ISAÍAS 5 - Qullan Arunaka DC

Uva yapux, kunäkitix Judá markax uk uñacht'ayi

1Munat masixan sutipxaruw q'ucht'asï,

uva yapupatakiw mä q'uchu q'ucht'arakï.

Jupax mä suma achur uraqinïnwa,

uka uraqin mä uva yapunïnwa.

2Uka uraq unxtayi, qalanaksa sum pallsu,

suma ajllit alinak ayrunti.

Uka yapu taypirusti mä torre sayt'ayi,

uvanak ch'irwsuñatakiw mä chiq wakichi.

Jupasti muxsa uvanak suyt'äna,

ukampis k'allk'u uvanakakiw achxäna.

3Jerusalén markan utjir jaqinaka,

Judá markankirinaka,

jichhax sapxitaya,

ukhamäñapatakix ¿khitis juchani,

jumanakati jan ukax nayacha?

4¿Kunampich uva yapuxar lurañax wakisïnxa?

¿Kuncha jan lurkpachätxa?

Nayax suma muxsa uvanakan achuñap suyaskäyätxa,

¿kunatarak ukhamasti k'allk'u uvanakak achusti?

5Walikiwa, jumanakaw nayan uva yapuxäpxtaxa,

jichhax kuntix jumanakampi lurañ amtkta uk sapxäma:

tukjatäpxañamatakix janiw arxatxapxämati,

markaman pirqapsti aptxarakïwa ukhamat taksutäpxañamataki;

6jan khiti tumpirin apanukurakïxa.

Janiw khuchhurt'apkanisa,

janirakiw qursupkanisa,

quranakampi, ch'aphinakampiw chhaqtayani.

Qinayanakarusti “jan uka yapunakxar jallumti” sarakïwa.

7Taqi ch'amani Tatitun uva yapupaxa,

uka suma munat yapupasa,

Israel markawa,

Judá markarakiwa.

Tatitusti jupanakatxa,

kamachipar yäqatäñap munänxa,

ukampis jaqi jiwayañanakak jikxatixa;

chiqa luräwinak suyt'änxa,

ukampisa t'aqhisiñat warariñanakak jikxatarakixa.Ñanqha jaqinakatak axsarayañ arunaka

8¡Ay, kunakïkan jumanakatakixa,

utanaksa ukkhar akkharuw alapxtaxa,

uraqinaksa ukkhar akkharuw katuntapxtaxa,

janiw khitirus jalt'asiyapktati,

uka uraqinakxarux jumanakakïpkasmas ukham utjantasipxtaxa!

9Taqi ch'amani Tatitusti juramentompiw nayar situ:

“Walja utanakaw t'unjatäni,

jach'anakäskpasa, qawqha sumäskpasa,

janiw khitis uka utanakan jakkaniti.

10Jach'a uraqir yapuchat uvasa,

mä jisk'a turril vinok churani.

Tunka khumu jathampi yapuchat yapusti,

mä khumu trigok achuni.”

11¡Ay, kunakïkan jumanakatakixa,

khitinakatix qhantatitpach machañatak sartapxta,

arumkamas machasipkaktawa!

12Jumanakan phunchhäwinakamansti,

arpa, cítara, tambor, pinkillo

ukanakan toct'asitapakiw ist'asiski,

jach'a manq'äwinakamansa

vino umañakiw utjaski;

ukampis kuntix Tatitux lurki ukanakat janiw amuyapktati,

janirakiw jupan luratanakapsa yäqapktati.

13Ukatpï jichhax markpacharu, jilïrinakapampirux,

jaya markar apanukutäpxanixa,

khayanarak manq'atjamasa, umatjamas jiwarapxani.

14Jiwañasti mä axsarkañ laq'ur uñtatawa,

markpacharu, jilïrinakapar

manq'antañatak lakapsa jist'ari,

kusist'añanakana,

thuqt'añanakan sarnaqasipki ukanakaru.

15Uka markan jakirinakasti q'ala jisk'achjataw uñjasipxani,

jach'a jach'a tukur jaqisa

p'iqip alt'asax llamp'usiñapaw wakisini.

