1 Tatay,
jumaruw mayisinsma;
2Diosaxay,
jumaruw taqi chuymamp alkatsma:
janikiy p'inqa tukuñar jalantañax munamti.
¡Janikiy uñisirinakaxas nayat larusipxitpati!
3¡Jumar taqi chuymamp alkatirinakax
janipun p'inqa tukupxpati!
¡Ina ch'usat jumar qallasir jaqinakay
p'inqa tukuñarux puripxpan!
4Tatay,
thakhim uñacht'ayita,
thakhiman irpnaqasita;
5jumat jan jithiqtas sarnaqayita;
jumaw Diosaxätaxa, Qhispiyirixätasa.
¡Jumarukiw sapürus suyt'asksma!
6Tatay,
munasiñama, khuyapayasiñam
churapkistäyäta ukat amtasikimaya,
7janikiy jucha luratanakaxat amtasimti,
janirak wayna kankañaxan ñanqha luratanakaxatsa amtasimti.
Tatay, khuyapayasiñam laykuy nayat amtasita,
munasiñam laykuy amtasita.
8Tatitux askiwa, chiqaparakiwa;
jupaw juchararanakan luratap chiqacht'i;
9llamp'u chuymaninakarus jupaw chiqa thakhinjam irpi;
aski kankañapan yaticharaki.
10Tatitux khuyapayasiñampi
aski kankañampipuniw irpi,
arust'äwipampi, arsutanakapampi imir jaqinakaruxa.
11Tatay,
juchanakaxax waljapuniwa;
sutiman jach'ätap laykuy pampacht'ita.
12Tatitur waqaychir jaqirux,
kawkïr thaktix sarañapäki uk uñacht'ayi;
13askinakampiw juparux phuqhanti,
wawanakaparusti uraq katuyxaraki.
14Tatitux arkirinakapampix sum parlasi,
jupanakarusti arust'äwir mantatap uñt'ayi.
15Nayax Tatiturukipuniw uñtta,
jupaw taqi jan walt'añanakat qhispiyitu.
16Tatay, uñtanikitaya,
nayat khuyapt'ayasita,
sapakiw uñjasta, llakt'atarakïtwa.
17Chuymaxax juk'ampipuniw llakisi;
taqi llakinakaxat irpst'asita.
18Llakinakaxaru, ch'ama tukutanakaxar uñtanim,
taqi juchanakaxat pampacht'arakita.
19Uñisirinakaxan waljanïtap uñtanim,
jiwayañ chuymampiw uñisipxitu.
20¡Arxatt'asikitaya, jiwañat qhispiyakitaya!
¡Janikiy p'inqa tukuñar jalantañax munamti,
nayax jumampi arxatayasiñatakiw thaqsma!
21Aski kankañaxampi,
chiqa kankañaxampix arxatapxitpan,
jumaruw taqi chuymamp katuyassma.
22¡Diosaxay, Israel markamarux
taqi t'aqhisiñanakapat qhispiyakimaya!
Who We AreWhat We EelieveWhat We Do
2025 by iamachristian.org,Inc All rights reserved.
