NÚMEROS 26 - Qullan Arunaka DC

1Tatitux Moisesampiru, Aarón sacerdoten Eleazar yuqapampiruw parläna, akham sasa:

2—Jaqinak jakthapipxam, wila masitkama, pä tunk maranit amstaru, nuwasïwirus sarirjamäpki taqi uka israelitanakaru —sasa.

3Moisesampi, Eleazar sacerdotempisti Moab pampanakana, Jordán jawir jak'ana, Jericó marka uñkatasin jikxatasipkän ukapachaw israelitanakar sapxäna,

4taqinin qillqayasipxañapataki, pä tunka maranit amstaru, Tatitux Moisesar siskatayna ukhamarjama.

Egiptot mistunipkatayna, ukatsti qillqantatäpkän taqi uka israelita jaqinakax akanakänwa:

5Rubén chachan wawanakapa, Jacobun tayna yuqapana, Henoc, Falú,

6Hesrón, Carmí jupanakänwa;

7jakthapitarjamasti, Rubén chachan saraqirinakapax pusi tunka kimsan waranqa paqallq pataka kimsa tunkan chachanakänwa.

8Falú chachax mä wawanikïnwa, Eliab sutini,

9Eliab chachasti kimsa wawanïnwa: Nemuel, Datán, Abiram sutininaka. Datán, Abiram jupanakax, Coré chachan tamapar jaqkattirinakänwa, jupanakasti Tatitumpitaki, Moisesampitaki, Aaronampitakiw sayt'asipxäna.

10Ukampis uraqiw jist'artasin jupanak paniniru, Coré chachampir manq'antäna, tamapankirinakasti taqpachaniw jiwaräna, pä patak phisqa tunka jaqinakaw ninan jiwarapxäna. Ukasti markan waniñapatakiw ukham lurasïna.

11Coré chachan wawanakapakiw jan jiwapkänti.

12Simeón chachat saraqir wila masi tamanakan wawanakapax Nemuel, Jamín, Jaquín,

13Zérah, Saúl, jupanakänwa;

14jakthapitarjamasti, Simeón chachan saraqirinakapax pä tunka payan waranqa pä patakan chachanakänwa.

15Gad chachat saraqir wila masi tamanakan wawanakapax Sefón, Haguí, Suní,

16Ozní, Erí,

17Arod, Arelí jupanakänwa;

18jakthapitarjamasti, Gad chachan saraqirinakapax pusi tunk waranqa phisqa patakan chachanakänwa.

19-20Judá chachat saraqir wila masi tamanakan wawanakapax Er, Onán, Selá, Fares, Zérah jupanakänwa. Er, Onán jupanakax Canaán uraqin jiwarapxäna, ukat jupanakax jan jakhutäpkänti.

21Fares chachax pä wawanïnwa: Hesrón, Hamul jupanaka;

22jakthapitarjamasti, Judá chachan saraqir wawanakapax paqallq tunka suxtan waranqa phisqa patakan chachanakänwa.

23Isacar chachat saraqir wila masi tamanakan wawanakapax Tolá, Puvá,

24Jasub, Simrón jupanakänwa;

25jakthapitarjamasti, Isacar chachan saraqirinakapax suxta tunka pusin waranqa kimsa patakan chachanakänwa.

26Zabulón chachat saraqir wila masi tamanakan wawanakapax Séred, Elón, Jahleel jupanakänwa;

27jakthapitarjamasti, Zabulón chachan saraqirinakapax suxta tunka waranqa phisqa patakan chachanakänwa.

28José chachat saraqir wila masi tamanakan wawanakapax Manasés, Efraín jupanakänwa.

29Manasés chachax mä wawanikïnwa: Maquir sutini. Maquir chachasti mä wawanikirakïnwa: Galaad sutini;

30Galaad chachat saraqir wila masi tamanakan wawanakapax Iéser, Hélec,

31Asriel, Siquem,

32Semidá, Héfer, jupanakänwa.

33Héfer chachax mä wawanikïnwa Selofhad sutini. Selofhad chachax janiw yuqall wawanïkänti, jan ukasti imill wawanakapakiw utjäna, sutinakapasti: Mahlá, Noá, Hoglá, Milcá, Tirsá jupanakänwa.

34Jakthapitarjamasti, Manasés chachan saraqirinakapax phisqa tunka payan waranqa paqallq patakan chachanakänwa.

35Efraín chachat saraqir wila masi tamanakan wawanakapax Sutélah, Béquer, Tahán jupanakänwa.

36Sutélah sat chachan saraqirinakapax Erán sat wila masi tamankirïnwa.

