1Salomonax reyi utap luräna, uksti taqi phuqhatpach tunka kimsan maran tukuyäna.
2Ukxarusti “Bosque del Líbano” sat jach'a uta lurarakïna, ukasti sayt'urux pusi tunka phisqan metronïnwa, iranarusti pä tunka payan metro chikatani, alayarusti tunka kimsan metro chikatanirakïnwa, ukasti pusi siqi sayt'ayata cedro lawanakampi apxäsitänwa, cedro lawat lurat q'irunakax ukanakxar takxatatarakïnwa.
3Uka q'iru lawanakasti pusi tunka phisqanïnwa, ukasti tunka phisqankam jaljatänwa, ukanakasti uka sayiri lawanakar takxatayatänwa. Uka q'iru lawanakasti cedro lawata k'achachatanakampi luratänwa.
4Ukxarusti kimsa siqi ventananakaw utjäna, uñkatasit pura uchatänwa.
5Taqi punkunakampi, ventananakampisti pusi tuqirux mä tupunikïnwa, ukanakasti, purapat uñkatasitkam kimsa siqïnwa.
6Ukxarusti “Sayirinakani Uta” sat utachayarakïna, ukasti sayt'urux pä tunka payan metro chikatani, iranarusti tunka kimsan metro chikatanïnwa. Uka uñkatasinsti yaqha utaraki luräna, ukasti sayirinakanïnwa patat utachxatataraki.
7Ukxarusti “Taripañ Uta” lurarakïna, uka utan taripäwinak uñjañataki, uksti alayat aynachkam cedro lawampiw apakipäna.
8Salomonax jakkäna uka reyi utax, qhipäxar mä utänqanïnwa, ukawjarusti maya utjam kipka luratarakïnwa. Faraonan phuchhapataki khititix jupan warmipäkän ukataki uta luraykän ukasti, ukhama kipka uñtasita utarakïnwa.
9Taqi uka utanakasti, cimientot qalltasa, cornisa sata k'achachata tukuykama, anqäxat manqhäxkamax suma k'uthata jila alani qalanakampi luratänwa, uka qalanakasti suma tupt'asa k'uthatarakïnwa.
10Cimientonakasti jila alani jach'a qalanakampi uchatänwa, yaqhip qalanakax pusi metro chikatani, yaqhip qalanakasti kimsa metro suxta tunka centimetronïnwa.
11Uta patäxasti tupt'asa k'utsuyat jila alani qalanakampita, cedro lawanakampit luratarakïnwa.
12Jach'a utänqa muytarusti kimsa siqi qalanaka, mä siqi cedro lawa q'irunakaw utjäna, kunjamäkäntix Tatitun utap manqhax uka kipka luratarakïnwa.
Salomón reyix Hiram chacharuw bronce yänak lurayi(2 Cr 2.13-14; 3.15-17)13Salomón reyix Hiram chacharuw Tiro markat jawsayanïna.
14Hiram chachax Neftalí ayllunkir mä ijma warmin yuqapänwa, awkipasti Tiro markankirïnwa, jupasti bronce yänak suma lurañ yatïna. Hiram chachax wali yatiñan ch'ikhi jaqïnwa, jupax sum uñt'äna broncet kunayman yänak lurañanaksa; ukhamasti jupax Salomón reyin nayraqatapar uñstasinxa, taqi lurañanakap luräna.
15Bronce umatatayasin pä sayirinak luräna, amsta tuqirux kimsaqallqu metroni, muytarusti phisqa metro chikatani.
16Ukatsti lirio panqarar uñtat broncet pä k'achacht'añ lurarakïna, uka sayirinak patxar uchañataki. Sapa maya k'achachañasti amsta tuqirux pä metro pä tunka phisqani centimetronïnwa.
17Ukxarusti pä rejillanak lurarakïna, ukanakasti cadenanakar uñtat k'anatänwa, sayirinak patxankki uka k'achachañanakar sapa mayxaru uchañataki.
