1 CRÓNICAS 11 - Qullan Arunaka DC

Davidax Israel markampina, Judá markampin reyipawa(2 S 5.1-5)

1Taqi israelitanakaw tantacht'asipxäna, ukatsti Hebrón chiqan Davidampi parliriw sarapxäna. Ukawjansti juparux sapxänwa: “Nanakax juman wila masimat saraqirïpxtwa,

2chiqpachansa Saúl chachax reyikchïna ukasa, jumaw Israel markan irpiripäyäta. Ukhamarus Tatitu Diosamaw saraktam, jumaw Israel markapar irpäta, apnaqarakïta” sasa.

3Ukhamaw Israel markan jilïr jaqinakax Hebrón chiqar David reyimpi parlir sarapxäna, Tatitun nayraqatapansti, Davidampix mä arust'äwi lurapxäna. Ukatsti Davidarux Israel marka apnaqiripat utt'ayapxäna, kunjämtix Diosax Samuel tuqi arskän ukhamaru.

Davidan Jerusalén marka katuntatapa(2 S 5.6-10)

4Davidampi taqi israelitanakampix Jebús sat Jerusalén markaruw sarapxäna. Jebuseonakaw uka chiqan jakapxäna,

5Davidarusti sapxänwa: “Jumax janiw aka markar mantkasmati” sasa. Ukampis Davidax jach'a uyun Sión marka katuntasïna, uka markax jichhax Davidan markapat uñt'atawa.

6Davidasti sataynawa: “Khititix jebuseonakar nayraqat katuntkani juparuw jach'a jilïrit utt'ayä” sasa. Ukatsti Seruiá chachan Joab yuqapaw nayraqat katuntäna, ukat jupax jilïrit utt'ayatäxäna.

7Ukatsti Davidax uka jach'a uyun Sión markan utt'asïna; ukat “Davidan markapa” sas sutichapxäna.

8Davidasti muytpacharuw markanak sayt'ayi, laq'amp phuqhantatäki uka chiqat marka muyt'pacharu. Joab chachasti yaqhip markanak machaqat sayt'ayäna.

9Davidan munañanïñ kankañapax yapxattaskakïnwa, taqi ch'aman Tatitusti jupampïskarakïnwa.

Davidan ejercitopan atipjir chachanaka(2 S 23.8-39)

10Akanakaw Davidan aytat jilïr soldadonakapaxa, jupanakaw marka apnaqañ yanapapxäna, israelitanakampi mayacht'asisax reyit uskt'apxäna, kunjämatix Tatitux Israelar markar siskän ukhamaru.

11Davidan nayrankir soldadonakapan sutinakapax akanakänwa: Hacmoní, Jasobeam chachan yuqapa, kimsa jan axsarir chachanakan irpiripa, mä kutix lanzapampiw kimsa patak jaqinak jiwarayäna.

12Jupxarusti Eleazar, ahohíta Dodó chachan yuqapa, jupax kimsa jan axsarir chachanakat maynïrïnwa.

13Jupax Pas-damim chiqan Davidampïskänwa, filisteonakax ukawjaruw nuwasiñatak tantachasipxäna. Ukawjansti cebada yapuw utjäna, kunapachatix israelita tamax filisteonakat jaltxapxän ukkhaxa,

14jupax yapu taypiruw sayt'asïna, ukatsti filisteonakar atipjasaw arxatäna. Ukhamaw Tatitux jupanakar atipt'ayäna.

15Mä kutixa, kimsa tunka jan axsarir jaqinakat kimsaniw qarqa chiqar sarapxäna, Adulam sat putun Davidamp jikisiri. Filisteonakan campamentopax Refaim qhirwankänwa.

16Davidax Adulam sat imantasiñ putunkaskänwa, ukañkamasti filisteo soldadonakax Belén markankarakïnwa.

17Davidax akham sasaw arsüna: “¡Khitikis Belén mantañankki uka phuch'un umap umt'ayitaspa!” sasa.

18Ukatsti kimspach jan axsarir chachanakaw filisteonakan campamentopar mantapxäna, ukatsti Belén markar mantañankki uka phuch'ut uma apsunisin Davidan ukaruw apanipxäna. Ukampis Davidax janiw umt'añ munkänti, jan ukasti, Tatitutakiw mä waxt'äwjam waranuküna,

19akham sasa: “¡Diosax aka uma nayan umt'añax jan munkpati! ¡Aka jaqinakan wilapsa umt'kirista ukhamäspawa, jupanakax jan axsart'asaw uma aptirix sarapxi!” sasa. Ukatsti jupax janiw umt'añ munkänti.

