JOSUÉ 22 - Qullan Arunaka DC

Rubén, Gad, Manasés ayllun chikat jaqipan kuttanxapxatapa

1Uraqinak lakinuqasinsti, Josué chachax Rubén, Gad, ukhamarak Manasés ayllun chikat jaqiparuw jawsayäna,

2jupanakarusti sänwa: “Jumanakax kuntix Tatitun luqtiripa Moisesax sawayapktam ukarux phuqhapxtawa, nayan arsutanakaxarusa taqi jaysapxaraktaxa.

3Janiw jumanakax taqi uka urunakana, jichhürkamas jilanakamarux jaytanukupktati, ukatsti Tatitu Diosaman kamachi arunakaparux, taqi iyawsañ chuymampirakiw phuqhapxtaxa.

4Diosax arsutapar phuqhiwa, jilanakamas samarañ jikxatapxaraki, ukhamasti, utanakamar sarxapxam, kawkïr uraqtix Tatitun luqtiripa Moisesax Jordán jawirat inti jalsu tuqir churapktam uka uraqir kuttxapxam.

5Ukampis jan armasipxamti, jumanakax taqi iyawsañ chuymampipuni Tatitun kamachiparusa, arsutanakaparusa phuqhapxam, kunjämtix Diosan luqtiripa Moisesax sapktam ukhamarjama, jumanakax Tatit Diosamarux taqi chuymamp munapxam, jupan chiqa thakhipanjam sarnaqapxam, arunakaparus jaysapxam, taqi munasiñ chuymampi, taqi amuyumpi arkasa jupar luqtapxam” sasa.

6Uka qhipatsti, Josué chachax jupanakarux aski waxt'äwinak churasaw khithanukxäna, ukatsti jupanakax utanakaparuw sarxapxäna.

7Moisesax, Manasés chachan ayllupankir maynïr chikat jaqiparux, Basán chiqankki uka uraqi churxatayna. Maynïr chikat jaqiparusti, Josué chachax israelit jilanakapan uraqip taypiruw uraqinak churäna, Jordán jawira inti jalanta tuqiru, ukat jupax nayrïr tamarux askinak churasin khithanukxäna.

8Jupanakarusti sänwa: “Jichhax jumanakax uraqinakamarux, kuntix uñisirinakamat aparapkta uka walja yänakani, walja uywanakani, qurini, qullqini, bronceni, hierroni, walja isinakaniw kuttxapxtaxa. Ukanaksti jilanakamampiw jaljasipxäta” sasa.

9Ukhamaw Rubén, Gad ayllunkirinaka, ukhamarak Manasés ayllunkir chikat jaqinakapax Siló chiqan maynïr israelitanakat t'aqaqtawayxapxäna, Canaán uraqina, Galaad chiqankki uka uraqinakapar kuttxañataki, kawkhantix uraqinakapax utjäna uka chiqaru, kunjämtix Tatitux Moisés tuqi arskatayna ukhamarjama.

Jordán jawir jak'an mä altar lurapxi

10Kunapachatix Rubén, Gad, ukhamarak Manasés ayllunkir chikat jaqinakapax Jordán jawirar puripkän ukkhaxa, Canaán uraqinkkasin, jawir thiyar mä jach'a altar lurapxäna.

11Maynïr israelitanakarusti yatiyapxänwa Rubén, Gad, Manasés ayllunkir chikat jaqinakapax mä altar Canaán uraqi qurpana, Jordán jawir jak'ana, israelita uraqin lurapxatapa;

12uk yatisasti, israelitanakax Siló chiqan tantacht'asipxäna jupanakampi nuwasir sarañataki.

13Nayraqatasti Eleazar sacerdoten Finees yuqaparuw Galaad uraqir sarañapataki khithapxäna, kawkintixa Rubén, Gad, ukhamarak Manasés ayllunkir chikat jaqinakapax ukankapkäna ukaru.

14Jupamp chikasti israelitanakan tunka aytat jilïrinakapaw sarapxäna, jupanakat sapa maynix, wila masi tamanakapan jilïripänwa.

15Galaad chiqaru purisinsti, jupanakarux sapxänwa:

16—Nanakax Tatitun markapan sutipxaruw arsupxta. ¿Kunatarak jumanakasti Israelan Diosapar ch'uxña lurapxtasti? ¿Kunatarak Tatitur apanukupxta, yaqha altar lurasa jupataki sayt'asipxtasti?

17¿Janit Peor chiqan jucha luratanakas layku Tatitun mutuyäwipa katuqatasa amtasipktasti? Uka jucha luratat janïraw jichhürkam q'umachatäktanti.

18¿Kunat juk'ampsa munasipkakta, jichhas jumanakan Tatitut saraqtapxañamatakixa? Jumanakatix jichhüru Tatitutaki sayt'asipxäta ukaxa, qharürux jupax taqpach Israel markatakix q'apisirakiniwa.