18Ukatsti sapa maya rejilla muytarux, pä siqi granadanaka uchäna, sayirinak patxankki uka k'achachañanakar imxatañataki. Paypach k'achachañanakampix ukhamarak luräna.
19Punkunkki uka sayirinak patankkis uka k'achachañanakax niya pä metronïnwa, ukasti lirio panqarar uñtasitänwa.
20Sapa maya k'achachañan patäxa muytapana, rejilla jak'ana, juk'amp lankhüki, muruq'ur uñtatäki ukkhanxa, pä pataka granadanakaw utjäna, ukasti pä siqïnwa.
21Hiram chachax uka pä sayirinakxa, Tatitun utapar mantañäkis ukaruw uchäna. Uchxasinsti, kupi tuqinkir sayirirux Jaquín sasaw sutichäna, ch'iqa tuqinkir sayirirusti Bóaz sasaw suticharakïna.
22Sayirinakan patäxapasti lirio panqarar uñtasitänwa. Ukhamaw sayirinak lurañax tukuyatäxäna.
Diosan utapan yänakapa(2 Cr 4.1—5.1)23Ukxarusti Hiram chachax uma uchañatakix mä jach'a laman lurarakïna. Ukasti muruq'ünwa, mä thiyat mä thiyakamax pusi metro chikatanïnwa. Alayarusti pä metro pä tunka phisqan centimetroni, muytarusti tunka kimsani metro chikatanirakïnwa.
24Aynach thiyanakaparusti walja achunakani pä siqi k'ithuntat alinak uchäna, sapa pusi tunka phisqani centimetronxa tunka achunakanïnwa, uma uchañampix mayaru luratakïnwa
25Uka uma uchañasti broncet lurat tunka payan urqu vacanakxar uchxatatänwa, uka vacanakat kimsax amsta tuqi uñtatkamänwa, kimsasti aynach tuqiru, kimsax jalanta tuqiru, kimsasti inti jalsu tuqir uñtatarakïnwa. Qhipäx kayunakapasti manqhäxankänwa, uma uchañasti ukanakxar uchxatatänwa.
26Uka uma uchañasti thururux kimsaqallqu centimetronïnwa; thiyanakapasti lirio panqarar uñtatänwa, uka jach'a lamanarusti umax pusi tunka pusin waranqa litronakaw mantäna.
27Ukxarusti broncet lurarakïna tunka takxäsirinaka, sapa mayasti sayt'urusa, iranarusa mä metro kimsaqallqu tunka centimetroni, alayarusti mä metro kimsa tunka phisqan centimetronirakïnwa.
28Uka takxäsirinakax akham luratänwa: marcor uchata telanakanïnwa,
29uka telanakansti leonanakaru, urqu vacanakaru, querubines sat uñtasitanakaw utjäna. Uka leonanaka, urqu vacanaka uñtasitanak patäxansa, aynachäxansa, panqaranakampi k'achachatanakaw utjäna.
30Sapa maya takxäsirinakasti broncet lurat pusi muyurinïnwa, uka muyurin katxäsiripas broncetarakïnwa. Takxäsirinakan pusi thiyapanxa, ukhamarak uma uchaña manqhäxansa, broncet lurat katuñanakanïnwa, sapa thiyanakarusa panqaranakampi k'achachata.
31Uma uchañan lakapasti mä muruq'ur uchatänwa, uka muruq'usti amsta tuqirux pusi tunka phisqani centímetro jilstatänwa, ukar katxäsiripasti alayarux suxta tunka kimsaqallqun centimetronïnwa. Uka lakxarux qillqatanakaw utjarakïna, marconakapasti janiw muruq'ükänti, jan ukasti pusi thiyanïnwa.
32Pusi muyurinakasti telani marconak manqhäxankänwa, muyurinakan katxäsiripax takxäsirir katt'ayatkamänwa. Sapa maya muyurinakax alayarux suxta tunka kimsaqallqun centimetronïnwa,
33ukasti carronakan muyurinakapar uñtatänwa. Katxäsirinakapasa, muyurinakapas broncetkamakïnwa.
