COLOSENSES QALLTA ARUNAKA - Qullan Arunaka DC
QALLTA ARUNAKAPablox janis jupa pachpa Colosankir iglesia utt'aykchïna ukasa, jupan uka iglesiar uñjañapa, yanapt'irinak khithañ wakisitap amuyäna. Aka qillqatasti maynïr qillqatanakjam Pablon katuntatäkasin qillqatawa. Timoteo yanapt'iripamp chikt'ata aruntampi qalltasinsti, maynïr qillqatanakanjam Diosaruw yuspagari Colosankir iglesiat suma yatiyäwinak ist'asina (1.8). Amuyataxa, k'ari yatichirinakaw uka iglesiarux mantatayna, jupanakasti ch'aman yaqha ajayunakar yupaychañ wakisitapat parlapxäna, ukatsti Moisesan kamachiparjam kunayman saranak phuqhapxañap wayt'apxäna.Ukampis Pablox ukanak tuqiw arsüna, ukatsti Diosax Cristo tuqi taqi kunsa luratap qhanañchäna, uka ch'aman ajayunakxarus jilïrïtapa, taqi ukanakas amparapankatap qhanañchäna. Ukhamarus Cristow iglesian p'iqipaxa, ukatsti cruzan jiwatap tuqiw Diosampi sumankthapiñax utji. Criston luräwipax qhispiyasiñ jikxatañatakix phuqhatawa. Janchi tuqin circuncisión katuqas q'umäñäki uka tuqitsti, “Cristo tuqikiw q'umachasiñax utji” (2.11), ukasti juchat jan mayampitak jithiqtañawa, ukham sasaw arusxatäna. Tatit Criston taqi kunxarus ch'amanïtapatxa, kunjämatix Efesios qillqatan siski, uka kipkarak aka qillqatan qhanañchi (1.9—2.19). Ukatsti Criston machaq jakañan utjatapat qhanañcharaki (2.20—4.6), kunjämatix Filipenses qillqatapan utjki ukhama, ukampix paypach qillqatax uka pachpa urunakan qillqatäkaspas ukham amuyayistu. Diosax machaq jakañ churki uka iyawsirinakax Cristompi mayacht'ataw jakxapxañapa, uka suma sarnaqäwi mayninakar uñacht'ayasa (2.13). Uka tuqit juk'amp iwxanakapasti, Efesios qillqatan phisqïr (5) jaljan qillqatäki niya ukar uñtatawa.Qhip qhipa aruntanakapax kunjäm munasiñ chuymampitix Pablox yanapt'irinakapar uñjkäna uk uñacht'ayäna. Aka jaljanxa (4.7-18), Laodicea iglesiar mä qillqat apayatapat parli, ukampis Pablon qillqatanakapan Laodiceankir iyawsirinakar qillqatax janiw utjkiti.
