MARCOS QALLTA ARUNAKA - Qullan Arunaka DC
QALLTA ARUNAKAMarcos qillqatax taqpach evangelionakat sipan juk'amp nayra qillqatäkaspas ukhamawa; ukatsti Mateo, Lucas ukanakax Marcos qillqatapar uñtasjamaw qillqatanakap qillqapxäna. Aka qillqatax puspach evangelio qillqatanakat sipan juk'amp jisk'akiwa, Marcos qillqiristi, kunjämänsa Jesucristo tuqi “suma yatiyäwi arunakan” qalltäwipax uka tuqit qillqi. Ukampis aka qillqat qillqiritakix Bautisir Juanan wasaran luräwinakapampi (1.1-8), Jesusan bautisasitapampi, wasaran supayamp yant'at uñjasitapampiw (1.9-13) uka suma yatiyäwi arunakax qalltawayäna. Ukxarusti Mateo qillqatarjamax, Galilea uraqin Jesusan taqi jaqinakan uñjkat luräwinakapampit parlaraki (1.14—9.50), Galileat Jerusalén markar saräwipata (11.1-52), ukatsti kunanakatix qhip qhipa urunakan luraskän ukanakata, ukanakasti jiwäwipa, jaktäwipa ukanakawa (caps. 11-16).Aka qillqatax Jesusan jan inakt'as luräwinakapat uñacht'ayi, jilpachax parläwinakapat sipansa, luräwinakapat qhanañchi; ukatsti Moisesan kamachipxaru, ñanqha ajayunakxaru, juchanak pampachañataki, ch'amamp yatichañataki, taqi ukanakatak munañanïtap uñacht'ayi. Aka qillqatan Jesusax jupa pachpa jaqin Yuqapätapat parli. Ukampis Diosax “Munat Wawaxa” sasaw sutichasi; ñanqha ajayunakasti “Diosan Wawapat” uñt'apxi. Kunapachatix Jesusax juchañchatäñatak jilïr sacerdoten ukar irpatäkän ukkhaxa, jilïr sacerdotex akham sasaw jiskt'äna: “¿Jumätati Cristoxa, Qullan Diosan Yuqapäki ukaxa?” sasa; Jesusasti ukxarux sänwa: “Jïsa, nayätwa” sasa (14.61,62).