16Taqi ch'amani Tatitusti taripäwi lurañapanxa

jach'a kankañap uñacht'ayani,

Qullana Tatitux chiqapar uñjasax

q'uma kankañap uñacht'ayani.

17Markanakasti q'ala t'unjatäniwa,

uka tinkut pirqanak taypinsti

ovejanakampi cabritonakampikiw manq'xapxani.

18¡Ay, kunakïkan jumanakatakixa,

k'arisiñampi ñanqhanakampik lurasipktaxa,

jucha lurañsti mä carror uñtat qatatipxtaxa!

19Jumanakasti sapxaraktawa:

“Diosax jank'akiy uñjañasatak lurañanakap lurpan;

Israelan Qullan Tatitupasti

jank'akiraki amtäwinakap phuqpan,

ukhamat uka amtäwinakap yatiñasataki” sasa.

20¡Ay, kunakïkan jumanakatakixa,

kunanakatix jan walïki ukarux “Waliw” sapxtawa,

walïki ukarusti “Janiw walïkiti” sapxaraktawa,

qhansti ch'amakaruw tukuyapxtaxa,

ch'amaksti qhanaruw tukuyapxaraktaxa,

k'allk'üki uksti muxsaruw tukuyapxtaxa,

muxsäki uksti k'allk'uruw tukuyapxaraktaxa!

21¡Ay, kunakïkan jumanakatakixa,

khitinakatix taqi kuns yatir yatiri tukupkta,

wali ch'ikhïpkasmas ukham amuyasipkta ukanakatakixa!

22¡Ay, kunakïkan jumanakatakixa,

khitinakatix vino umantasas wali chachak tukupkta,

machañatak umañanak wakichañsa sum yatipkta ukanakatakixa!

23Jumanakasti juchan jaqirux qullqi laykux jan juchan mistuyapxtaxa,

jan juchanïki ukanakarusti juchañchapxaraktawa.

24Israelan Qullan Diosapan yatichäwinakapxa,

janiw katuqapktati;

chiqpach mä sapa Tatitun kamachinakapsa

jisk'achapxtawa.

Ukatpï jichhax, kunjamtix ninax wichhurux q'al nakhantkixa,

ukhamarakiw jumanakax q'ala tukjatäpxäta,

kunjämatix alinakax saphitpach ñusjkix ukhama,

panqaranakapas laq'ar tukuwaykix ukhama.

25Ukat Tatitux markapatak wal q'apisïna,

amparapsa mutuyañatakiw aytarakïna.

Qullunakax khathatipxänwa,

jaqi jiwatanakasti saräwinakan t'unar uñtat jaqtatäpxänwa.

Ukampis Tatitux phiñasitakïskiwa,

amparapas mutuyañatakix wakicht'atakïskiwa.

26Tatitusti mä wiphal apti,

jayankir markarusti khuyt'asaw jawsi;

wali jayatpach jutayaraki.

Markasti ukspachaw juti, mäkiw purini;

27jupanak taypinsti janiw pisi ch'amasa, qaritas utjkiti,

janiw iki machatas utjkiti,

janiw khitis wak'ampi jan suma wak't'asitax utjkiti,

janirakiw wiskhunakapan t'isnunakapas t'aqaratäkiti.

28Mich'inak antutt'añanakapasti suma jiyintt'atawa,

mich'inakapasti wali arinakawa.

Caballonakapan casconakapas qaljam ch'ullqhiwa,

carronakapan muyurinakapas tutuka thayar uñtatawa.

29Soldadonakasti nuwasiñatakiw art'asipxi;

leonanakjamaw wararipxi,

mä kunsa katjasin manq'antañatak jayar qatatipki ukhama,

janirakiw khitis uka katutap aparkaspati.

30Kunapachatix chimpt'at urux purinkan uka uruxa,

uka markax jach'a qutar uñtataw Israel markatakix qhuthutini,

aka uraqisti q'ala ch'amakt'ayatäniwa,

ch'iyara ch'amak qinayanakamp chhaqtayatäniwa.