1 SAMUEL 20 - Qullan Arunaka DC

Jonatanax Davidaruw yanapt'i

1Davidasti Ramá markankir Naiot chiqat jaltxäna, kawkhankkäntix Jonatanax ukkharuw saräna, jupar sañataki:

—¿Kunarak lurtsti? ¿Kunas juchaxaxa? Awkiman nayraqatapansti, ¿kuna jucharak lurtsti nayar jiwayañatak thaqhañapatakisti? —sasa.

2Jonatanasti sarakïnwa:

—¡Tatitux jan munpati! ¡Janiw jiwaykätamti! Awkixax nayar jan yatiyasax janiw kunsa lurkaspati. ¿Kunatarak jumar jiwayañ jan yatiyitaspasti? ¡Janiw ukax ukhamäkaspati! —sasa.

3Ukampisa Davidax saskakïnwa:

—Awkimax askiw yati jumax nayar munatamxa, juman jan llakisiskañamatakisti janiw yatiñam munkaniti. ¡Ukampis nayax Tatitun sutipxaru, ukhamarak juman sutimxarus juramentompiw arsuraksma, jiwañaxas niyaw jak'anki! —sasa.

4Ukat Jonatanax jiskt'äna:

—¿Kunsa jumatakix lurirista? —sasa.

5Davidasti sarakïnwa:

—Qharürux machaq phaxsi phunchhäwi uruwa, nayasti reyimpi chika qunt'asis manq'asiñaxawa. Ukampis jurpüru jayp'ukama uka pampan imantasim sita,

6awkimatix nayat jiskt'asïtam ukkhaxa, Belén markaxaru nayan sarañaxatak jumar achikt'asitax yatiyam, khayansti taqpacha wila masixaw mara wilañcha luqtañ amtapxani, sasa.

7Jupatix “walikiwa” sanixa, nayatakix ukham satapax walikïniwa; ukampis jupatix phiñasini ukkhaxa, nayar jiwayañ munatap yatxäta.

8Ukhamax nayar yanapt'itaya, juman luqtirimätwa, ukhamarus Tatit nayraqatan jila masïñatakiw juramento lurtanxa. Jichhasti, nayan juchaxächi ukax juma kipka jiwayita. Janiw wakiskiti awkiman ukaru nayar irpañamaxa —sasa.

9Jonatanasti sarakïnwa:

—¡Jumax jan ukham lup'imti! Nayatix awkixan jumar jiwayañpun amtatap yatxatäxa, jank'akiw yatiyäma —sasa.

10Ukatsti Davidax jiskt'arakïnwa:

—¿Kunjämatsa yatirista awkiman nayar jiwayañ amtatapatxa? —sasa.

11Jonatanasti sarakïnwa:

—Jutam, pampar sarañäni —sasa.

Ukatsti panpachaniw pampar sarapxäna.

12Ukan Jonatanax Davidarux säna:

—Nayasti Israel markan Tatitu Diosapan sutipxaruw juramento lurta, qharürumpita jan ukax jurpürumpit yatxatä, aka pachpa horasaru kuntix awkixax amtki ukanaka. Jupan amtäwipatix jumatak walikïskani ukkhax yatiyxämawa.

13Ukampisa, awkixatix jumar jan wal lurañ amtanixa, ukat janirak juman jaltxañamatak yatiykäma ukkhaxa, Tatitux nayar mutuyitpan. ¡Tatituy jumarux yanappan kunjämtix awkixar yanapkän ukhama!

14Walikiwa, nayatix jakaskäxa, Tatitux kunjämtix jumar khuyapt'ayastamxa, uka kipka khuyapayasiñampi nayarux khuyapt'ayarakita. Jiwxästi,

15-16wila masixar khuyapt'ayañ janipun armasimti. ¡Tatituy uñisirinakamarux luräwinakapat wayt'pan, jan mayampitak jupanakar tukjarakpan! —sasa.

Ukhamwa Jonatanampi Davidampix mä amtäwir mantapxäna.

17Jonatanasti Davidaru taqi chuymampi munasitap laykux wasitat juramento lurarapïna.

18Ukatsti sarakïnwa:

—Qharürux machaq phaxsi phunchhäwi uruyañ uruwa, kunapachatix qunuñamax ch'usakïnixa, ukapachax tumpasipxätamwa.

19Ukampis kimsa uru qhipatsti juman ch'usasitamax qhanäniwa. Ukhamasti kawkharutix nayrürux imantaskta uka pachpar sarxam, ukatsti uka qalanak jak'ar imantasim.

20Nayasti kimsa mich'inak uksa tuqiru antutt'anï, mä chimpurus wakt'aykirista ukhama.

21Ukatsti uywataxaruw sarakï: “Uka mich'inak thaqtanim” sasa. Nayatix säxa: “Mich'inakax jumat akïrinkaskiwa; saram, apthapinxam” sasaxa, jumax jan kuna llakiniw mistunxäta, janirakiw kunas kamachkätamti. Aksti Tatitun sutipxaruw juramento lurarapsma.

