ISAÍAS 50 - Qullan Arunaka DC

1Tatitux siwa:

“¡Jan amuyapxamti nayan Israel taykamar apanukutaxa,

kunjämtix mä jaqix warmiparux apanukki ukhama,

janirak kuna manunak phuqhañatakis

jumanakar t'aqhisiyat jaqjam aljataxsa amuyapxamti!

Jumanakan jucha lurapxatam laykuw aljatäpxtaxa;

Israel taykamasti,

jumanakan nayatak sayt'asipxatam laykuw apanukut uñjasi,

2¿Kunatsa nayax jutkta ukapachax khitirus jan jikxatktxa?

¿Kunatsa jawsataxarux khitis jan jayskituxa?

¿Janit amuyapktasti nayan ch'amanïtaxa jumanakar qhispiyañatakisti?

Nayatakix janiw kunäkis mä aru arsuñaxa,

ukhamat quta wañt'ayañatakisa,

jawiranakas ch'usa wasarar tukuñapatakisa;

ukhamat chawllanakax umatjam jiwarañapataki,

umatjam thujsantañapataki.

3Nayaw alaxpacharus ch'amakt'ayta,

llakisiñ isimpjamaw isthapiyta.”

Tatitun luqtiripax t'aqhisiñ taypin Diosaruw alkatasi

4Khitinakatix chuyma usutäpki, qaritäpki ukanakar

chuymachañatakiw Tatitux yatichitu.

Sapa qhantatiw nayarux sartayitu,

jupan mä suma yatiqiripjama,

ukhamat suma yatichäwinakap katuqañataki.

5Tatituw nayarux amuyt'a churitu,

nayasti janiw saykataskti,

janirakiw maysarus uñtkti.

6Jikhanix churta nayar jawq'jañapataki,

sunkhanakaxsa jik'irayasiraktwa.

Khitinakatix nayar jisk'achapxitäna,

thuskatapxitäna ukanakatsa janiw maysar uñtkaraktti.

7Tatituw nayarux yanapaskitu:

ukat jaqin jan wali arunakapax chuym jan ust'aykituti;

ukatarak nayax mä qarqar uñtat sum sayt'asta,

janirakiw p'inqachjatas uñjaskäti.

8Jak'axankaskiw nayan arxatirixaxa.

¿Khiticha naya tuqi kun saña muni?

¡Jinay taqini sarapxañäni taripirin nayraqataparu!

¿Khiticha kun naya tuqi juchañchasa arsuñ muni?

¡Jutpan ukatsti sarakitpan!

9Tatituw nayarux yanapaskitu;

¿khitirak juchañchitaspasti?

Taqi uñisirinakaxas chhaqtxapxaniwa,

kharun tukjat isjamaw chhaqtxapxani.

10Jumanakat janiw khitis Tatiturux axsartkiti,

luqtiripan arunakapsa janirakiw ist'apkiti.

Ch'amakan sarnaqapxi,

jan mä jisk'a qhanan sarnaqapxi,

Tatiturus janirakiw taqi chuym katuyasipkiti.

11Jan ukaxa, jumanakax ninanak aqtayapxtaxa,

nina mich'inak wakichapxtaxa;

pachpa nina qhanapan sarnaqapxtaxa,

kawkïri nina mich'inaktix aqtayapkta uka qhanana.

Ukampis taqi ch'aman Tatituw mutuyapxätam,

wal t'aqhisiyapxarakïtam.