19Kawkïr uraqinaktix jumanakar wakt'apktam ukatix jan askïkchi ukaxa, Tatitun uraqipar jutapxam, kawkhantix Tatitumpi Jikisiñ utapax jikxataski ukawjaru, nanakan uraqinakax taypin mä chiqa katusipxarakim. Ukampis Tatitun altarap utjkipan, yaqha altar lurasax jan Tatiturux saykatapxamti, janirak nanakatakisa sayt'asipxamti.

20Zérah chachan Acán sat wawapat amtasipxam, jupax kunatix t'unjañat katuyatäkän ukanak katuntasisaw juchachasïna, jupan juchap laykuw Tatitux Israel markpachatakix q'apisïna. ¡Janirakiw jupa sapakis juchap laykux jiwkänti! —sasa.

21Ukat Rubén, Gad, ukhamarak Manasés ayllunkir chikat jaqinakapax Israel markan jilïrinakapar sapxäna:

22—Diosanakansa Diosapa Tatituw nanakar yatipxitu, aka altar lurapkta ukax janiw jupar saykatañatakïkiti janirakiw jupat armasiñatakïkisa. Tatituw yati, Israel markax yatirakpan; janitix ukhamäkchi ukax, ¡jichhpach jiwarayapxitpan!

23Nanakatix Tatitut jithiqtañatak mä altar lurapxstxa, jan ukax nakt'at waxt'äwinaka, waña juyranakat waxt'äwinaka, sumthapiñatak wilañcha luqtañatakïchi ukaxa, pachpa Tatituy nanakarux luräwinakaxat wayt'apxitpan.

24Chiqpachansa nanakax aka altar lurapxtwa qhipürun wawanakamax, nanakan wawanakaxaru jan saskañapataki: “¿Kuna lurañamaraki jumanakan utji, Israelan Tatitu Diosapampisti?

25Tatituw Jordán jawir mä qurpat uskuwayi Rubén, Gad ayllunkapkta ukanakata yaqha jakañataki, janiw jumanakan kuna lurañamas Tatitumpix utjkiti” sasa. Ukhamat wawanakamax juchanïspa wawanakaxan Tatitur jan axsartatapata.

26Ukat nanakax akan mä altar lurañaru uchasipxta, janiw kun nakt'ayañataki, uywanak Tatitur luqtañatakïkisa, janirakiw yaqha wilañchanak luqtañatakïkisa,

27jan ukasti, nanakampita, jumanakampita, ukhamarak jiwasat saraqir wawanakat qhanañchirïñapatakiwa, ukhamat jiwasax mayacht'ata Tatitur luqtañasataki, jupa nayraqatan nakt'at waxt'äwinakasampi, jucha luräwinakata, sumankthapiñ wilañchanakasampi uñstañataki. Ukhamat jumanakat saraqir wawanakamax, nanakan wawanakaxar jan sapkaniti: “Janiw jumanakan kuna lurañamas Tatitumpix utjkiti” sasa.

28Khititix nanakaru, jan ukax, wawanakaxarusa ukham sapxitaspa ukkhaxa, nanakax jupanakarux sapxiristwa: “Uñtapxam, nayra awkinakasaw aka altar Tatitutaki lurapxäna, janiw nakt'at waxt'äwinaka, wilañchanak luqtañatakïkiti, jan ukasti, nanakampita jumanakampita amtasiñataki mä uñacht'äwiwa” sasa.

29Tatitutak sayt'añ amuyusa, jupat saraqañ amuyusa nanakat jayankpan, janiw Tatitu Diosasan altarapat yaqha altara lurañax wakiskiti; nakt'at waxt'äwinaka, wilañchanak luqtañataki. Tatitu Diosasan altarapax, jupampi Jikisiñ Carpa nayraqatankiwa.

30Kunapachatix Finees sacerdotempi, uka tunka jilïr jaqinakampix uk qhanañchir ist'apkäna ukkhaxa, “walikiw” sapxänwa.

31Ukat Finees sacerdotex jupanakar säna:

—Jichhasti yattanwa, Tatitun jiwasanak taypinkaskatapa; jumanakax janirakiw Tatitutak sayt'asiñ amtapkatätati, ukhamat jichhax Tatitun mutuyäwipat Israel markax qhispita uñjasi —sasa.

32Ukanak qhipatsti, Finees sacerdotex, jupamp chika saririnakasa, jupanakar jaytasin Galaad chiqat Canaán uraqiruw kuttanxapxäna, kawkhankapkäntix israelitanakax ukkharu. Kunapachatix Canaán chiqankir israelitanakar taqi ukanak yatiyapxän ukkhaxa,

33israelit jaqinakax “walikiw” sapxänwa, ukatsti Tatituruw yupaychxapxäna. Ukat uksarusti, jupanakax Rubén, Gad ayllunakar katuntañat janiw juk'ampsa parlkxapxänti, janirakiw uraqinakap tukjañatsa.

34Rubén, Gad ayllunkirinakan wawanakapax uka altararux: “Amtasïwi” sasaw sutichapxäna, akham sasa: “Aka altarasti jiwasanakarux Diosax mä sapa Diosätapa amtayistani” sasa.