ÉXODO 37 - Qullan Arunaka DC

Besalel chachan arust'äwi arca luratapa(Ex 25.10-22)

1Besalel chachax acacia lawat arust'äwi arca luräna, ukasti sayt'urux mä metro tunka centimetronïnwa, iranarusti suxta tunka phisqan centimetroni, alayarusti suxta tunka phisqan centimetronirakïnwa.

2Ukarusti qurimpiw anqäxatsa, manqhäxatsa lip'suyäna; taqpach thiyanakaparusti qurimpirakiw muyukipayäna.

3Ukxarusti pusi kayupatakix qurit pusi argollanak lurarakïna, payax maysa thiyataki, payasti maysa thiyatakiraki.

4Ukxarusti jach'a muruq'u lawanak acacia lawat luräna, uksti qurimpirakiw patat lip'suyäna.

5Uka lawanaksti arcan purapäxankir argollanak taypinjam mistuyäna, ukamp arca kallañataki.

6Ukxarusti suma quritkamak mä qhuphiñ lurarakïna, ukasti sayt'urux mä metro tunka centimetronïnwa, iranarusti suxta tunka phisqan centimetronirakïnwa,

7ukatsti querubines sat chhiqhaninakar uñtatanak martillompi liq'suta, quritkamak luräna, ukanaksti arcan qhuphiñap patxaruw purap thiyar uchäna.

8Qhuphiñampi chhiqhaninakampix maypach lursutakïnwa, uka chhiqhaninakasti purap thiyat mistsutänwa,

9ukhamasti uka pä chhiqhaninakax purapat uñthapisitänwa arca qhuphiñar uñxatata, chhiqhanakapamp arca qhuphiñar janxatata.

Besalel chachan t'ant'a uchañ mesa luratapa(Ex 25.23-30)

10Ukxarusti Besalel chachax acacia lawat mä mesa lurarakïna, ukasti sayt'urux llätunk tunka centimetronïnwa, iranarusti pusi tunka phisqani centimetroni, alayarusti suxta tunka phisqani centimetronirakïnwa.

11Uka mesxa qurimpiw lip'suyäna, taqi tuqi thiyanakaparus qurimpiw muyukipayäna.

12Mesan thiyanakapsti paqallqu centimetroni luräna, uka thiyanakarusti qurimpiw muyukipayäna.

13Ukxarusti pusi argollanak qurit lurarakïna, uksti mesan pusi kayu esquinaparuw uchäna,

14ukhamat uka argollanakax mesan thiyapamp mayakïñapataki, uka taypinjam muruq'u lawanak ayantasin mesa kallañataki.

15Mesa kallañ muruq'u lawanaksti, acacia lawat luräna, ukatsti qurimpiw patatxa lip'suyarakïna.

16Ukxarusti mesa patar uchañanak quritkamak luräna: chuwanaka, jach'a wisllanaka, qirunaka, uma waxt'anak uchañ jach'a qirunaka.

Besalel chachan qurit candelero luratapa(Ex 25.31-40)

17Ukatsti Besalel chachax quri candelero lurarakïna, martillomp liq'suta. Takxäsiripasa, sayiripasa, lamparanakapasa, muqunakapasa, panqar laphinakapas maypacha luratakïnwa;

18purap thiyapatxa suxta amparanakaw saraqäna, kimsax maysata, kimsasti maysataraki.

19Sayiripat saraqkäna uka suxta amparanakansti, sapa mayan almendro panqarar uñtat kimsa qiruw utjäna, mä muquni, panqar laphinakani,

20candeleron sayañap pachpasti pusi qirunïnwa almendro panqarar uñtata, muqunakani, panqar laphinakani.

21Candelerot saraqki uka kimsa paris amparanakasti, aynach tuqirux mä muqunïnwa.

22Muqunakampi, amparanakampi, cadelerompix maypach luratakïnwa, ukax martillomp liq'susin suma qurit luratänwa.

23Ukxarusti suma qurit paqallqu lamparanaka, tenazanaka, jisk'a chuwanak lurarakïna.

24Candelerompi, ukar uchañ yänakamp lurañatakix, kimsa tunka kimsan kilo quriw wakisïna.

Besalel chachan incienso nakt'ayañ altar luratapa(Ex 30.1-5)

25Ukxarusti Besalel chachax incienso q'aphichañ altarxa acacia lawat luräna. Uka altarasti pusi tuqit mä tupunikïnwa, sayt'urux pusi tunka phisqani centimetroni, iranarusti pusi tunka phisqan centimetroni, alayarusti llätunk tunka centimetronirakïnwa. Altaran waxranakapasti altarampix maypach luratakïnwa.

26Ukatsti qurimpiw patxat lip'suyäna, pusi thiyanakapsa, waxranakapsa, qurimpiw muyukipayäna.

27Ukxarusti muyukipatäki uka aynachäxarux quri argollanak ucharakïna, maysa thiyarux paya, maysa thiyarusti payaraki; uka argollanak taypinjam muruq'u lawanak ayantasin altar kallañataki.

28Kallañ muruq'u lawanakxa acacia lawat luräna, qurimpirakiw patat lip'suyäna.

Besalel chachan luqtañ aceitempi, inciensompi wakichatapa(Ex 30.22-38)

29Besalel chachax luqtañ qullan aceite wakichäna, ukatsti suma q'apkir incienso wakicharakïna, kamisatix suma q'apkir qullanak luririx lurki ukhama.