2 REYES 1 - Qullan Arunaka DC

I. ELÍAS PROFETAMPI, ISRAEL MARKANKIR OCOZÍAS REYIMPI(1.1-18)Elías profetax Ocozías reyin jiwañap yatiyi

1Ahab reyin jiwxatap qhipatsti, Ocozías sat yuqapaw Israel marka apnaqxäna, ukapachasti Moab markax Israel markatakiw sayt'asïna.

2Mä urusti Ocozías reyix Samaria markan reyi utapan utjir alay ventanat jalaqtäna, jupasti wali chhuxriñchjataw jikxatasïna. Ukatsti jupax Ecrón markankir Baal-zebub sat diosapar jiskt'ayiriw khithanak khithäna: “Waliptxiristti, janicha” sasa.

3Ukampis Tatitun angelapaw Tisbé chiqankir Eliasarux säna: “Samariankir reyin khithatanakapar jikxatanim, jupanakar jiskt'arakim: ‘¿Janit Israelan Diosax utjki, Ecrón markankir Baal-zebub diosapar jiskt'asir sarasipkañamatakisti?’ ” sasa.

4Ukatsti sarakim, akham siw Tatituxa: “Naya, Tatituw Ocoziasarux sista: ‘Janiw ikiñamat sartkxätati, jiwxätawa’ ” sasa.

Eliasasti sarasin ukham luräna.

5Kunapachatix khithat jaqinakax reyin ukar kuttapkäna ukkhasti, reyix jupanakarux jiskt'änwa:

—¿Kunatarak kutt'anxapxtasti? —sasa.

6Jupanakasti ukxaruw sapxäna:

—Sarkiriruw mä chachax jikxatapxitu, ukat sapxitu: “Khithanipktam uka reyin ukar kuttapxam, jupar sapxarakim: ‘Akham siw Tatituxa: ¿Janit Israel markan Diosasti utjki, Ecronankir Baal-zebub diosar jiskt'ayir khithañamatakisti? Ukham luratamatsti, janiw ikiñamat sartkxätati, jiwxätawa’ ” —sasa.

7Reyisti jupanakar jiskt'änwa:

—¿Jikxatapktam uka chachasti kunjämänsa? —sasa.

8Jupanakasti ukxaruw sapxäna:

—Uka chachax t'awrarar isinïnwa, lip'ichit lurat wak'ampi wakt'atänwa —sasa.

Reyisti jach'at arsüna:

—¡Tisbé chiqankir Eliasarakisä! —sasa.

9Ukat ukspachaw jupax irptaniñapatak mä jilïrir khithäna phisqa tunka soldadonakampi. Puripkän ukkhasti, Eliasax mä qullu patan qunt'atäskänwa. Ukat capitanax jupar säna:

—¡Profeta, reyix: “Saraqanpan” sistamwa! —sasa.

10Eliasasti ukxaruw säna:

—Nayatix profetästa ukaxa, alaxpachat ninax saraqanpan, ukatsti jumampiru, phisqa tunka soldadomampir nakhantpan —sasa.

Ukatsti ukspachaw alaxpachat ninax saraqanisin jupanakar nakhantäna.

11Reyisti yaqha capitanaruw khitharakïna, phisqa tunka soldadompi, capitanasti Eliasar jikxatasin säna:

—¡Profeta, reyix, “Mäki saraqanpan” sistamwa! —sasa.

12Eliasasti sänwa:

—Nayatix profetästa ukaxa, alaxpachat ninax saraqanpan, ukatsti jumampiru, phisqa tunka soldadomampir nakhantpan —sasa.

Ukat ukspachaw alaxpachat ninax saraqanisin jupanakar nakhantäna.

13Uka qhipatsti reyix kimsïr kutin mä capitanar khithäna, yaqha phisqa tunka soldadonakampi. Uka kimsïr capitanasti purisin, Eliasax qunt'atäkän ukkhakamaw makhatäna, ukatsti jupa nayraqatan killt'asis achikt'asïna:

—Tatitun luqtiripa, nayan jakañaxatsa, aka phisqa tunka luqtirinakaman jakañapatsa khuyapt'ayasikimaya.

14Naya nayraqat jutir pä capitanampiru, jaqinakapamppachar alaxpachat ninax saraqanisin jupanakar nakhantatap yatta. Nayan jakañaxat khuyapt'ayasikitaya —sasa.

15Ukat Tatitun angelapax Eliasar säna: “Jupamp chik saram, jan jupar axsaramti” sasa.

Eliasasti saraqanisin capitanampiw reyin ukar saräna,

16purisasti reyir akham säna:

—Tatitux akham siwa: “Khithanak Ecronankir Baal-zebub sat diosar jiskt'ayasir khithatamata, Israelan janis Diosax jiskt'asiñatak utjkaspa ukham luratam laykux, ikiñamat janiw sartkxätati, jiwxätawa” —sasa.

17Ukhamapuniw Ocozías reyix jiwxäna, kunjämtix Tatitux Elías profeta tuqi siskatayna ukhamarjama. Ocozías reyix janiw mä wawanïkänsa, ukat Joram sat jilapax jupa lanti marka apnaqxäna. Ukasti Josafat chachan Joram yuqapax, payïri mara Judá marka apnaqkäna ukapachaw lurasïna.

18Ocozías reyin ukat ukxar sarnaqäwinakapampi, luräwinakapampix, Israelankir reyinakan luräwinakapa qillqatankiwa.