LEVÍTICO 20 - Qullan Arunaka DC

Jan ist'asirin mutuyäwipa

1Tatitux Moisesar sarakïnwa:

2“Israelita jaqinakarux akham sama:

“Kawkïr israelita jaqitix jan ukax jumanak taypin jakir yaqha markat jutir jaqis wawanakapa Moloc sat diosar wilañchat luqtani ukasti, markankir jaqinakan qalampi k'upjas jiwayatäñapawa.

3Nayasti uka jaqir mutuyañatakiw sayt'ä, ukatsti markap taypitsa apanukurakïwa, nayan qullana utax q'añuchatapata, ukhamarak nayan qullana sutixarus Moloc sat diosar wawap luqtatapampi takisitap layku.

4Markankir jaqinakatix uka jaqir qalampi k'upjas jan jiwayapkani ukasti,

5naya pachpaw uka jaqirux wila masinakapamppach mutuyä, markapatsa apanukurakïwa. Janiw jupa saparukit apanukkäxa, jan ukasti, taqi khitinakatix Moloc diosar yupaychapkäna ukanakaruw apanukü.

6Maynitix ch'amakani layqanakar jiskt'asir sarani, ukat ukanakar arkasarak q'añuchjasini ukasti, nayax jupatakiw phiñasï ukatsti jiwayarakïwa.

7“Nayarupun taqpach katuyasipxita, ukatsti qullan jaqinakäpxarakim, nayätwa jumanakan Tatit Diosamaxa.

8Nayan kamachinakaxsti phuqhapxapunim, ukarjamarak sarnaqapxam. Nayätwa Tatituxa, nayatakiw jumanakarux yaqhachasipxsma.

9“Khititix awkiparu, taykaparu ñanqhachani ukax jiwayatäñatak juchañchatäniwa.

10“Maynitix jaqi masipan warmipar warmischi ukasti, jupasa, warmisa jiwayatäñatak juchañchatäñapawa.

11“Maynitix awkipan warmipar warmischi ukasti, awkiparuw ñanqhachaski. Uka layku, chachamppacha, warmimppach jiwayatäñatak juchañchatäñapawa, ukhamarus jupanakpachaw jiwatapat juchanïsipkani.

12“Maynitix yuxch'apar warmischi ukasti, panpachan jiwayatäñapawa; jupanak kipkarakiw jiwapxatapat juchanïsipkani, ukampis ukham warmisitapax jach'a juchapuniwa.

13“Mä chachatix yaqha chachar warmischi ukasti, panpachan jiwayatäñapawa, jupanakpacharakiw jiwatapat juchanïsipkani ukham lurapxatap layku.

14“Mä jaqitix taykampiru, phuchhampiru warmisinixa, uka jaqix jan walpun luri, jupasa, uka warminakasa jakkirpach ninar nakhantayas jiwarayatäñapawa. Ukhamat jumanak taypin ukham luririnakax jan utjkxaniti.

15-16“Mä chachatixa, jan ukax mä warmisa mä animalampi q'añusini ukanakasti, jiwayatäñatak juchañchatäpxaniwa, uka animalas jiwayatarakïniwa.

17“Maynitix kullakapar warmt'asini, ukax awki tuqitsa jan ukax tayka tuqitsa kullakapäskpan, ukanakasti marka masinakapan uñjkat jaqunukutäñapawa, pachpa kullakar ukham warmisiñax mä p'inqapuniwa, khititix uk lurki ukasti juchañchatäñapawa.

18“Mä chachatix phaxsi wilanïski uka warmir warmischi ukasti, markapat panpachan jaqunukutäpxaniwa.

19“Maynitix tiapar warmischi ukaxa, panpachaniw mutuyatäpxani, jupanakasti wila masinakäpxiwa.

20“Maynitix tiopan warmipar warmischi ukasti, ukampix tioparuw ñanqhachi; jupanakasti panpachaniw jan wawan jiwarapxani.

21“Maynitix jilapan warmipar warmischi ukasti, pachpa jilaparuw ñanqhachi, ukampix mä jach'a juchpun luri, panpachanirakiw jan wawan qhiparapxani.

22“Nayan kamachinakax phuqhapxapunim, ukarjamarak sarnaqapxam. Ukhamat kawkïr uraqirutix irpapksma uka uraqit janiw jumanakarux apanukupkämati.

23Kawkïr jaqinakatix uka uraqin jakapki, jupanakar jaqunukkä ukanakan sarnaqäwinakapan janipun sarnaqapxamti; jupanakasti taqi ukanak luratanakapampiw nayarux q'apisiyitu.

24Nayasti sapxsmawa, kawkïr uraqtix nayax churapkäma uka jaqinakan uraqinakapax jumanakankxaniwa. Uka uraqisti wali suma uraqipuniwa, manq'añanakamas jan tukuskayapunïniwa.

“Nayätwa jumanakan Tatit Diosamaxa, jumanakarusti nayaw yaqha markanakat sipan mä suma marka yaqhachapxsma.

25Uka laykupï jumanakax q'uma animalanakxa q'añu animalanakat yaqhachapxañamaxa, q'uma jamach'inaksa q'añu jamach'inakat yaqhachapxañamarakixa. Jumanakasti jan q'añuchasipxamti kawkïr animalanaktixa, jamach'inaksa, asirunaksa ñanqhaw siskta ukanakampixa.

26Jumanakasti nayatakix q'uma jaqinakäpxam, naya Tatit Diosamasti q'umätwa, ukampis yaqha markanakat sipan nayan markaxäpxañamatakiw yaqhachapxsma.

27“Mä chachatix jan ukax mä warmisa ñanqha ajayun apnaqatäni, jan ukax yatirïpxanisa, jupanakasti qalampi k'upjasin jiwayatäpxañapawa, ukatsti jupanakpacharakiw uka jiwäwipat juchanïsipkani.”