ÉXODO 31 - Qullan Arunaka DC

Qullan chiqan yänakap luririnaka(Ex 35.30; 36.1)

1Tatitux Moisesar sänwa:

2“Nayaw Judá ayllu taypit Urí chachan Besalel yuqapar ajllista, Hur chachan allchhiparu,

3juparusti Diosan Ajayupampiw phuqt'ta, ukhamarak yatiñ kankañampi, suma amuyumpi, aski uñt'añanakampi, kunayman lurañanakatak ch'ikhi chuymampiw phuqt'arakta,

4jupan amuyt'añapataki; qurita, qullqita, broncet yänak lurañapataki,

5suma qalanakat k'uthasin suma yänak lurañapataki, lawanakat sumanak khithuñapataki, ukatsti kunayman suma lurañanak lurañapataki.

6Jupar yanapiritakisti, Dan ayllunkir Ahisamac chachan Oholiab yuqaparuw ucharapta. Ukatsti ch'ikhi jaqinakarux taqiniruw juk'amp yatiñ kankañ churta, jupanakan kuntix nayax sisksma taqi ukanak lurapxañapataki:

7Tatitump Jikisiñ Carpa, arust'äwi arca, arcan qhuphiñapa, Carpan taqi yänakapa,

8t'ant'a uchañ mesa, yänakapampi, suma qurit lurat candelero, yänakapampi, incienso nakt'ayañ altara,

9wilañcha nakt'ayas luqtañ altara, yänakapampi, ampar jariqasiñ lamana, qunt'añapampi,

10p'itat isinaka, Aarón sacerdoten suma isinakapa, wawanakapan sacerdote kankañ luräwi phuqhapxañapatak isinakapa,

11qullan chiqawjatakisti, luqtañ aceite, suma q'apkir incienso. Jupanakaw kunjämtix nayax sisksma ukhamarjam taqi kun lurapxañapa.”

Sábado uru(Ex 35.1-3)

12Tatitux Moisesaruw parläna, juparusti sänwa:

13“Israelitanakar parlam jupanakarusti sarakim: ‘Jumanakax nayan sábado urunakax imapxätawa, ukax wiñayatak nayampi, jumanakamp taypinkir chimpuwa, ukhamat yatipxäta naya, Tatitun jumanakar ajllisitaxa.

14Sábado urusti qullanawa, uka laykuw jumanakax imapxäta. Khititix uka uru jan imkani ukaxa, jiwaniwa. Ukhamarusa, khiti jaqitix uka urun kunsa lurani ukaxa, markap taypit jaqunukutaw uñjasini.

15Suxta uruw irnaqasini, ukampis paqallqüri urux Tatitur luqtat samarañ uruwa. Khititix uka urun kunsa lurkani ukaxa, jiwayatäniwa.’

16Ukhamasti israelitanakax sábado uru imañ janiw armasipxañapäkiti, jan ukasti mä suma arust'äwjama wiñayan wiñayapa imapxañapa.

17Ukasti nayampi israelitanakampit wiñay chimpüniwa.”

Tatitux suxta urun alaxpachsa, aka uraqsa luräna, paqallqüri urusti lurañanak jaytasaw samaräna.V. P'AKINTATÄTAPAT WASITAT LURAT ARUST'ÄWI(31.18—34.35)Qurit lurat vaca qallu(Dt 9.6-29)

18Tatitux Sinaí qullun Moisesar parlañ tukt'aykän ukapachaw, tunka kamachinakan qillqantat pä qala tablanak jupar churäna, ukanakasti pachpa Diosan ampar luk'anapamp qillqatänwa.