1 CORINTIOS 3 - Qullan Arunaka DC

Corinto iglesian jan walt'añanak utjatapa

1Jilatanaka, nayasti janiw jumanakar ajay tuqin ch'aman jaqinakarjam parlapksmati, jan ukasti, pisi ch'aman jaqinakarjamakiw parlapxsma, Cristonkir asu wawanakäpkasmas ukhama.

2Jumanakarux jasa yatichäwik yatichapxsma, kunjämtix mä asu wawarux lecheki manq'a lanti churatäki ukhama, jumanakax janïraw ch'ama yatichäwinak katuqirjamäpkäyätati. ¡Jichhas janïraw katuqirjamäpktati,

3jan ch'amanïpxatam layku! Jumanak taypin uñisisiñanaka, ch'axwañanak utjaskipansti, jan ch'amanïpxatam laykux jaqinakan amtäwiparjamakiw sarnaqasipktaxa.

4Kunapachatix maynix arsusi: “Nayax Pablonktwa”, maynisti: “Nayax Apolosanktwa” sasaxa, jupanakax jaqinakan amtäwiparjamakiw arsusipki.

3. ¿Kunas Apostolüñaxa?(3.5—4.5)

5May sipansti, ¿khitirak Pablosti? ¿Khitirak Apolosti? Jupanakax irnaqirinakakïpxiwa, jupanak tuqiw jumanakax Tatitur iyawsapxta. Jiwasanakat sapa mayniw kuntix Tatitux luram siski uk luri:

6nayaw yapuchta, Apolosti umampiw qarpxati, ukampis Diosaw uka yapuchatarux jiltayi.

7Ukhamasti yapuchirisa, qarpiris janiw kunäkiti, jan ukasti, Diosaw taqi kunan jilankixa, jupaw yapuchatar jilayirixa.

8Yapuchirinakasa, qarpirinakas kipkakïpxiwa, sapa maynirus Diosaw luräwipatjam churani.

9Jiwasanakax Diosan luräwipan irnaqir masinakapäpxtanwa, jumanakasti yapuchat yapunakäpxtawa, Diosan utachat utäpxaraktawa.

10Nayaw uta lurir jaqïtxa, nayaruw Diosax munasiñapan uta qalltañatak uchitu, ukatsti yaqhaw ukxarux pirqa sayt'ayaski. Ukampis sapa mayniw kunjämtix uka uta pirqa luraski uk amuyasiñapa,

11janiw khitis uta qallta uchatarux yaqha qalltxa uchkaspati, nayrïr uta qallta uchatäki ukax Jesucristowa.

12Uta qalltatxarusti, maynix qurimpi, qullqimpi, suma qalanakampi, lawampi, jichhumpi, suqusampi, taqi ukanakampiw utachaspa;

13ukampis sapa maynin luräwipax taripañ urun qhanpach uñstani; uka urux ninampiw jutani, ukatsti ninax sapa maynin luratap yant'ani.

14Maynin luräwipatix suma luratächixa, payllap katuqani;

15ukampis luratapatix nakhantanixa, luratap q'al apt'asini, jupax ninatsa jaltkaspa ukham qhispkan ukasa.

16¿Janit jumanakasti Diosan utapäpxatam yatipktasti? ¿Janit jumanakasti Diosan Ajayupan jumanakan jakatap yatipktasti?

17Maynitix Diosan utap t'unthapinixa, Diosax jupar t'unthapirakiniwa, Diosan utapax qullanawa, uka utasti jumanak pachpäpxtawa.

18Janiy khitis jupapach sallqjaspati: maynitix jumanak taypin akapach yatiñ kankañaparjam yatiñan tukchixa, jan kun yatirjamak tukpan, ukhamat chiqpach yatiñan tukuñapataki.

19Akapach yatiñ kankañasti Diosatakix luqhi kankañawa. Qillqatax siwa: “Diosax yatiñaninakarux pachpa sallqa yatiñapampiw katunti” sasa.

20Ukatsti sarakiwa: “Yatiñaninakan amuyunakapan luqhi kankañätap Tatitux yatiwa” sasa.

21Ukat jan khitis jaqin luratanakapat jach'a jach'ax tukuñapäkiti; taqi kunas jumanakankaskiwa:

22Pablo, Apolo, Pedro, akapacha, jakaña, jiwaña, jichhüru, jutir urunaka; taqi kunaw jumanakanki,

23jumanakasti Cristonkapxtawa, Cristosti Diosankiwa.