2 SAMUEL 8 - Qullan Arunaka DC

Davidan nuwasïwinakapxata(1 Cr 18.1-13)

1Uka qhipatsti, Davidax filisteonakaruw atipjäna. Jupanakarusti Meteg-hamá sat marka aparäna, munañaparuw jupanakar apnaqarakïna.

2Moabita jaqinakarux atipjarakïnwa, ukatsti uraqir siqiki liwirtayasaw jupanakar mä ch'ankhampi tupt'äna, khitinakatix pä tupu taypinkapkän ukanakarux jiwayänwa, mä tupu taypinkirinakarusti jakayänwa. Ukhamaw moabita jaqinakax Davidan apnaqat uñjasipxäna, qullqsa churapxarakïna.

3Davidasti Rehob jaqin Hadad-ézer yuqaparux atipjarakïnwa, Sobá uraqin reyiparu, kunapachatix uka reyix Éufrates jawir tuqi uraqi wasitat apnaqañampïkän ukapacha.

4Atipjasinsti Davidax waranqa paqallq patakan caballería soldadonak katuntanïna, pä tunka waranqa kayuk sarantir soldadonakampi; carronak qatatir caballonakat taqpacharuw kayunakap q'ala p'akiranïna, patak caballonakak jilt'ayanxäna.

5Ukatsti, Damasco markankir sirio jaqinakaw Sobá markan Hadad-ézer reyipar yanapt'ir purinipxäna, ukampis Davidax uka sirionakar atipjarakïnwa, jupanakat pä tunka payan waranqa jaqinakaruw jiwarayäna.

6Ukatsti Davidax Siria tuqin jank'akiw Damasco markarux uñjirinak uskurakïna, sirio jaqinakasti Davidan apnaqataw uñjasipxäna, juparuw qullqsa churapxarakïna. Tatitux Davidar ukham atipjayäna, kawkharutix sarkäna uka chiqanakana.

7Ukatsti Davidax, Hadad-ézer reyin jilïrinakapan apnaqañ quri jark'aqasiñanakap katuntasirakïna, ukanaksti Jerusalenaruw apxäna.

8Ukatsti Beta, Berotai sat markanakan walja bronce katuntasirakïna, uka markanakasti Hadad-ézer reyin markanakapänwa.

9Hamat markankir Toi reyisti, Davidan Hadad-ézer reyin ejercitopar ukham atipjatap yatisinxa,

10Joram yuqaparuw khithäna, David reyir aruntiri, jallallt'iri, Hadad-ézer reyir atipjatap layku, jupatakisti qullqita, qurita, broncet lurat yänak apayäna; Toi sat reyisti Hadad-ézer reyimpix ch'axwankarakitaynawa.

11Davidasti taqi uka yänak Tatituruw luqtäna, atipjkatayna uka yaqha markanakan quripampi, qullqipamp chika,

12Edom, Moab, Amón, Filistea, Amalec, Sobá markanakata, ukhamaraki kuntix Sobá markan reyiparu, Rehob reyin Hadad-ézer yuqapar apaqankatayna ukanakamppachata.

13Davidasti taqininsa wali uñt'ataw tukxäna. Mä urusti tunka kimsaqallqun waranqa edomita jaqinakaruw jiwayäna, Jayu Qhirwa satäki uka chiqana.

14Ukatsti Edom uraqpachan uñjirinak uskurakïna, edomita jaqinakasti Davidan apnaqataw uñjasïna, Tatituw Davidar taqi tuqin atipjayäna.

Davidan yanapirinakapa(2 S 20.23-26; 1 Cr 18.14-17)

15Davidax taqpach Israel marka apnaqäna, markachirinakarusti chiqa kankañampi, aski kankañampirakiw apnaqäna.

16Ejerciton jach'a jilïripax Seruiá jaqin Joab yuqapänwa; Ahilud jaqin Josafat yuqapasti reyin qillqiripänwa.

17Ahitob jaqin Sadoc yuqapampi, Abiatar jaqin Abimélec yuqapampisti sacerdotenakäpxänwa; Seraías jaqisti qillqirïnwa.

18Joiadá jaqin Benaías yuqapasti cereteo jaqinakaru, peleteo jaqinakar sarayirïnwa. David reyin yuqanakapasti sacerdotenakänwa.