipxani;

8 8 (9) pachpa arunakapaw aynacht'añarux puriyani,

jupanakar uñjirinakasti larusipxaniwa.

9 9 (10) Taqiniw ukapachax Diosar jach'añchapxani,

luräwinakapat yatiyapxani;

luratanakap amuyapxarakini.

10 10 (11) Aski jaqix Tatitumpiw kusisini,

jupampiw arxatayasini,

q'uma chuyman jaqinakasti

kusisitaw jakasipxani.