EZEQUIEL 32 - Qullan Arunaka DC

Faraonax mä jach'a axsarkañ animalampi sasiwa

1Tunka payanïr marana, tunka payanïr phaxsina, qallta uru saraqatarusti, Tatitux sarakituwa:

2“Egipto markankir faraón reyitak aka amay imäwi q'uchu q'uchurapim:

“ ‘Markanakan leonapjamätawa;

qutankir jach'a katarir uñtatätawa,

jawiraman umapan sunt'isiraktaxa,

kayunakamampiw uka um qunchuptaytaxa,

jalir umsti tirktayaraktawa.

3“ ‘Tatitux akham siwa: Walja markanak taypinkaskamsa, nayaw qänaxa jumxarux jaqxatanï, ukampiw katuntäma.

4Waña uraqiruw qatatsunïma, ukatsti uka uraqiruw jiwat liwinuküma. Juma patxarusti alaxpach jamach'inakaw jutapxani, juman aychamampisti montenkir animalanakaw sist'asiñkam manq'apxani.

5Jiwat janchiman thujsantat aychapampisti, qullunaksa qhirwanaksa phuqhantarakïwa.

6Uraqis wilamampi ch'ach'jatäniwa, ukasti qullunakkamaw makhatani, jawiranakas uka wilampiw phuqhantasini.

7Nayax jumar t'unjkäma ukkhasti alaxpachas ch'amakt'aniwa, warawaranakas ch'amakt'aniwa, intirus qinayanakampiw chhaqtayä, phaxsis janirakiw juk'ampi qhankxaniti.

8Juma laykusti alaxpachan taqpach qhananak jiwt'ayä, markamsti ch'amakampiw phuqhantarakï. Naya, Tatituw uk arsta.

9“ ‘Juman t'unjatätamat jan uñt'ata yaqha markanakan yatiskani ukapachasti, uka markanakarux wali mayjt'asiyä.

10Juma laykuw walja markanakanxa axsarañanak sartayarakï; kunapachatix nayax espadaxa jupanak nayraqatan khiwtkä ukapachasti, reyinakapas wali mulljataw uñjasipxani. Jumax aynacht'käta ukkhasti, jupanakax jiwañar axsarasaw khathatipxani.

11“ ‘Tatitux siwa: Babilonia reyiw jumarux espadapampi jiwayätam.

12Walja jaqinakani markamarusti qhuru jaqinakan espadaparuw jalt'ayarakï. Egipton jach'a kankañaparusti tukusiyapxaniwa, walja jaqinakan markapsa tukjapxarakiniwa.

13Umanakaman umt'asiri uywanakamarusti taqpacharuw tukjarakï, janipuniw mayampsa jaqinakasa, uywanakasa takt'atanakapampix uka uma qunchuptaykxapxaniti.

14Ukapachaw umarux suma ch'uwar tukuyä, aceitjama sujakiw jalani. Naya, Tatituw uk arsta.

15Kunapachatix nayax Egipto markar mä ch'usa wasarar tukuykä, uka uraqis jan jaqin uñjaskani, ukapachaw jupanakax yatipxani, nayan Tatitütaxa.’

16“Akasti amay imäwi q'uchuwa, ukham yaqha markankir warminakax Egiptot jachasax q'uchupxani, ukhamarak walja qamir yänakapatsa. Naya, Tatituw uk arsta.”

Egipto markan aynacht'atapat jachäwi

17Tunka payanïr marana, tunka payanïr phaxsina, tunka phisqan uru saraqatarusti, Tatitux sarakituwa:

18“Jumasti Ezequiel, Egiptonkir walja jaqinakataki, taqi jilïrinakapatakisa, yaqha markanakankir warminakampi chika aka amay imäwi q'uchu q'uchurapim:

“ ‘Ch'amaninakax manqhapachar jaquntatäpxiwa,

sepulturankxapxi ukanakamp chika ukankapxañapataki.

19¿Jumasti mayninakat sipansa wali sumätati?

Jichhax jiwañamaw wakt'tam,

kunjämatix juchararanakax jiwapki ukhama.’

20“Jupanakasti nuwasïwin jiwaririnakampi chikaw aynacht'apxani. Espadax niya wakicht'atawa. Jupanakampi chikaw uka walja jaqinakapax apatäpxani.

21Wali ch'amani jilïrinakaw jiwatanakan markapanxa egipcio jaqinakampiru jupanakampi mayachasirinakarusa katuqapxani, ukatsti sapxarakiniwa: ‘¡Purinxapxiwa! ¡Tatitur jan uñt'ir jaqinakasti nuwasïwin jiwarir jaqinakamp chikaw liwirtapxi!’ sasa.

22-23“Asiria markax ukankiwa, jaqinakaru wali mulljiri soldadonakapan muyuntata. Taqi jupanakax nuwasïwin jiwarayataw uñjasipxi, jichhasti uraqi manqhar imantatäpxiwa.

24-25“Elam markas ukankarakiwa, jaqinakaru wali mulljiri soldadonakapan muyuntata. Taqi jupanakax nuwasïwin jiwarayataw uñjasipxi, jichhax jan khitinsa yäqat imantatäpxiwa, uraqi manqhar imantatäpxiwa, kunjämatix Tatitur jan uñt'ir jaqinakan imantatäñapax wakiski ukhama.

26-27“Mésec markasa, Tubal markas ukankapxarakiwa, jaqinakaru walpun sustjiri soldadonakapan muyuntata. Taqi jupanakax nuwasïwin jiwarayataw uñjasipxi, ukampis jan khitinsa yäqata imantatäpxiwa. Wali aytat jaqinakapasti nuwasiñ isinakampi isintatpachaw sepulturar allintat uñjasipxi.

28“Egipto marka, jumas ukankarakïtawa, Tatitur jan uñt'iri jaqinak taypina, q'ala t'unjata, nuwasïwin jiwarir jaqinak taypin imantata uñjasïta.

29“Edom markas ukankaskarakiwa, reyinakapampi, marka apnaqirinakapamp chika. Wali ch'amanïpkchïn ukasa, jichhax nuwasïwin jiwaririnak taypin jikxatasipxi, Tatitur jan uñt'ir jaqinakamp chika imantatäpxarakiwa.

30“Amsta tuqinkir taqi jilïrinakasa, Sidón markankir jilïrinakas ukankasipkarakiwa. Jupanakax wali ch'amanïpxänwa, jaqinakarus wal axsarayapxäna, ukampis jichhax nuwasïwin jiwarapki ukanakamp chika manqhapachar jaquntataw uñjasipxi, mä p'inqarakiw ukan jichhax jikxatasipxi. Jupanakax Tatitur jan uñt'irïpxiwa, jan kuna jach'añchäwi katuqasaw nuwasïwin jiwaririnakamp chika imantata uñjasipxi, sepulturar jaquntatäpki ukanakamp chika.

31“Faraonax jupanakar uñjkani ukkhasti, soldadonakapan jiwaratapatxa chuymachasxarakiniwa, jupasa, taqi soldadonakapas nuwasïwin jiwarapxäna. Naya, Tatituw uk arsta.

32Faraonax taqi markankir jaqinakarux walpun axsarayäna, ukatpï jichhax Tatitur jan uñt'ir jaqinakamp chika imantataxa, nuwasïwin jiwaririnakamp chika, walja soldadonakani ejercitopamp chika. Naya, Tatituw uk arsta.”