SALMOS 44 - Qullan Arunaka DC

SALMO 44Diosan yanapt'ap mayisiña 1 Coré chachan wawanakapan q'uchupa.

1 1 (2) Tatit Diosay,

jinchunakaxampiw ist'apxta,

awkinakaxaw yatiyapxitu

kuntix khaya urunakapan lurkta

taqi ukanakata:

2 2 (3) Diosar jan uñt'irinakarux

amparamampiw jaqunuktaxa,

markanakaruw mutuytaxa,

ukarurakiw nayra awkinakaxar utt'aytaxa.

3 3 (4) Janiw ch'amampiti,

espadampisa atipjapkiti,

jupanak sapakix janiw uka uraq katuntasipkiti.

¡Jan ukasti, amparamampi, ch'amamampiwa!

¡Juman qhanamampiw atipjapxi,

jupanakar munasitam layku!

4 4 (5) ¡Reyixay! ¡Diosaxay!

Jumaw Israel markaman atipjañapatak ch'am churtaxa;

5 5 (6) yanapamampiw uñisirinakarux atipt'apxta;

¡sutimaruw nanakar uñisirirux takxatapxta!

6 6 (7) Janiw nayax mich'inak antutt'añaru,

mich'inakarus alkatkiristti,

janirakiw espadaxas atipaykitaspati;

7 7 (8) jumaw uñisirinakarux atipjayapxista,

jumarakiw jupanakarux mä p'inqa tukuyaraktaxa.

8 8 (9) ¡Tatit Diosay,

wiñayaw jumat jach'añchasipxä,

sutimarus wiñayaw yupaychapxarakï!

9 9 (10) Jichhax juman apanukutaw uñjasipxta;

mä p'inqa tukuyapxarakista.

Nuwasir tamaxampi chikax janiw mistkxtati.

10 10 (11) Timasirinakaxan jak'apat jaltayapxista,

uñisirinakaxasti yänakax aparapxitu;

munataparjamaw taqi kun apasipxi.

11 11 (12) Khariñ ovejanakarjamaw amparapar katuyapxista;

Diosar jan uñt'ir markanak taypiruw anatatapxista;

12 12 (13) wali iraqataruw markamarux aljanuktaxa,

aljatampisti janiw kuns jikxatktati.

13 13 (14) Jaqi masixan tuqiñatakiw uchapxista,

nanakar uñt'irinakan sawkasiñapatakikiw utjayapxista.

14 14 (15) Diosar jan uñt'irinakampiw larusiyapxista;

markanakasti nanak uñjasax p'iqip khiwisipxi.

15 15 (16) Sapüruw jisk'achat uñjasta;

ajanuxas p'inqaxat uraqinkiwa,

16 16 (17) nayar tuqitanak ist'asina,

uñisirixar uñjasina.

17 17 (18) Taqi ukanakan nanakxar jutatapaxa,

janiw jumar armat laykükänti.

¡Janiw arust'äwim p'akintat laykükänsa!

18 18 (19) Janiw jumar apanukuñsa amtapkti,

janirakiw thakhimatsa saranukupkti.

19 19 (20) Ukampis jan walt'añ chiqanakan aynacht'ayapxista,

¡Axsarkañ ch'amakampiw muyuntayapxista!

20 20 (21) Dios Tatay,

jumarutix armanukupxiriskasamäna,

yaqha diosarutix yupaychapxiriskäyätxa,

21 21 (22) jumax yatxasamänwa,

chuyma manqhankir amtäwinak yatitam layku.

22 22 (23) Jumar arkatax laykuw jiwayañ munapxitu,

khariñ ovejanakarjamaw uñch'ukipxitu.

23 23 (24) Dios Tatay, p'arxtasikimaya,

¿kunatarak iktasti?

¡Sartasikimaya, jan wiñayatak armanukupxistati!

24 24 (25) ¿Kunatarak nanakatak imantastasti?

¿Kunatarak ukataq t'aqhisipxataxat armastasti?

25 25 (26) Qarjata, p'inqachjataw jikxatasipxta,

janchinakaxsa uraqinjamak qatatinxapxta.

26 26 (27) ¡Sartasikimaya,

nanakar yanapt'irix jutakimaya,

khuyapayasiñam laykux qhispiyapxakitaya!