1 CRÓNICAS 15 - Qullan Arunaka DC

Davidan Jerusalén markar Diosan arcap apxatapa(2 S 6.12-23)

1David reyix Davidan Markapan utanak lurayäna, ukatsti Tatitun arcapatakix mä chiqawja wakicht'arakïna, mä carpa sayt'aykän ukkhana.

2Ukhamasti sänwa: “Janiw khitis levitanakat yaqhax Diosan arcap apañapäkiti, Tatituw jupanakarux arcap apañatak ajllisi, ukhamarak jupar wiñayatak luqtapxañapataki” sasa.

3Ukspachaw Davidax taqi israelitanakar Jerusalén markan tantacht'äna, kawkharutix jupax wakicht'kän ukkhar Tatitun arcap apañataki.

4Ukhamarakiw Aarón chachat saraqir wawanakaparu, levitanakarux tantacht'äna.

5Quehat chachat saraqir wawanakapax pä patak pä tunkaniw tantacht'asïna: Uriel, jilïr irpiri, jupanakan wila masinakapamp kuna.

6Merarí chachat saraqir wawanakapax patak pä tunkaniw tantacht'asïna: Asaías, jilïr irpiri, jupanakan wila masinakapamp kuna.

7Guersón chachat saraqir wawanakapax patak kimsa tunkaniw tantacht'asïna: Joel, jilïr irpiri, jupanakan wila masinakapamp kuna.

8Elisafán chachat saraqir wawanakapax pä patakaniw tantacht'asïna: Semaías, jilïr irpiri, jupanakan wila masinakapamp kuna.

9Hebrón chachat saraqir wawanakapax kimsaqallq tunkaniw tantacht'asïna: Eliel, jilïr irpiri, jupanakan wila masinakapamp kuna.

10Uziel chachat saraqir wawanakapax patak tunka payaniw tantacht'asïna: Aminadab, jilïr irpiri, jupanakan wila masinakapamp kuna.

11Ukatsti Davidax Sadoc, Abiatar sacerdotenakaru, Uriel, Asaías, Joel, Eliel, Aminadab levitanakampiruw jawsäna,

12jupanakarusti sänwa: “Jumanakax levitanakan wila masinak jilïrinakjamax kunatix phuqhañäki ukhamar q'umachasipxam, wila masinakamas q'umachasipxarakpan, ukhamat Israelan Tatit Diosapan arcap kawkharutix nayax wakichkta ukkhar aptanxapxañamataki;

13nayrïr kutin jan q'umachasipxatam laykusti, Tatitu Diosasax jiwasanakat yaqhiparux jakañ apaqi, kunjäm lurañäkitix ukhamar jan jiskt'asitas layku” sasa.

14Ukhamasti sacerdotenakampi, levitanakampix Israelan Tatit Diosan arcap aptanxañatakix phuqhañäki ukarjamaw q'umachasipxäna.

15Jupanakax lawanakat lurasaw kallachinakapxar apapxäna, kunjämtix Tatitux Moisesar siskatayna ukhamarjama.

16Davidax levitanakan jilïrinakaparux jupanak ayllunkirit q'uchurinak utt'ayañapatakiw mayirakïna, salterionakampi, arpanakampi, platillonakampi jupanakan sarapxañapataki, ukat kusisiñat wali sum toct'apxañapataki.

17Levitanakasti Joel chachan Hemán yuqaparuw utt'ayapxäna, ukhamarak Berequías chachan Asaf yuqaparu, jupasti Hemán chachan wila masipänwa; Merarí chachat saraqir wawanakapata, nayra wila masinakapatsti, Etán, Cusaías chachan yuqaparuw utt'ayapxäna;

18ukhamarus maynïr nayra wila masinakaparuw utt'ayapxäna, jupanakasti lurañanxa payïr tamankapxänwa: Zacarías, Jaaziel, Semiramot, Jehiel, Uní, Eliab, Benaías, Maaseías, Matatías, Elifelehu, Mecneías ukanakaru, ukatsti punku uñjirinaka: Obed-edom, Jeiel jupanakaru.

19Hemán, Asaf, Etán sat q'uchurinakax broncet lurat platillonak toct'añatak uchatäpxänwa.

20Zacarías, Aziel, Semiramot, Jehiel, Uní, Eliab, Maaseías, Benaías jupanakax salterionakap elamitanakjamaw toct'apxäna.

21Ukañkamasti Matatías, Elifelehu, Mecneías, Obed-edom, Jeiel, Azazías jupanakax arpanakap siminitanakjamaw q'uchunakan qalltap toct'apxäna.

22Quenanías sat levitanakan irpirinakapax apnaqañatak uchatänwa, jupanakaw sum yatipxatap laykux q'uchunak sarayañatakix uchatäpxäna.

23Arca uñjirinakasti, Berequías, Elcaná jupanakänwa.

24Sebanías, Josafat, Natanael, Amasai, Zacarías, Benaías, Eliézer sacerdotenakax Diosan arcap nayraqatan pututunak phust'irinakänwa. Obed-edom, Jehías jupanakax arca uñjirïpxarakïnwa.

25Ukhamasti Davidampi, Israelan chuyman awkinakampi, soldadonakan jilïrinakapampix kusisitaw Tatitun arust'äwi arcap Obed-edom chachan utapat aptir sarapxäna.

26Diosax levitanakaru arca apañ yanapatapatxa, jupanakax paqallq vaca qallunaka, paqallq urqu ovejanak wilañcha luqtapxäna.

27Davidasa, arca apapkän uka levitanakasa, q'uchurinakasa, arca apañ sarayir Quenanías sat chachas lino isimpi isthapitaw sarapxäna; ukhamarus Davidax linot lurat efod isimpi uskt'atänwa.

28Taqpach Israel markaw Tatitun arust'äwi arcap ukham apapxäna, kusisiñatsa wali jach'at arnaqasisa, ukhamarak pututunaka, trompetanaka, platillonaka, salterionaka, arpanak toct'asisa.

29Kunapachatix Tatitun arust'äwi arcap Jerusalén markar puriyapkän ukkhasti, Saúl chachan Mical sat phuchhapax reyi uta ventanaruw jak'achasïna; ukatsti David reyir wali k'uchik thuqhuskir uñjasax chuymapan wal jupar jisk'achäna.