ÉXODO 34 - Qullan Arunaka DC

Diosan wasitat qillqat kamachi arunakapa(Dt 10.1-5)

1Tatitusti Moisesar sänwa:

—Jichhasti nayrïr tablanakar uñtat pä qala tablanak wakicham, nayasti ukaruw qillqä jumax t'unjkta uka nayrïr tablanakxar qillqatäkän uka pachpa kamachinaka.

2Ukatsti Sinaí qullur arumanthi makhataniñatak wakichasirakim, ukat qullu patan nayar uñstitäta.

3Janiw khitis jumamp chikax makhataniñapäkiti, janiw khitis qullu jak'an sarnaqañapäkiti; janirakiw ovejanakasa, vacanakas qullu jak'an manq'añapäkiti —sasa.

4Moisesasti nayrïr tablanak kipkak qalat pä tablanak wakichäna. Qhipärmanthisti wali willjtat qalat lurat pä tablanak apxaruwayasin Sinaí qullur makhatäna, Tatitux siskatayna ukhamarjama.

5Ukatsti Tatitux qinayanjam saraqanïna, ukan Moisesamp parläna, jupan sutip arsusïna.

6Tatitusti Moisesan nayraqatap sarakipasin jach'at säna:

—¡Tatituwa! ¡Tatituwa! ¡Munasiri, khuyapayasir Diosawa. Janiw jank'ak q'apisirïkiti, jach'a munasiriwa, chiqarakiwa!

7Waranqa wawanakan wawanakapatakis pachpa chiqa aski munasiriwa, ñanqha luratanaksa, jan wali amtäwinaksa, juchanaksa pampachiwa; ukampis juchanirux mutuyapuniwa, awkinakan ñanqha luratanakapatxa, wawanakaparu, allchhinakaparu, allchhinakapan wawanakaparu, allchhinakapan allchhinakaparuw mutuyi —sasa.

8Moisesasti mäkiw killt'asïna parap uraqir puriyañkama, ukatsti Tatituruw yupaycharakïna:

9—¡Tatay! ¡Tatay! Chiqpachapun khuyapayasiñam jikxatsta ukax, nanakamp chikay saram. Chiqpachansa aka jaqinakax jan ist'asirïpxiwa, ukampis nanakan juchanakaxata, jan wali luratanakaxatsa pampachapxitaya, jumatakjam tukt'ayasay katuqt'asxapxita —sasa.

Wasitat lurat arust'äwi(Dt 7.1-5)

10Tatitusti Moisesar sänwa:

“Sum ist'am, taqpach markamampiw mä arust'äwi lurä. Jach'a muspharkañanak lurä, janiw kawkha uraqinsa, kawkha markansa ukhamax luraskänti. Jumanakax jakapkät uka markanakan taqi uka jaqinakaw uñjani kuntix naya, Israelan Tatitupax lurkä ukxa. Ukhamasti nayax jumanakatak lurkä ukanakax wali muspharkañäniwa.

11“Jichhür sapksma ukhamarjam phuqhapxam, nayasti jumanakan nayraqatamat jaqunukü: amorreonakaru, cananeonakaru, heteonakaru, ferezeonakaru, heveonakaru, jebuseonakaru.

12“Mantapkäta uka uraqin jakirinakampix janiw jumanakax kuna arust'äwsa lurapxätati, jupanakax jan walt'añaruw puriyapxiristam.

13Ukat sipana, jupanakan altaranakapsa, qalat lurat diosanakapsa t'unthapipxätawa, qullan lawanakapsa p'akthapipxarakïtawa.

14“Janipuniw yaqha diosanakarux yupaychapxätati, Tatitux janiw yaqhampïpxañam munkiti. Sutipasti jan yaqhampïñap muniri satawa.

15“Janiw kuna amtäwirus uka uraqin jakir jaqinakamp mantapxätati, jupanakax diosanakapar yupaychasina, wilañcha luqtatanak jumanakar churapxiristam, jumanakax uka diosanakar luqtat waxt'anak manq'apxarakisma,

16jan ukax, phuchhanakap jumanakan yuqanakamampiw jaqichapxaspa, ukatsti juchanak lurasa diosanakapar yupaychapxaspa ukapachasti, diosanakaparuw yuqanakamax yupaychapxarakispa.

