2 CRÓNICAS 14 - Qullan Arunaka DC

Asá reyin Judá marka apnaqatapa(1 R 15.8-12)

1 1 (23) Kunapachatix Abiam reyix jiwxäna ukkhax, Davidan Markaparuw imt'xapxäna. Ukatsti jupa lantix Asá yuqapaw marka apnaqxäna. Marka apnaqäwi urunakapansti, tunka maraw sumankañax uka uraqin utjäna.

2 2 (1) Asá reyin luratanakapax Tatit Diosapa nayraqatan sumänwa, chiqarakïnwa.

3 3 (2) Jupax yaqha markan diosanakapan altaranakapsa, qullu patanakan yupaychañ utanaksa tukjayänwa, axsarat qalanaksa jisk'a jisk'a t'unjayäna, Astarté diosar uñtatanaksa t'unjayarakïnwa.

4 4 (3) Judá markarusti nayra awkinakapan Tatit Diosapar makhatxañapataki, kamachi arunakap phuqhapxañapatakiw arsüna.

5 5 (4) Judá uraqinkir taqi markanakat qullu patanakan utjir yupaychañ utanak chhaqtayäna. Jupax marka apnaqkän ukkhax sumankañaw utjäna.

6 6 (5) Uka maranakasti markax sumankañan jikxatasisax janiw khitimpi nuwasiñapas utjkänti, Tatitun jupanakar samarañ churatap layku, Asá reyix Judá uraqin suma uyuchrantat markanak lurayäna.

7 7 (6) Judá uraqinkir jaqinakarusti sänwa: “Marka apnaqañax jiwasan amparasankkipanxa, aka markanakarux sayt'asiñatak wakichañäni, pirqanakamp muyukipayañäni, pukaranaka, thuru jist'añan punkunak lurañäni. Jiwasax Tatit Diosasaruw thaqtan, ukat jupax marka jak'anakasampix suman sarnaqayistu” sasa.

Ukhamasti lurañanakxa sum tukuyañkamaw lurapxäna.

8 8 (7) Asá reyin ejercitopasti kimsa patak waranqa Judá chiqankir soldadonakampi wakicht'atänwa, jark'aqasiñanakampi, lanzanakampi wakicht'ata, Benjamín ayllunkirinakasti pä patak kimsaqallq waranqa soldadonakanïnwa jark'aqasiñanakampi, mich'inak antutt'añampi wakicht'ata, taqi jupanakasti jan axsarir soldadonakänwa.

9 9 (8) Jupanakampi nuwasiñatakisti Etiopía chiqankir Zérah chachaw, waranqa waranqa jaqinakan ejercitopampi, kimsa patak nuwasiñ carronakampi jutantäna, ukatsti Maresá chiqakamaw purinïna.

10 10 (9) Ukampisa, Asá reyix Zérah chachampiru ejercitopampir nuwantañatakiw wakicht'asïna, jaqinakapampisti Maresá jak'ana, Sefata qhirwan nuwasiñatakiw utjnuqtäna.

11 11 (10) Asá reyisti Tatit Diosaparuw art'asïna, akham sasa: “Tatay, jumatakix ch'amanirusa, jan ch'amanirus yanapt'añax pachpakiwa. Ukhamasti, ¡nanakan Tatit Diosaxay, yanapt'apxitaya, nanakax jumaruw katuyasipxsma, sutimxarurakiw aka ejercitompi nuwasirix jutapxta! Tatay, jumaw nanakan Diosaxätaxa. ¡Nanakax yatipxtwa, jumarux janiw khitis atipjkiristamti!” sasa.

12 12 (11) Tatitusti Asá reyina, Judá markan nayraqatapan etiope jaqinakarux tukjäna, uka jaqinakasti jaltxapxänwa.

13 13 (12) Ukampis Asá reyimpi jaqinakapampix Guerar chiqakamaw jupanakarux arktapxäna, etiope jaqinakarusti taqpachaniruw jiwarayapxäna, ukatsti jupanakax taqi yänakap katuntasipxäna.

14 14 (13) Ukxarusti Guerar marka jak'ankir markanakaruw mantantapxarakïna, uka markanakasti taqiniw Tatitun nayraqatapan axsarayasipxäna. Judá markankir jaqinakasti uka markanakan kuna yänakapatix utjkäna ukanak q'al aparanipxäna.

15 15 (14) Kawkhantix uywanakax utjkäna uka campamentonakaruw mantantapxäna, ukatsti walja ovejanaka, camellonaka apasipxäna. Uka qhipat Jerusalén markarux kutt'anxapxäna.