ISAÍAS 48 - Qullan Arunaka DC

Tatitux machaq yatiyäwinak yatiyi

1“Jacobun wila masipa,

aka arunak ist'apxam,

jumax Israel suti aptaxa,

Judá chachat saraqirïtawa;

Tatitun sutipxaruw juramento lurtaxa;

Israelan Diosaparuw art'astaxa,

ukampis janiw chiqa chuymamax utjkiti,

janirakiw askïktasa;

2Jerusalén markan jakasirïtwa sistawa,

Israelan Diosaparuw iyawsta,

sutipasti taqi ch'amani Tatituwa, saraktawa.

3Nayratpach kunanakatix luraskän ukanak yatiysma,

kunjämtix yatiyapkäyäsma

ukhamapuniw phuqhasiwayi.

4Kunjämtix nayax juman jan ist'asirïtam yatkäyätxa,

mä fierror uñtat wali ch'ullqhïtawa,

broncer uñtata jan k'umt'kayätawa,

5janïra lurasiñapäki ukkhatpach

jumarux yatiysma.

Ukhamat jan saskañamataki:

‘kuna diostix lurasktxa ukaw ukham lurayi’ sasa.

6Jumatix sum amuyt'äta ukaxa,

chiqaw, sañamax wakisirakiwa.

Jichhax machaq yatiyäwinak yatiyäma,

kunanaktix jumax jan yatkäyäta ukanaka,

7ukanakax janiw nayratpach luratäkiti,

jan ukasti, jichha luratakiwa,

uka yänakxatsti janipuniw jichhakamax ist'käyätati.

Ukhamat jan saskañamataki: ‘Yatïyätwa’ sasa.

8Jumax janiw kunapachas ukanakat ist'käyätati, yatkarakïyätasa,

uqarapuniw ukanakatakix tuküyätaxa.

Nayax juman jan chiqa chuymanïtam yatïyätwa,

yurïwimatpach jan ist'asirit uñt'atätamsa.

9“Ukampis jumatakix llamp'u chuyma uskta.

Naya kipkaru yäqasawa

jumarux jan tukjkaraksmati.

10Nayaw jumarux q'uma tukuysma,

t'aqhisiñ tuqiw q'umachsma,

janiw qullqi katuqañ laykuti.

11Nayan jach'añchäwix laykuw ukham lurta,

sutixasti janiw takisitäkaspati.

Janirakiw nayar jach'añchañäki

uk yaqhar churaykäti.Tatitux markaparuw qhispiyani

12“Israel, Jacobun markapa, ist'ita,

nayaw jumarux jawssma:

Naya sapakiw Diosax utjta,

nayätwa qalltasa, tukuyasa.

13Amparaxampiw uraq sayt'ayta,

amparaxampiw alaxpach janatatta;

sutinakap arsta ukspachaw unxtañ qalltapxi.

14Ukhamax israelitanaka,

jichhax tantacht'asipxam, ist'apxarakim:

¿Khitis jumanakatxa

kunatix lurasiñapäkän uk yatiyixa?

Kawkïr jaqtix nayax ajlliskta ukaxa

Babiloniarux jan waliruw tukuyani,

caldeo jaqinakarus uka kipkarak lurani.

15Nayaw uk sista,

nayarakiw Ciro reyirux jawsasin jutayta,

jupasti luräwipan atipt'aniwa.

16Nayan ukaru jak'achasinipxam,

ukat ist'apxita:

Qalltatpach nayax janipuniw kunsa jamasat arskti;

kunapachatix taqi akanakax luraskän ukkhasti

nayax ukankaskäyätwa.

Jichhasti naya, Tatituw ch'amax churta,

nayarakiw Ciro reyirux khitta.”

17Qhispiyir Tatituma,

Israelan Qullan Diosapaxa, akham siwa:

“Nayätwa Tatitu Diosamaxa;

nayasti kunatix jumatak askïki uk yatichsma,

kawki thakhinjamtix sarañamäki ukanjam irparaksma.

18Nayan arunakaxarutix ist'asamäna ukaxa,

walt'añamax mä jawirar uñtataw jilxatasapäna,

atipjañamas jach'a qutan mathapinakapar uñtataw jilarasapäna,

19wawanakamasti waljanipunïsapänwa,

quta ch'allanakjam jan jakt'kayäspänwa;

janiw nayax kunäkipansa jumanakarux tukjkiriskäyätti,

nayraqataxatsa janirakiw jayar apanukkiriskäyätti.”

20Babiloniat mistunxapxam,

caldeonakatsti jaltanxapxam;

aka yatiyäwsti kusisiñampi arnaqt'asis yatiyapxam,

aka uraqi tukuskam yatiyapxam.

Sapxarakim: “Israel luqtiriparux Tatituw qhispiyi” sasa.

21Tatitux jumanakarux wasara chiqanjam irpanipxtam,

ukampis janiw umat pharjayasipktati;

jupax mä jach'a qarqa jaljasaw

jumanakatakix walja uma jalsuyi.

22Ukampisa, ñanqha jaqinakatakix janiw sumankañax utjkiti.

Ukham siw Tatituxa.