17“Janipuniw jumanakax metal umatatayasin diosanak lurasipxätati.Sapa mara lurañ phunchhäwinaka(Ex 23.14-19; Dt 16.1-17)

18“Jan levaduran t'ant'a manq'añ uru uruyapxäta, nayax sapksma ukhamarjam paqallqu uruw jan levaduran t'ant'a manq'apxäta. Abib sat phaxsina, uka phaxsin Egipto markat mistunipxatam layku.

19“Jumanakan tayna yuqall wawanakamasti nayatakïniwa; vacanakamana, ovejanakamana, cabritonakaman tayna urqu qallunakapas nayatakïniwa.

20Ukampis qachu asnon tayna qallup lantxa, mä oveja, jan ukax mä cabrito churapxäta; jan churapkäta ukasti, uka asno qallurux kunkat q'iwinukupxäta. Ukxarusti jilïr wawanakamat mä suma waxt'a churapxarakïta. Ukhamasti janiw khitis nayan ukarux ch'usa amparak jutañapäkiti.

21“Suxta uruw irnaqapxäta, paqallqüri urusti samarapxätawa, satañ urunakansa, yapu apthapiñ pachanakansa.

22“Semananaka sata phunchhäwi uruyapxäta, trigon nayrïr achunakap apthapkasina, ukhamarak mara tukusi juyra apthapkasina.

23“Chachanakasti taqiniw maran kimsa kuti Israelan Tatit Diosap nayraqatan uñstapxani.

24Nayaw jumanakan nayraqatamat yaqha markanakar alisnukü, ukatsti jumanakan uraqinakam jach'aptayä. Ukhamat Tatit Diosamar maran kimsa kuti yupaychir sarapkäta ukkhakamax, jan khitis uraqinakam katuntasiñapataki.

25“Wilañcha luqtañatak jiwatäkani uka uywarux, janiw wilampi, levaduran t'ant'ampi apthapit luqtapxätati, janirakiw Pascuan wilañcha luqtatäki ukan jilt'anakapsa qhipärmanthitak imapxätati.

26“Ukxarusti uraqinakaman achuri nayrïr suma achunakapxa, Tatit Diosaman utaparuw apapxäta.

“Janiw cabrito aychxa taykapan lechepar qhathiyapxätati.”

Moisesax kamachi arunak qillqi

27Tatitusti Moisesar sänwa:

“Aka arunak qillqam, uka arunakampiw nayax jumampi, israelitanakampi arust'äwi lurta” sasa.

28Moisesasti Tatitump chikaw qullun qhiparäna, pusi tunka uru, pusi tunka aruma jan manq'ata, umas jan umt'ata. Ukan jupax qala tablanakxar arust'äwin arunakapa, tunka kamachinakäki uk qillqäna.

29Uka qhipatsti Moisesax Sinaí qullut saraqanxäna kamachi arunaka qillqat pä tablanak apt'asita; ukampis saraqankasax janiw jupax amuyaskänti ajanupan wali k'ajaskatapa, Tatitump parlanitap layku.

30Aaronampi, taqpach israelitanakampix Moisesan k'ajkir ajanup uñjasaxa, axsarayasipxänwa janiw jupar jak'achasiñ munapkänti.

31Moisesasti jupanakarux jawsänwa, ukatsti Aaronampi, israelitanakan jilïrinakapampix Moisesan ukaruw kutt'apxäna, Moisesasti jupanakampiw parläna.

32Uka qhipatsti taqpach israelitanakaw jak'achasipxäna, ukat Moisesax jupanakar yatiyäna kuna arunaktix Tatitux Sinaí qullun arskatayna taqi uka arunaka.

33Ukatsti israelitanakamp parlañ tukt'ayasinxa, mä isimpiw ajanup imt'asïna.

34Tatitun nayraqatapar jupamp parlir mantañatakix, Moisesax mistuniñapkamaw ajanupat uka isi apaqasïna. Mistunisinsti kuna arsüwinaktix Tatitut katuqkatayna ukanak israelitanakarux yatiyäna.

35Israelitanakasti Moisesan ajanup k'ajir uñjapxäna, ukat Moisesax ajanup wasitat imt'asxäna, Tatitump parlir wasitat mantañapkama.