JOSUÉ 10 - Qullan Arunaka DC

Israelitanakax amorreonakaruw atipji

1-2Jerusalenan Adonisédec sat reyipax Josué chachan Ai markaru, reyipampiru katuntasin q'al tukjatapa, ukatsti uka markaru kunjämtix Jericó markaru, reyiparusa nayrax lurkatayna uka kipka luratapa, ukhamarak gabaonita jaqinakan israelitanakampi sumar mantxapxatapa, jupanak taypin jakapxatapsa yatïna ukkhax wal axsarayasïna. Juk'ampisa gabaonita jaqinakan jupanak taypin jakatapaw wal axsarayäna, Gabaón markax wali aytat markänwa, Ai markat sipan juk'ampi jach'araki, maynïr markanakjam reyiniraki, jaqinakapasti nuwasiñatakix jan axsaririnakänwa.

3Ukat Adonisédec reyix yatiyäwi apayäna Hebrón markan Hoham reyiparu, Jarmut markan Piram reyiparu, Laquis markan Jafía reyiparu, Eglón markan Debir reyiparu akham sasa:

4“Nayan ukar jutapxam, ukatsti gabaonitanakamp nuwasiñ yanapt'apxita, jupanakax Josué chachampi israelitanakampiw mä arust'äwir mantapxatayna” sasa.

5Ukhamasti Jerusalén, Hebrón, Jarmut, Laquis, Eglón uka phisqa markanakan amorreo reyinakapax mayacht'asipxänwa, ukatsti ejercitonakapampiw sarantapxäna, Gabaón markar muyuntas katuntañataki.

6Gabaón markan jakirinakasti Josué chachan Guilgal chiqankki uka campamentonkkipan mä yatiyäwi apayapxäna, akham sasa: “Janikiy janiw sapxistati luqtirinakamar yanapt'añxa. Nanakar yanapt'iri, arxatirix mäkiy jutam, qullunakankir amorreo reyinakaw mayacht'asipxi nanakar katuntañataki” sasa.

7Ukatsti Josué chachax jan axsarir soldadonakapampiw Guilgal chiqat mistuwayäna,

8Tatitusti Josué chacharux sänwa: “Jan jupanakar axsaramti, nayaw amparamar katuyaskäma, janirakiw jupanakat khitis saykatkätamti” sasa.

9Josué chachax Guilgal chiqat mistuwayäna, aruma sarantasax akatjamat amorreonakarux katuntäna.

10Tatituw jupanakarux israelitanakan nayraqatapan wal mulljasiyäna, ukhamaw Josué chachax Gabaón chiqan waljanir jiwarayäna. Ukatsti jupanakarux Bet-horón thakhinjam arktäna, amorreonakar jiwarayasa Azecá, Maquedá markanakar puriñkama.

11Amorreonakax israelitanakat jaltxasin Bet-horón sat aynacha jalaqasipkän ukkhasti, Tatitux chhijchhir uñtat jach'a qalanak jupanakxar puriyäna, ukanakasti israelitanakan espadanakapamp jiwarayañat sipansa, juk'amp walja amorreo jaqinakaruw jiwarayäna.

12Kunapachatix Tatitux amorreonakar israelitanakan amparapar katuyxän ukkhaxa, Josué chachax marka nayraqatan Tatiturux parlxayäna, akham sasa:

“Jumasti inti, Gabaón marka patar sayt'am;

phaxsi, Aialón qhirwa patar sayt'am” sasa.

13Intimpi phaxsimpisti sayt'änwa,

Israel markax uñisirinakapat phuqsusipkän ukkhakama.

Chiqa jaqin qillqatapan akham siwa: “Intix chika alaxpachan sayt'äna, niya mä urjamaw jan unxtkänti” sasa.

14Uka urur uñtatax janipuniw utjkänti, janirakiw jichhas utjkaniti, kunjämtix Tatitux uka urun mä jaqin mayisitaparu jayskäna ukhamxa, Tatituw Israel markar arxatasa nuwasiskäna.

15Ukatsti Josué chachampi israelitanakampix Guilgal chiqankki uka campamentoruw kuttanxapxäna,

16uka phisqa reyinakax jaltxapxänwa, ukatsti Maquedá chiqan utjir mä puturuw imantasipxäna.

17Ukampisa, reyinakan uka putunkaskatap Josué chacharux yatiyapxäna.

18Ukat Josué chachax jaqinakar khithäna akham sasa: “Jumanakax uka putun mantañapawjkam qalanak qurumt'ayapxam, ukatsti atintapxam, putu mantañar uñjirinak uskupxam.

19Ukchañkamasti, jumanakax jan ukhamak ukan qhiparapxamti, uñisirin qhipapat arktasin katuntapxam, janirak markanakaparux kuttayapxamti, Tatitu Diosamaw jumanakarux amparanakamaru katuyapxtam” sasa.

20Kunapachatix Josué chachampi israelitanakampix amorreonakar q'alpun atipjas waljanir jiwarayapkän ukkhaxa, amorreonakat jilt'irinakax markanakaparuw imantasipxäna.

21Ukampis Israel markax jan kuna kamacht'ataw Maquedá chiqankir campamentor kuttxäna, kawkhankkäntix Josué chachax ukawjaru. Ukatsti janiw khitis kuna jan walinaksa israelitanakataki parlkxänti.