22Ukampis nayatix säxa: “Mich'inakax juk'ampi khurinkiwa” sasaxa, jumax sarxam, Tatituw juman sarxañam munaraki.

23Jiwasax kuna amtäwtix purapat lurktan ukxa, Tatitukiw wiñayatak uñjistu —sasa.

24Davidasti pampan imantasiskäna, kunapachatix machaq phaxsi phunchhäwi uruyañ urux purinkän ukkhaxa, reyix manq'añatakiw quntasïna.

25Kawkhatix qunuñapäki ukkharuw pirqa jak'ar qunt'asïna. Jonatanasti uñkatasiparuw qunt'asïna, Abnerasti Saúl reyin maysa thiyaparuw qunt'asirakïna. Davidan qunuñapasti ch'usakïnwa.

26Uka urusti Saúl reyix janiw kunsa kamskänti, amuyupansti sänwa “Kuna jan wali q'añuchasïwiruw purpacha, ukat jichhax q'umachasiskpacha” sasa.

27Payïr uru phunchhäwïxän ukkhasti, Davidan qunuñapax ch'usakïskakïnwa. Ukat Saúl reyix Jonatán yuqaparux jiskt'äna:

—¿Kunatsa wasürux Jesé jaqin David yuqapax manq'äwiru jan jutki?, jichhürus janirakikiw jutkiti —sasa.

28Jonatanasti sarakïnwa:

—Davidax Belén markar jank'ak sarañatakiw achikt'asitu,

29jilapaw jupan markapar sarañapatak mayitayna. Davidasti wila masinakamp chikaw machaq phaxsi phunchhäwi uruyañ urun Belén markan mara waxt'äwi luqtani. Ukatakiw nayax saramay sista, ukat juma munañan reyimpi chikax manq'irix jan jutkiti —sasa.

30Ukatsti Saúl reyix Jonatanatakix walpun thithïna, sarakïnwa:

—¡Jan wali warmin wawapa! Nayax Davidar jaqkattatam yatïyätwa, ¡ukax jumatakisa, taykamatakis mä p'inqawa!

31Jupan aka uraqin jakañapkamax jumasa, marka apnaqañamasa janiw sum sayt'kaniti. ¡Ukhamax jupar thaqtir khitham, ukatsti irptanirapita, jupan jiwañapax wakisipuniwa! —sasa.

32Jonatanasti sarakïnwa:

—¿Kunatarak jiwaspasti? ¿Kuna jan walirak luristi? —sasa.

33Saúl reyisti Jonatanar jiwayañatakiw lanzap aytäna, ukampix Jonatanax awkipan Davidar jiwayañpun amtatap amuyäna.

34Ukatsti Jonatanax wali thithitaw kawkhantix qunt'atäkän ukkhat sartxäna, ukatsti qhipürux janiw uka manq'äwinkxänti, Davidat wal llakisïna, ukhamarak awkipan jupar chuyma ust'ayatapatsa.

35Qhipürusti, Jonatanax mä uywata waynampi chikt'ataw pampar saräna, ukatsti kawkhantix Davidampi jikisiñapäkän ukkharuw saräna,

36ukat uka waynarux sarakïna:

—Nayax kuna mich'inaktix antutt'kä ukanak thaqtiriw saräta —sasa.

Uywatasti jank'akiw jaläna, ukchañkamasti Jonatanax uka uywatat juk'ampi jayaruw yaqha mich'impi antutt'äna.

37Kunapachatix uywatax kawkharutix mich'ix purkatayna ukkhar purkäna ukkhaxa, Jonatanax taqi ch'amapampiw art'äna:

—¡Mich'ix jumat juk'ampi khurinkiwa! —sasa.

38Jonatanax mayampis uywatarux art'askakïnwa:

—¡Mäkiy jaltam, jan sayt'amti! —sasa.

Jonatanan uywatapasti mich'inak apthapinisax uywiriparuw katuyxäna,

39ukampisa janiw kunätapsa amuykänti, Jonatanampi, Davidampikiw uka amtäwi yatisipxäna.

40Ukatsti Jonatanax nuwasiñ yänakapxa uywataparuw churäna, ukatsti markar apxañapatakiw mayïna.

41Uywatan sarxatapatsti, Davidax imantaskän uka chiqat mistunïna, ukatsti Jonatanan nayraqatapar purisax kimsa kutiw uraqir ajanup puriyañkam alt'arakïna. Ukatsti jank'akiw jamp'att'asipxäna, panpachaniw jachapxäna, Davidan chuyma utt'ayasiñapkama.

42aUkatsti Jonatanax Davidarux sänwa:

—Jichhax sumak sarawayxam. Jumampi nayampix mä suma jila masïñatakiw Tatitun sutipxaru mä juramento lurtanxa. Tatitux yanapistpan, jiwasan wila masinakasarus aka juramento phuqhañatakix yanapt'arakpan —sasa.

42b 42b (1) Ukham sasinsti, Jonatanax markaruw kutt'awayxäna.