37Jakthapitarjamasti, Efraín chachat saraqir wila masi tamanakan wawanakapax kimsa tunka payan waranqa phisqa patakan chachanakänwa. Taqi jupanakampi, Manasés ayllunkirinakampix José chachat saraqirinakapänwa.

38Benjamín chachat saraqir wila masi tamanakax Bela, Asbel, Ahiram,

39Sufam, Hufam jupanakänwa.

40Bela chachax pä wawanïnwa: Ard, Naamán jupanaka.

41Jakthapitarjamasti, Benjamín chachan saraqirinakapax pusi tunka phisqan waranqa suxta patakan chachanakänwa.

42Dan chachat saraqirinakax Suham sat wila masi tamankirïnwa.

43Jakthapitarjamasti, Suham chachan saraqirinakapax suxta tunka pusin waranqa pusi patakan chachanakänwa.

44Aser chachat saraqir wila masi tamanakax Imná, Isví, Beriá jupanakänwa.

45Beriá chachax pä wawanïnwa: Heber, Malquiel jupanaka.

46Aser chachax mä imill wawanirakïnwa, Sérah sutini.

47Jakthapitarjamasti, Aser chachan saraqirinakapax phisqa tunka kimsan waranqa pusi patakan chachanakänwa.

48Neftalí chachat saraqir wila masi tamanakan wawanakapax Jahseel, Guní,

49Jezer, Silem jupanakänwa.

50Jakthapitarjamasti, Neftalí chachan saraqirinakapax pusi tunka phisqan waranqa pusi patakan chachanakänwa.

51Jakthapitarjamasti, israelitanakax suxta patak mayan waranqa paqallqu patak kimsa tunkan chachanakänwa.

Uraqinak jaljasiñatak kamachinaka

52Tatitux Moisesar wasitat parlxayäna, juparusti sarakïnwa:

53“Taqi aka jaqinakaruw uraqinak lakintäta, qawqha jaqinakatix qillqantatäki ukhamarjama.

54Waljanïki uka tamanakarux jilpach uraqi churäta; juk'anïki uka tamanakarusti jisk'a uraqik churarakïta. Sapaqat tamaruw jakthapitarjam uraqix churasini.

55Uraqinak lakiñasti suertet wakt'atarjamäniwa. Sapaqat mayniw tunu awkit saraqir ayllunkiritjam uraqip katuqani.

56Uraqinak lakintañax suertetjamaw wakt'ani, ayllunkiritjama, wila masi tamankiritjama” sasa.

Levitanakar jakthapïwi

57-58Leví chachat saraqir wila masinakarux jakthapipxarakïnwa, Leví chachax kimsa wawanïnwa: Guersón, Quehat, Merarí jupanaka. Ukhamat kimsa wila masi tamanak utjayapxäna; uka tamanakatsti, yaqha phisqa wila masi tamanakaw uñstäna: Libní, Hebrón, Quehat, Mahlí, Musí jupanaka.

Quehat chachax mä wawanikïnwa, Amram sutini.

59Amram chachax Leví chachan mä phuchhapampiw jaqichasïna, jupasti Jocabed satänwa. Uka phuchhapasti kunapachatix Leví chachax Egiptonkaskän ukapachaw yuritayna. Amram chachampi, Jocabed warmimpix pä yuqall wawani, mä imill wawanïpxänwa: Aarón, Moisés, María jupanaka.

60Aarón chachax pusi wawanïnwa: Nadab, Abihú, Itamar, Eleazar jupanaka.

61Ukampis Nadab chachampi, Abihú chachampix, Tatitun iwxt'apar jan ist'as incienso luqtapxatap laykuw jiwarapxäna.

62Leví chachat saraqir taqpach yuqall wawanakapax mä phaxsinit amstarux, pä tunka kimsan waranqanïnwa. Jupanakasti janiw israelitanak taypin jakhutäkänti, uraqix jupanakar jan churatätap layku.

63Taqi ukanakänwa Moisesampi, Eleazar sacerdotempi jakthapipkän uka israelita jaqinakat jakthapitanakaxa, kunapachatix Moab pampanakana, Jordán jawir jak'ana, Jericó marka uñkatasin jikxatasipkän ukapacha.

64Uka jakthapitanak taypinsti, janiw maynis utjkänti, Moisesampi, Aaronampix jaqinak nayrïr kutin Sinaí wasaran jakthapipkän uka jaqinakatxa.

65Jupanakax taqpachaniw wasaran Tatitun mutuyäwip katuqas jiwarxapxatayna. Caleb chachampi, Josué chachampikiw qhiparäna.