LAMENTACIONES 4 - Qullan Arunaka DC

IV. PUSÏR JACHÄWI(4.1-22)

1¡Qurix ch'iyärkiptawayxiwa!

¡Ukkha suma qurix janiw k'ajkxiti!

Tatitun qullan utapankir qalanakas

uka pirqa q'iwt'anakan willirtaski.

2Jerusalén markan jakirinakasti,

wali munatäpxänwa,

qurïpkaspas ukham uñjatäpxänwa,

jichhasti ñiq'i phukhükaspas

ukham uñjatakïxiwa,

jan yäqañ sañu luririn luratjama.

3Qamaqinakas qallunakaparux

ñuñt'ayasipxapuniwa,

ukampis israelita qhuru taykanakasti,

wawanakaparux apanukupxiwa.

4Ñuñuskir wawanakasti

umat sinti pharjatapuniwa,

laxranakapas laka manqharuw lip'katxi.

Wawanakax t'ant'a mayipxi,

ukampis janiw khiti

t'ant'a churiris utjkiti.

5Khitinakatix nayrax sist'asiñkam

manq'apkäna ukanakaxa,

jichhax uka anqanakan

manq'atjamaw jiwarasipki.

Khitinakatix nayrax wali qamir

yänak taypin jilapkän ukanakasti,

jichhax q'añu taypinak jakxapxi.

6Jerusalén markax tinkuwa,

juchapasti Sodoma markan

juchapat sipan juk'amp jilapuniwa,

uka markax jan khitin nuwantataw

mä juk'a pachan t'unjat uñjasïna.

7Ajllit jaqinakapasti

khunut sipan juk'amp janq'ünwa,

lechet sipan juk'amp janq'üpxarakïnwa;

janchipasti coral siski ukatsa

juk'amp suma wila samïnwa;

sayt'atapas zafiro siski ukat

sipan juk'amp sumarakïnwa.

8Ukampis jichhax jan khitinsa uñt'kaya,

q'ala usuntatäpxiwa.

Janchinakapas qaqa lawanakar

uñtat wañsutawa,

¡ch'akhanakapas uñartaskarakiwa!

9Taqiniw juk'ata juk'at manq'atjam jiwarxapxi.

¡Mä ch'axwäwin jiwañax askïspawa

manq'atjam jiwañat sipana!

10¡Jerusalén markax q'ala t'unjataw uñjasi!

Suma munasir taykanakas

pachpa wawanakaparuw phayantasxapxi,

ukhamat manq'atäpxañapataki!

11Tatitun phiñasiñapax sinti jach'apunïnwa,

aqkir phiñasiñapax jan t'akuykayänwa;

Jerusalén markarusti

ninampiw phichkatäna,

uraqitpach q'al t'unjarakïna.

12Aka uraqinkir reyinakaxa,

taqi akapach apnaqir reyinakasa,

janipuniw Jerusalén markan punkup chiq

uñisirinakapan mantaniñap suyapkänti.

13¡Taqi ukanaksti profetanakapan juchapata,

sacerdotenakapan ñanqha luratapata,

pachpa marka manqhan

jan juchan jaqiru jiwayapxatapat

ukham lurasïna!

14Juykhur uñtatarakiw

Jerusalén markan payinaqapxi;

amparanakapas wilakamakiwa,

janirakiw khitis jupanakan

isip llamkt'añ munkiti.

15“¡Jithiqtapxam, jithiqtapxam,

q'añu lurir jaqinakawa,

jan llamkt'apxamti!” sasaw arnaqasipxi.

Yaqha markankir jaqinakas

“muyuyku jaqinakawa,

janiw akan jakapkaspati”

sasaw arnaqasipxaraki.

16Tatit pachpaw jupanakar q'al ananuku,

janirakiw mayampis

jupanakar uñkatkxiti.

Sacerdotenakar axsartañax

janiw utjkxänti,

jilïr jaqinakar khuyapt'ayasiñas utjkxänti.

17Nayranakasas uñch'ukkäwix qarirxiwa,

inamayakiw yanap suyasktanxa.

Mä jan qhispiyir markan

puriniñap suyasktan.

18Jiwasan sartäwinakasas uñch'ukitawa;

janiw anqarus mistuñjamäkiti.

Tukusïwisax jak'ankxiwa,

pachax purinxistuwa;

¡tukjatäñasax purinxiwa!

19Jiwasar arknaqirinakasti

alayan tuyur pakanakat sipan

juk'amp jaltirïpxiwa;

qullunak tuqinakan arknaqistu,

¡wasar tuqinakansti

sipitanak jiwasatak uchantapxaraki!

20Tatitun ajllitapasti, katuntataw uñjasi,

jakañasar ch'amachkistäna uka,

jupa reyit säyätanxa:

“Jupaw markanak taypin

sum uywasistani” sasa.

21¡Edom marka,

jichhax larusim, kusisirakim;

Us uraqin munañan apnaqiri!

¡Jumarux t'aqhisiñax wakt'arakïtamwa,

ukatsti machjata, q'alalaw uñjasïta!

22Jerusalén marka, mutuyäwimax tukusxiwa;

Tatitux janiw juk'ampi apanukuykxätamti.

Ukampis Edom marka,

jan wali luratamat mutuyapunïtamwa,

juchanakamsa qhanaruw uñstayarakini.