22Ukatsti Josué chachax sänwa: “Uka putu mantañ atiqapxam, ukatsti uka phisqa reyinakar irpsunipxam” sasa.

23Israelitanakasti ukham lurapxäna, ukatsti Jerusalén, Hebrón, Jarmut, Laquis, Eglón markanakan reyinakaparuw uka putut irpsunipxäna.

24Kunapachatix Josué chachan nayraqatapar puriyanipkän ukkhaxa, Josué chachax israelankir taqi chachanakaruw jawsäna, ukatsti ejerciton jilïrinakaparux sänwa: “Jak'achasinipxam, ukatsti aka reyinakarux kunkat takxatapxam” sasa. Jupanakasti ukham lurapxäna,

25ukatsti Josué chachax jupanakarux sänwa: “Jan axsarapxamti, janirak ch'amsa jiwt'ayasipxamti; jan ukasti wali ch'aman sayt'asipxam, Tatitusti jumanakan taqi uñisirinakamarux uka kipka lurarakini” sasa.

26Uk arsusinsti Josué chachax uka reyinakaruw jiwarayäna, ukatsti sapa mayniruw mä quqar warkkatayäna, ukan jayp'ukam warkut uñjasipxäna.

27Kunapachatix intix niya jalantañampïxän ukkhasti, Josué chachax jaqinak khithäna, uka quqanakat apaqanipxañapataki, ukatsti kawkha putuntix imantasipkatayna uka pachpa puturuw jaquntayanïna. Uka putu mantañapsti jach'a qalanakampiw atkatayäna, ukanakasti jichhürkamaw ukankaski.

Yaqha markanakamp katuntapxatapa

28Uka pachpa urusti, Josué chachax Maquedá markar katuntasax q'alpun tukjäna; uka markan jakirinakarux espadampkamaw jiwarayäna, janirakiw maynis jakkänti. Maquedá markankir reyiparux kunjämtix Jericó markankiri reyirux lurkatayna uka kipkarak luräna.

29Uka chiqatsti, Josué chachampi israelitanakampix Libná sat markaruw nuwantir sarapxäna.

30Tatituw uka markampi, reyipampirux jupanakar katuyäna. Taqinipuniw jiwarat uñjasipxäna, Libná markankir reyiparux kunjämtix Jericó markan reyiparux lurkatayna uka kipkarak luräna.

31Ukatsti Josué chachampi israelitanakampix Libná chiqat Laquis markaruw sarapxäna, uka markar muyuntasasti katuntapxänwa.

32Pä uru qhipatsti Tatitux Laquis marka jupanakar katuyäna, ukatsti kunjämtix Libná markan lurapkatayna ukhamarak israelitanakax taqi jaqinakaru, ukan utjir uywanakarux espadampkamaw jiwarayapxäna.

33Guézer markankir Horam reyix ejercitopampiw Laquis markar arxatirix mistüna, ukampis Josué chachax jupar atipjänwa, taqiniruw jiwarayäna.

34Ukatsti Josué chachampi israelitanakampix Laquis chiqat Eglón markaruw sarxapxäna, uka markar muyuntasinsti katuntapxänwa.

35Uka pachpa uruw uka marka katuntapxäna, ukatsti ukan jakirinakarux espadampkamaw taqinir jiwarayapxäna, kunjämtix Laquis markar lurapkatayna ukham q'alpun tukjasa.

36Eglón chiqatsti Hebrón markaruw sarapxäna, uka markarusti nuwantapxarakïnwa.

37Kunapachatix katuntxapxän ukkhaxa, q'alpun tukjapxäna, ukatsti reyiru, taqi jaqinakaru, ukan utjir uywanakaru, uka jak'an jakir jaqinakarus espadampkamaw jiwarayapxäna, kunjämtix Eglón markar lurapkatayna ukhama.

38Uka chiqatsti, Josué chachampi israelitanakampix Debir sat markaruw sarapxäna, uka markarusti nuwantapxarakïnwa,

39reyiparu, uka jak'an jakir jaqinakar espadampkam jiwarayasa. Debir markankirinakax jan mayniniw jiwarapxäna; Josué chachax taqinirupuniw tukjäna, kunjämtix Hebrón, Libná markanakaru reyinakapampiru lurkatayna ukhama.

40Ukhamaw Josué chachax taqi uka uraqinak katuntasïna. Jupax Négueb qullunkiri, pampankiri, amstankir reyinakaruw atipjäna. Taqpun tukjäna, taqiniruw jiwarayarakïna; janiw ukat jilt'irix kunas utjkänti, janirakiw maynis jakkänti, kunjämtix Israelan Tatit Diosapax jupar siskatayna ukhamaru phuqhasa.

41-42Josué chachax mä kutinak reyinakarux atipjäna, ukatsti uraqinakap Cadés-barnea, Gaza, Gosen chiqata, Gabaón markakamaw katuntasïna, Israelan Tatitu Diosapaw israelitanakat arxatasax nuwasiskäna, uka layku.

43Ukatsti Josué chachax taqi israelitanakampi Guilgal chiqankki uka campamentor kuttxäna.