Uka kimsa jan axsarir chachanakaw ukham lurapxäna.

20Abisai, Joab chachan jilapa, jupax kimsa tunka jan axsarir jaqinakan irpiripänwa. Mä kutix kimsa patak jaqinakar katuntasaw lanzapamp jiwarayäna. Ukhamat uka kimsa tunka jaqinak taypin wali jach'at uñt'ayasïna,

21jupanakat sipansa juk'amp jach'añchäwi katuqäna, ukatsti jupanakan jilïripaw tukxäna. Ukampis janiw nayrïr kimsa chachanakjamäkänti.

22Benaía, Cabseel markankir Joiadá chachan yuqapax jan axsarir jaqïnwa, jupax wali jach'a luräwinak lurir jaqïnwa. Jupaw Moab chiqankir Ariel chachan pani yuqanakaparux jiwayäna. Mä urux khunuskän ukkhax mä puturuw mantäna, uka manqhansti mä leonaruw jiwayäna.

23Ukhamarakiw mä jach'a tansa egipcio jaqirus jiwayäna, uka jaqix niya pä metro chikatanjamänwa, lanzapas mä telaran lawapjam wali jach'arakïnwa. Benaías chachax mä lawampiw jawq'antäna, lanzap aparasax pachpa lanzapampiw jiwayäna.

24Benaías, Joiadá chachan yuqaparux uka luratapaw kimsa tunka jan axsarir jaqinak taypin wali jach'ar tukuyäna,

25ukatsti jupanakat sipan juk'amp jach'añchäwi katuqäna, ukampis janiw nayrïr kimsa chachanakampix kikipt'känti. Ukatsti Davidax jupar uñjir chachanakan jilïripat utt'ayäna.

26Jan axsarir chachanakax akanakänwa: Asael, Joab chachan jilapa; Elhanán, Belenankir Dodó chachan yuqapa;

27Harod chiqankir Samot; Heles, pelonita chacha;

28Irá, Tecoa chiqankir Iqués chachan yuqapa; Anatot chiqankir Abiézer;

29Husá chiqankir Sibecai; Ilai, ahohíta chacha;

30Netofá chiqankir Maharai; Héled, Baaná chachan yuqapa, Netofá chiqankiriraki;

31Itai, Guibeá chiqankir Ribai chachan yuqapa, ukax Benjamín uraqinkiwa; Piratón chiqankir Benaías;

32Gaas jawir chiqankir Hurai; Abiel, arbatita chacha;

33Bahurim chiqankir Asmávet; Eliahbá saalbonita chacha;

34Jasén, guizonita chachan yuqanakapa; Jonatán, ararita Sagué chachan yuqapa;

35Ahiam, Sacar chachan yuqapa, araritaraki; Elifal, Ur chachan yuqapa;

36Héfer, mequeratita chacha; Ahías, pelonita chacha;

37Carmel chiqankir Hesrai; Naarai, Esbai chachan yuqapa;

38Joel, Natán chachan jilapa; Mibhar, Hagrai chachan yuqapa;

39Sélec, amonita jaqi; Berot chiqankir Naharai, Joab chachan nuwasiñan yanapiripa, Seruiá chachan yuqapa;

40Irá, Gareb, Jatir chiqankirinaka;

41Urías, hitita jaqi; Zabad, Ahlai chachan yuqapa;

42Adiná, rubenita Sizá chachan yuqapa, jupax rubenitanakan irpiripawa, kimsa tunka chachanakaw jupampïna.

43Hanán, Maacá chachan yuqapa; mitnita chiqankir Josafat;

44Astarot chiqankir Ozías; Samá, Jehiel, Aroer chiqankir Hotam chachan yuqanakapa;

45Jediael, Simrí chachan yuqapa, jupan Johá jilapa, tizita jaqi;

46Mahanaim chiqankir Eliel; Jerebai, Josavía, Elnáam chachan yuqanakapa; moabita Itmá ukampi;

47Sobá chiqankir Eliel, Obed, Jaasiel jupanaka.