ÉXODO 28 - Qullan Arunaka DC

Sacerdotenakan isinakapa(Ex 39.1-31)

1“Nayax israelitanak taypit, Aarón jilamampiru, Nadab, Abihú, Eleazar, Itamar yuqanakapampiruw nayan sacerdotenakaxäñapatak ajllista. Ukhamasti jupanakax jumamp chikäñapawa.

2Suma isinak Aarón jilamatakix lurayäta, uka isinakasti jupar jach'ar aptaypan jiwakirakïpan.

3Yatiñan ch'ikhi jaqinakamp parlam, khitinakarutix nayax sumanak lurañatak ch'ikhi kankañ churkta uka jaqinakampi, Aaronan suma isinakap jupanakaruw lurayäta, uka isix wali sumäñapapuniwa, nayatak yaqhachat sacerdotenakatakjama.

4Aka isinak lurapxañapa: Pectoral sat nayräxar uchasiña, Efod sat isi, mä capa, suma p'itakipat túnica isi, linot lurat p'iqi ch'uqt'asiñ isi, ukhamarak mä wak'ampi. Ukhamasti suma isinak Aarón jilamatakisa, wawanakapatakis lurapxäta, jupanakan nayan sacerdotenakaxjam luqtañapataki.

5Uka isinak lurañatakisti wakisiniw utjañapa quri, morado tela, ch'iyar wila tela, suma wila tela, lino lurat tela.

6“Efod sat isix qurita, sajuna telata, ch'iyar wila telata, wila telata, lino telat luratäñapawa, wali suma p'itakipataraki,

7purap thiyaparusti pä katuñanïñapawa thiyar suma ch'ukthapita.

8Efod sat isi patxar wak'asiñasti, qurita, sajuna telata, ch'iyar wila telata, wila telata, lino telat luratäñapawa.

9“Ukatxa ónice sat suma saminakan pä qalanak katüta, ukarusti Israelan tunka payan wawanakapan sutinakap qillqantäta,

10jupanakan yuritaparjama; mä qalarux suxtanin sutip qillqantäta, mä qalarusti suxtanin sutiparak qillqantäta.

11Uka qalanakxarusti quri yänak lurir jaqiw sutinak uchañapa, kunjämtix chimpuntañatak luratäki ukhama. Ukatsti uka pä qalanak quri patxaruw uchäta,

12ukatsti efod sat isin katuñapxaruw uk uchäta, ukhamat uka qalanak uñjasin Israelan wawanakapan sutinakap amtañataki. Aaronax ukham jupanakan sutinakap Tatitun nayraqatapar kallachipxar sutinak amtañatak apani.

13Qalanak uchañanaksti quritkamak luräta;

14ukxarusti suma quri pä t'ullkhutampi mä cadena luräta, uksti qalanak katxäski ukaruw muyuntayäta.

15“Ukatsti aski uñjañ yänakani pectoral sat isi lurarakïta, uksti kunjämtix efod isi lurkäta ukhamarak wali suma p'itakipata, k'achachat luräta. Uka isxa qurita, sajuna telata, ch'iyar wila telata, wila telata, lino telat luräta,

16uka isisti pusi tuqitpach mä tupunikïniwa, payar sukt'ata; iranarusa, sayt'urusa pä tunka payan centimetronïñapawa.

17Ukatsti pusir jaljat siqinakaruw suma qalanakampi uchakipäta. Nayrïr siqix akham qalanïñapawa: rubí, crisólito, esmeralda ukanaka;

18payïr siqinsti, granate, zafiro, jade uka qalanakaraki;

19kimsïr siqinsti, jacinto, ágata, amatista qalanaka;

20pusïr siqinsti topacio, cornalina, jaspe qalanakaraki. Uka qalanakasti quri taypir uchatäñapawa,

21tunka payanïñaparakiwa, Israelan wawanakapan sutinakapax tunka payanïtap layku. Sapa maya qalaruw tunka payan ayllunakat maynin sutipax, mä chimpur uñtat qillqantatäni.

22“Ukxarusti pectoral isitakix thuru ch'ankhar uñtat suma quri cadenanak luräta.

