2 SAMUEL 23 - Qullan Arunaka DC

Davidan qhip qhipa arunakapa

1Aka arunakax Davidan qhip qhipa arunakapawa:

“David, Jesé chachan yuqapa,

Tatitun jach'ar aptat jaqi,

Jacob chachan Diosapan ajllisit reyi,

Israelan suma q'uchunakap q'uchuri,

jupasti siwa:

2“Tatitun Ajayupaw naya tuqi parli;

arunakapasti laxraxankiwa.

3Israelan Diosapaw arsu;

Israelar arxatiriw sarakitu:

‘Khititix jaqinakar chiqa kankañamp apnaqkani,

khititix Diosar axsartas apnaqkani ukaxa,

4qhantati warawarar uñtatäniwa,

jan qinayan urun, qhantkir intiru uñtatäniwa,

quranaksa jallu purintipan inti qhanapampi jiltayki ukhamäniwa’ sasa.

5Tatitux nayampi mä arust'äwi luri;

suma khuskhachata, chiqapar lurat arust'äwi

ukasti wiñayatakïniwa.

Wila masinakaxax suma utt'ayatäniwa,

Tatitusti nayan amtatanakax phuqhaniwa.

6Ñanqha lurir jaqinakax

jan khitinsa aptata,

apanukut ch'aphinakjamäniwa.

7Uka ch'aphinakar llamkt'añatakisti,

mä hierrompi jan ukax mä lanzampi aptasin,

ninar willintatawa,

ukan q'al nakhantañapataki.”

Davidan ejercitopan atipjir chachanaka(1 Cr 11.10-47)

8Davidan ejercitopan jan axsarir soldadonakax kimsanïnwa. Jupanakat nayrïrix Joseb-basébet sat hacmonita jaqïnwa, jupasti uka kimsanin jilïripänwa, mä kutisti, lanzapampix kimsaqallq pataka jaqinak jiwarayäna.

9Jupxarusti, Ajoj chiqankir Dodó sat jaqin Eleazar yuqapänwa, jupasti uka kimsanitxa sinti jan axsarir soldadopunïnwa. Eleazarax Davidamp chikaw Pasadamim chiqankäna, kunapachatix filisteonakax Israelar katuntañatak tantachasipkäna, ukat israelitanakax jaltxapxarakïn ukapacha,

10ukampis Eleazarax ch'amampiw sayt'asïna, filisteonakarusti ampar t'ukjayasiñkamaw jiwarayäna, amparapas espadaruw lip'kattäna. Khä uruw Tatitux atipjayäna. Ukatsti ejercitox Eleazararuw arkäna kuntix uñisirinakat aparanipkatayna ukanak katuntasiñataki.

11Kimsïr jan axsarir soldadosti, Arat chiqankiri Agué jaqin Samá sat yuqapänwa. Mä kutix, filisteonakax Lehi sat chiqan tantachasipxatayna, kawkhantix lentejanakax yapuchatäkän ukawjana, ukapachasti israelita soldadonakax filisteonakar uñjasinxa jaltxapxänwa;

12ukampis Samá chachax janiw jaltkänti, uka pamparuw sayantasïna, ukat israelitanakar arxatäna, filisteonakar jiwarayasa. Ukürusti Tatitux atipjayänwa.

13Mä kutix, yapu apthapi urunakana, kimsa tunkan jan axsarir soldadonakat kimsaniw, Davidamp jikisir sarapxäna Adulam sat puturu. Filisteo ejercitosti Refaim qhirwaruw purintarakitayna.

14Ukapachasti Davidax imantasiñ utäki ukankaskänwa, ukchañkamasti filisteo soldadonakat mä tamax Belén markankänwa.

15Davidasti umat pharjayasisin säna: “¡Khitikis Belén punkunkir phuch'ut umt'añaxatak um churitaspa!” sasa.