34Sapa maya takxäsirinakaru uchañäkis ukanakan puspacha thiyanakapan pusi katuñanakapax, mä sapar tukt'atakïnwa.
35Patxa tuqirux mä muruq'uruw tukuyäna, ukasti alayarux pä tunka payan chikatan centimetronïnwa.
36Tablanakampiru, telan marconakampirusti, Hiram chachax, chhiqhaninakaru, leonanakaru, palmeranakaru uñtasitanak luräna, ch'usawjanakarusti wakisitarjamaw thiyanakar panqaranak lurarakïna.
37Tunka takxäsirinakax ukham luratänwa, mä tupuniki, mä kipkaki umatatayas luratarakïnwa.
38Ukxarusti broncet tunka uma uchañanak lurarakïna. Sapa mayasti mä metro kimsaqallqu tunka centimetronïnwa, kimsaqallqu patak kimsaqallqu tunka litro uma mantkiri, ukanakat sapa mayax uka tunka taknuqañanakaru apxatatänwa,
39phisqax Tatitun utapa kupïxar uchatänwa, phisqasti ch'iqäxaru uchatarakïnwa. Uma uchañ jach'a lamanasti Tatitun utapa kupïxar uchatänwa, aynach inti jalsu tuqiru.
40Hiram chachasti ukxarux phukhunaka, palanaka, jach'a qirunak lurarakïna, ukham jupax Salomonan mayitaparjam taqi lurañanakap Tatitun utapatak tukuyäna.
41Ukanakasti akanakawa: pä sayirinaka, uka patxankiri muruq'u k'achachañanakapa, ukxaru imxatañäki uka pä rejillanaka,
42uka rejillanakatak pusi patak granadanaka, sapa maya rejillatakix pä siqikama, ukanakampi sayirinak patxan uchatäkis uka muruq'u k'achachañanak imxatañataki;
43tunka takxäsirinaka, uka patxar uchata tunka uma uchañanaka,
44uma uchañ jach'a lamana, uka laman katxäsir tunka payan urqu vacanaka,
45ukhamarak phukhunaka, palanaka, jach'a qirunaka.
Taqi kuntix Hiram chachax Tatitun utapatak lurkäna ukanakax suma qaqsut broncet luratänwa, Salomón reyin mayitaparjama.
46Reyisti ch'allat lurat moldenakaruw umatatayäna, Jordán uraqina, Sucot, Saretán uraqinak taypina.
47Broncet lurat yänakax waljapunïnwa, Salomonasti janiw ukanak tupt'aykänti.
48Salomonax Tatitun utapan utjki uka maynïr yänak lurayarakïna. Suma qurit lurat yänakax akanakänwa: qurit lurat altara, Tatitutak t'ant'anak uchañ mesa,
49Qullanansa Qullanap uñkatasinkir uka tunka candelero, kupïxan phisqa, ch'iqäxansti phisqaraki panqarar uñtasitanakani, lamparanaka, tenazanaka,
50jisk'a qirunaka, pabilo nakhatanak khuchhuqañanaka, jach'a qirunaka, jach'a wisllanaka, incienso q'aphichañanaka, taqpachasti suma qurit luratkamakïnwa. Ukatsti Qullanansa Qullanap chiqawjan punkunakapan katxäsirinakapax qurit luratänwa, ukhamaraki Tatitun utapan punkunakapansa.
51Ukatsti, kunanaktix Salomón reyix Tatitun utapatak luraykatayna taqi uka lurañanak tukuyxasinsti, Salomonax kuna qurita, qullqita lurat yänaktix David awkipax Tatitur luqtkatayna uka yänak aptayanïna, ukanaksti Tatitun utapan jila alani yänak imañ utaruw uchxäna.
Who We AreWhat We EelieveWhat We Do
2025 by iamachristian.org,Inc All rights reserved.
