PROVERBIOS 4 - Qullan Arunaka DC

Aski thakhin sarañatak iwxa arunaka

1Wawanaka,

awkiman suma iwxa arunakaparux ist'apxam;

taqi chuymamp ist'apxam sum sarnaqañ yatiqapxañamataki.

2Nayax suma yatichäwinak churapxsma;

nayan yatichäwinakaxarusti jan jisk'achapxamti.

3Nayax wawäñ yatiraktwa;

taykaxan wali munatayätwa,

4awkixasti akham sasaw yatichitäna:

“Arunakay chuymamar imam;

arsutanakaxar jaysam, ukat jakäta.

5Yatiñ kankañampi, amuyt'a kankañamp jikxatam;

janipun arunakaxat armasimti.

6Yatiñ kankañarux janipun apanukumti,

yatiñ kankañarux munasim jupaw imaskätam.

7Taqi kunat sipan

yatiñ kankañampi, amuyt'a kankañamp jikxatam.

8Yatiñ kankañar munasim, ukasti jach'aruw aptätam;

ukar yäqam, ukasti jach'añchätamwa;

9¡p'iqimarux suma munkañ k'achachani,

ukampiw munkay pillu uchani!” sasa.

10Munat wawaxay, arunakax ist'asin katuqita,

jakañ urunakamasti jilxataniwa.

11Nayaw yatiñ kankañ thakhinjam irpäma,

suma thakhinjam sarnaqayarakïma.

12Uka thakhinsti janiw kunar lanqtañas utjkaniti;

ukanjam jalkasas janiw lanqtaskätati.

13Yatichäwinak sum katxarusim, jan apanukumti;

uka yatichäwirjam sarnaqam, ukaw jakañamaxa.

14Janiy ñanqha lurir jaqinakan thakhipanjam saramti,

janirak jan wali sarnaqäwiparus arkamti.

15Jan uka thakhipar mantamti, jan uka chiqa saramti;

jupanakat jithiqtam, nayraqatar saraskakim.

16Uka jaqinakax jan wal lurasax janiw samarapkiti;

jaqi masipar jan aynacht'ayasax, janiw ikthapipkisa.

17¡Jupanakan manq'apampi, umañapampixa,

ñanqha lurañampi tukjasiñampikiwa!

18Aski jaqinakan sarnaqäwipax willjta qhanjamawa;

urutatañkamaw juk'at juk'at qhanti.

19Ñanqha lurir jaqinakan sarnaqäwipasti ch'amakakiwa;

¡janiw kunar lanqtasipxatapsa yatisipkiti!

20Munat wawaxay, iwxa arunakaxar ist'am;

arsutanakaxar sum isch'ukim.

21Janipun nayraqatamat chhaqtayamti,

¡chuymamarupun imam!

22Uka arunakax suma jakañ churi,

khitinakatix jikxatapki ukanakaru.

23Taqi kunanakat sipansa chuymam imam,

jakañaman uka chuymat jutatap layku.

24K'ari arsuñax lakamat jayankpan;

k'ari parlañat jithiqtam.

25Nayraqatar uñtam,

nayraqatarupun uñtam.

26Kawkharutix kayunakam takt'käta uk sum amuyasim,

sarnaqäwimasti chiqapapunïniwa.

27Thakhimat jan maysar saranukumti;

jan wali sarnaqäwinakat jithiqtam.