23Pä quri argollanak lurarakïta, uksti pectoral isin purap thiyaparuw uchäta;

24ukatsti uka pä quri cadenanak pectoral isi thiyankki uka argollanakaruw chinuntäta,

25ukatsti cadenanakan pä thiyanakap efod isin nayräxapat purap kallachi patapar chinuntasa.

26Ukxarusti qurit pä argollanak luräta, uksti pectoral isin aynach tuqipar purap thiyaruw uchäta, efod isimpi jikthaptki ukkharu.

27Ukatxa qurit pä argollanakamp luräta, uksti efod isin nayräxankir katuñaruw uchäta, aynach chiqaru, efod isir katxäski uka wak'at amsta chiqaru.

28Ukatsti pectoral isin argollapampi, efod isin argollapampxa, mä morado chinuñampiw chhitthapïta, ukhamat pectoral isimpi, wak'apat amsta chiqankki uka efod isimpix jan jaljtañapataki.

29Ukhamasti, kunapachatix Aaronax qullan chiqawjar chiqapar uñjañ yänakani uchat pectoral isin mantkani ukkhaxa, Israelan wawanakapan sutinakapsti, Tatitun nayraqataparuw chuymapar warkuntat apani, ukhamat sutinakap jupan wiñay amtañapataki.

30Ukatsti pectoral isi patxarux Urim, Tumim sat chiqa aski uñjañ qalanak uchäta, Aaronax chuymapar warkuntat apañapataki, kunapachatix Tatitun nayraqapatar uñstkani ukapacha. Ukhamwa Aaronax chuyma patapar uka chiqa aski uñjañ qalanak Tatitun nayraqatapan apapunini.

31“Ukatsti efod isitakix morado telat mä jach'a isi luräta,

32ukasti p'iqi waysuñatakix chikachikar p'iyjatäñapawa. Uka p'iya thiyanakasti, jan ch'iyasiñapatakix suma kutintayatäñapawa, lip'ichit lurat isir uñtata.

33-34Jach'a isi thiyanakarusti, wila morado telata, wila telata granada achunakar uñtat luratampi k'achacham, uksti qurit lurat jisk'a chilinkinakampi, granada achunakar uñtat luratampisti, taqpach thiyanakaparuw maykip uchas k'achachäta.

35Aaronax uka isimpiw sacerdote kankañ luräwip phuqhañatak uchasiñapa, kunapachatix Tatitun qullan utjäwipar mantkani, jan ukax, misttankani ukapachas uka chilinkinakan chilinkitap ist'asiñapataki, ukhamat jupax jan jiwkaniti.

36“Ukxarusti suma qurit mä placa luräta, ukarusti mä chimpükaspas ukham aka arunak uchäta: ‘Tatitur katuyata’ sasa.

37Uksti p'iqir ch'uqasiñ isi nayräxaruw uchäta, jan jalaqtañapatakix morado t'ullkhutampiw chint'äta,

38ukhamat Aaronan parapankapunini. Uka placasti, kunapachatix Aaronax israelitanakan jucha luratanakapat luqtanak katuykani, ukatsti Tatitun uka luqtanak katuqatapat juchanakap pampachkani uk uñacht'ayani.

39“Ukxarusti túnica isxa linompi p'itakipat luräta, p'iqir ch'uqt'asiñ isipsti linotarak luräta. Wak'ax suma p'itakipatäñapawa.

40Aaronan wawanakapatakix túnica isinaka, wak'anaka, p'iqi ch'uqasiñ isinak lurarapïta, uka isinakax jupanakar suma k'achachat jach'ar aptañatakïniwa.

41“Uka isinakampiw Aarón jilamarusa, wawanakaparus isithapiyäta, ukatsti aceitempiw p'iqit warxatäta ukhamat jilïr kankañanïpxani, nayan sacerdotenakaxar tukuyas luqtarakïta.

42Ukxarusti calzoncillonak linot lurarapïta, ukax jikhanita, lankhu charakam imt'ani.

43Uka calzoncillo ucht'ataw Aaronampi, wawanakapampix Tatitump Jikisiñ Carpar mantapxani, jan ukax qullan chiqawjan sacerdote lurañanakap phuqhir altarar jak'achasipkani ukapachasa, ukhamat kuna juchsa jan lurapkaniti, janirakiw jiwapkanisa. Aka kamachix wiñayatak utt'ayatawa, Aaronampitaki, wawanakapan wawanakapampitaki.