2 SAMUEL 11 - Qullan Arunaka DC

David reyimpi, Betsabé warmimpi

1Mä urusti, reyinakax nuwasïwir sarantapxirïkän uka urunak purinkipan, Davidax Joab chachar khithäna, jilïrinakampiru, taqpach israelita ejercitompiru, amonita jaqinakamp nuwasipxañapataki, ukampis jupax Jerusalén markan qhiparäna. Joab chachampi, taqi jaqinakapampisti, amonitanakarux tukjapxänwa, ukatsti Rabá sat marka katuntapxarakïna.

2-4Mä jayp'usti, Davidax ikiñapat sartasin reyi uta terrazan sarnaqaskäna, ukatsti akatjamat mä wali suma uñnaqt'an warmir jarisiskir uñjäna. Uka warmisti ukkhakiw phaxsi wilapat q'umachasiskatayna. Davidasti uka warmit yatxatañ munasaw mayni uywatapar khithäna. Uywatasti kuttanisin yatiyxarakïnwa, uka warmin Betsabé sutinïtapa, Eliam jaqin phuchhapätapa, ukhamarak Urías sat mä hitita jaqin warmipätapa. Ukhamasti Davidax mayni jaqinak khithasin uka warmir irptayasinïna, ukatsti jupampiw ikintäna; uka qhipatsti warmix utaparuw kuttawayxäna.

5Ukatsti Betsabé warmix usur jaqiptänwa; ukham usurïxasinsti Davidaruw yatiyäna.

6Ukatsti Davidax Joab chacharuw aka iwxa apayäna: “Urías hitita jaqir khithanita” sasa, Joab chachasti ukhamarjamaw phuqhäna.

7Urías chachax Davidan ukar purkän ukapachasti, Davidax Joab chachampita, soldadonakampita, nuwasïwinakampit jupar jiskt'äna.

8Ukatsti utapan samart'añapatakiw khitxäna.

Uriasax reyin utapat mistuwayxäna uka qhipatpach Davidax mä suma manq'a jupar apayäna mä churäwïkaspas ukhama.

9Ukampis Urías chachax utapar sarkamayaxa, reyin utap punkun uñjiri soldadonakamp chikaw uka arumax qhantatïna.

10Qhipürusti Urías chachan utapar jan saratap Davidar yatiyxapxäna, uk yatisinsti, Davidax jupar jawsayasin jiskt'äna:

—¿Kunatarak utamar jan sarkta, uka jayat jutasinsti? —sasa.

11Uriasasti sänwa:

—Jan wal lurirista utaxar sarasaxa, ukchañkamasti Tatitun arcapasa, israelita soldadonakas nuwasïwi pampankasipkani, ¿ukham uñjkasati nayax utaxar manqt'asiri, umt'asiri, warmixamp ikintasiri sarästi? ¡Juma jach'a reyin jakañam laykuw sista, janipuniw nayax ukham lurkiristti! —sasa.

12Ukat Davidax Uriasar sarakïna:

—Ukhamasti jichhürux akar qhiparam, arumanthiw nuwasïwir kuttawayxäta —sasa.

Ukhamaw Uriasax Jerusalén markan qhipürkam qhiparäna.

13Davidasti jupan manq'äwiparuw jawsayäna, ukatsti machjayañkamaw umayarakïna. Ukhamäkasasa, Uriasax janiw utapar sarkänti, jan ukasti wasitat uka arumax reyin utap uñjir soldadonakamp chik qhantatïna.

14Qhipärmanthisti, Davidax Joab chachatakiw qillqäna, uka qillqatsti pachpa Urías chachampiw apayarakïna.

15Uka qillqatansti akham sänwa: “Urías chacharux nayräx siqirupun uchapxam, kawkhantix nuwasiñax wali ch'amäki uka chiqaru, ukatsti sapak apanukupxam jupar jiwayapxañapataki” sasa.

16Ukhamaw Joab chachax ejercitopamp Rabá markar katuntañatak muyuntkän ukapachax, Urías chacharux kawkhankkäntix uñisirinakan wali ch'amani soldadonakapax ukkharuw nuwasiñapatak usküna,

17marka arxatirinakax Joab chachan jaqinakapamp nuwasiriw mistunipxäna, Davidan jilïrinakapatsti mä qawqhanix jiwaqapxänwa, ukanak chikaw Urías hitita jaqix jiwarakïna.

18Joab chachasti Davidarux kunjamäkäntix nuwasïwix uka tuqit wali sum yatiyäna,

19uka yatiyäwi apirirusti akham iwxarakïna: “Nuwasïwi tuqit reyir yatiyañ tukuykäta ukapachasti,

20inas reyix mayjt'asisin jiskt'iristam: ‘¿Kunatarak uka markar katuntasasti sinti jak'ar makhatapxtasti? ¿Janit yatipkta jupanakax pirqatpach kunanakampis jaqt'anirïtapxa,

21kunjämatix Tebés markan mä warmix Jeroboset chachan Abimélec yuqaparu pirqatpach mä molino qala antutanisin jiwaykän ukxa? ¿Kunatarak sinti pirqa jak'ar makhatapxtasti?’ sasa. Ukxaruw jumax sarakïta: ‘Juma jach'a reyin jilïr yanapir Urías hitita jaqis jiwatarakiwa’ ” sasa.

22Ukat uka khithat jaqix saräna, purisinsti kuntix Joab chachax siskatayna taqi ukanak Davidar yatiyäna. Davidasti, chiq sasaw Joab chachatakix walpun mayjt'asïna, ukat khithat jaqirux sarakïna:

—¿Kunatarak uka markar katuntasasti sinti jak'ar makhatapxtasti? ¿Janit yatipkta jupanakax pirqatpach kunanakampis jaqt'anirïtapxa, kunjämatix Tebés markan mä warmix Jeroboset chachan Abimélec yuqaparu pirqatpacha mä molino qala antutanisin jiwaykän ukxa? ¿Kunatarak sinti pirqa jak'ar makhatapxtasti? —sasa.

23Khithat jaqisti ukxaruw Davidar sarakïna:

—Nanakampi nuwasir mistunipkän uka soldadonakax atipjasipkitänwa, ukampis nanakax marka punkukamaw jupanakarux kutt'ayapxta.

24Ukapachaw mich'inak antutt'irinakax marka pirqatpach mich'inakap antutt'anipxitu, ukat jiwasan mä qawqha jilïrinakasax jiwari, jupanak chikasti Urías hitita jaqis jiwarakiwa —sasa.

25Ukat Davidax khithat jaqirux säna:

—Jichhax Joab chachar sarakim jan akanak tuqit sinti llakispati, nuwasïwinxa khitis jiwakispawa. Ukampis t'unjañkam wali ch'amampi markar katuntpan. Jumasti ch'amañchätawa —sasa.

26Uriasan warmipasti, chachapan jiwatap yatisin wali llakt'ataw uñjasïna;

27llaki urunak phuqhasxipansti, Davidax uka warmir irptayanïnwa, ukatsti reyi utaparuw katuqxäna, jupampiw jaqichasirakïna, uka qhipatsti uka warmix mä yuqall wawa wawachasïna. Ukampis Davidan uka luratapax janiw Tatitutakix askïkänti.