2 CRÓNICAS 17 - Qullan Arunaka DC

Josafat reyin Judá marka apnaqatapa

1Ukatsti Asá reyi lantix, Josafat yuqapaw Judá marka apnaqxäna, jupax Israel markatakix wali ch'amaniw tuküna.

2Judá uraqin utjir sayt'asiñatak wakichayat markanakaru, taqpach Judá uraqin soldado tamanak uskuntäna, ukhamaraki kawkïr markanaktix Asá awkipax Efraín uraqin katuntkatayna ukanakaru.

3Tatitux Josafat reyimpiskänwa, jupax kunjämtix qalltan David nayra awkipax lurkäna ukham luraskäna. Janiw Baal diosan lantinakaparux yupaychkänti,

4jan ukasti, awkipan Diosaparuw yupaychäna, jupan kamachi arunakapar phuqhasa, Israelankir jaqinakan sarnaqäwipar jan arkasa.

5Ukat Tatitux jupan markap apnaqañapatakix sum thuruñchäna. Judá uraqinkirinakasti taqiniw jupatak churäwinak apanipxäna, qamir kankañapasti jilarkirïnwa, wali aytatarakïnwa.

6Jupax jach'a kankañampiw Tatitun uñacht'ayat thakhin saräna, ukatsti wasitatampiw Judá uraqin qullu patanakan utjir idolonakar yupaychañ utanak tukjayäna, ukhamarak Astarté diosanaksa.

7Josafat reyix kimsa mara apnaqaskäna ukkhasti, jupax Ben-hail, Abdías, Zacarías, Natanael, Micaías uka jilïr yanapirinakaparuw Judá markanakan yatichapxañapatak khithäna,

8jupanakamp chiksti Semaías, Netanías, Zebadías, Asael, Semiramot, Jonatán, Adonías, Tobías, Tobadonías uka levitanakaruw khitharakïna. Elisamá, Joram sacerdotenakax jupanak chikaw sarapxarakïna.

9Jupanakarusti Tatitun kamachi qillqatapat Judá uraqinkir jaqinakar yatichapxañapatakiw khithäna. Jupanakasti Judá uraqinkir taqi markanakaruw puripxäna jaqinakar yatichasa.

10Ukchañkamasti, Judá markan jak'anakapankir markanakax Tatitur wal axsarapxäna, ukatsti janiw Josafat reyimpi nuwasiñ munapkänti.

11Filisteo jaqinakat yaqhipanakax, churäwinaka, ukhamarak qullqi Josafat reyitakix apanirapipxäna, árabe jaqinakasti, jupatakix paqallq waranqa paqallq patakani urqu ovejanaka, cabritonakatsa mä ukkharak aparapipxäna.

12Josafat reyix, juk'amp munañaniw tukxäna. Judá uraqinsti nuwasiñ utanaka, ukhamaraki manq'añanak imañ markanakamp lurayäna,

13Judá markanakansti walja uraqinakanïnwa. Jerusalén markansti nuwasiñatak jan axsarir soldadonakapaw utjarakïna,

14jupanakan sutinakapasti wila masi tamata qillqatarjamax akanakänwa:

Judá ayllunkiritxa: Adná, jupax kimsa patak waranqa soldadonakan jilïripänwa.

15Johanán, pä pataka kimsaqallq tunka waranqa soldadonakan jilïripänwa,

16Zicrí chachan Amasías yuqapa, jupax chuymapatjam Tatitur luqtañatak katuyasitayna, jupasti pä pataka waranqa soldadonak apnaqiri jilïrïnwa.

17Benjamín ayllunkiritxa: Eliadá, jupax mich'inak antutt'añampi, jark'aqasiñanakampi wakicht'ata, pä patak waranqa soldadonakan jilïripänwa,

18ukatsti Jozabad, jupax nuwasiñatak wakicht'ata, patak kimsaqallq tunka waranqa soldadonakan jilïripänwa.

19Taqi uka chachanakasti, reyir luqtirinakänwa, khitinakatix Judá uraqpachan nuwasiñatak wakichat markanakar khithatäkän ukanakax janiw uka jaqinak taypin jakhutäpkänti.