16Ukat ukspachaw uka kimsa jan axsarir chachanakax, filisteonakan campamentop chiqa mantasin Belén punkunkir phuch'ut uma apsunipxäna, ukatsti Davidan ukaruw aparapipxäna. Ukampis jupax janiw umt'añ munkänti, jan ukasti uka um Tatitutak mä waxt'äwïkaspas ukham waranuküna,

17akham sasa: “¡Tatitux aka uma umt'añat qhispiyitpan! ¡Aka uma umañax aka jaqinakan wilapsa umkirista ukhamäspawa, jupanakasti jiwañarus jan axsarasaw aka uma apsurix sarapxi, jakañapsa apt'asirjama!” sasa. Jupasti janiw umt'añ munkapunïnti.

Ukham uka kimsa jan axsarir chachanakax lurapxäna.

18Abisai jaqisti, Seruiá jaqin yuqapa, Joab chachan jilapäkän ukaxa, kimsa tunkan jan axsarir soldadonakan jilïripänwa. Mä kutisti kimsa patak jaqinakaruw lanzapamp jiwarayäna. Ukhamat uka kimsa tunkan jaqinak taypin aytat uñjasïna,

19ukatsti taqinit sipansa, jupaw jach'añchäwinak katuqäna, jupanakan jach'a jilïripaw tukurakïna, ukampis janiw uka kimsani jan axsarir chachanakjamäkänti.

20Joiadá jaqin Benaías sat yuqapax jan axsarir soldadorakïnwa, jupasti Cabseel chiqan utjasïna, wali jach'a luräwinak luräna. Jupaw Moab markankir Ariel jaqin pani yuqapar jiwarayäna. Mä urusti, khunuw khununtaskäna, jupasti mä jach'a p'iyar saraqasin mä leonar jiwt'ayäna.

21Ukatsti mä jach'a tansa egipcio jaqiruw jiwayarakïna, lanzapas ayt'at saraskiriru, Benaías jaqisti mä lawampiw uka jaqir jalxatäna, lanzapa ayarasin pachpa lanzapampiw uka egipcio jaqirux jiwt'ayäna.

22Benaías jaqin ukham luratapatsti, uka kimsa tunka jan axsarir jaqinak taypin, aytat jaqiw tukurakïna;

23ukatsti jupanakat sipansa juk'ampi jach'añchäwinak katuqarakïna, ukampis janiw uka kimsani jan axsarir chachanakarux chikachaskänti. Davidasti juparux jupan uñjirinakapan jilïripat uskurakïna.

24Uka kimsa tunka jan axsarir chachanak taypinsti akanakaw jikxatasïna: Asael, Joab chachan jilapa; Elhanán, Belenankiri Dodó jaqin yuqapa;

25Harod chiqankir Samá, Elicá chachanaka;

26Bet-pélet chiqankir Heles; Tecoankir Iqués jaqin Irá yuqapa;

27-28Anatot chiqankir Abiézer; Husá chiqankir Sibecai; Ajoj chiqankir Salmón; Netofá chiqankir Maharai;

29Netofá chiqankir Baaná jaqin Héleb yuqapa; Ribai jaqin Itai yuqapa, jupasti Guibeá chiqankirïnwa, Benjamín uraqina;

30Piratón chiqankir Benaías; Hidai sat chacha, jupasti Gaas sat jisk'a jawir jak'an utjasïna;

31Arbá chiqankir Abí-albón; Bahurim chiqankir Asmávet;

32Saalbón chiqankir Eliahbá; Guisón chiqankir Jasén; Harar chiqankir Samá jaqin Jonatán yuqapa;

33Harar chiqankir Sarar sat jaqin Ahiam yuqapa;

34Maacá chiqankir Ahasbai jaqin Elifélet yuqapa; Siló chiqankir Ahitófel jaqin Eliam yuqapa.

35Carmel chiqankiri Hesrai; Arbá chiqankir Paarai;

36Sobá chiqankir Natán jaqin Igal sat yuqapa; Gad chiqankir Baní;

37Amón chiqankir Sélec; Beerot chiqankir Naharai, jupasti Seruiá jaqin Joab yuqapan yanapiripänwa.

38Jatir chiqankir Irá; Jatir chiqankir Gareb;

39Urías sat hitita chachampi.

Davidan ejercitopan utjir jan axsarir soldadonakapax, kimsa tunka paqallqunïnwa.