2 SAMUEL 24 - Qullan Arunaka DC

Davidax jaqinak jakthapi(1 Cr 21.1-17)

1Tatitux wasitat israelitanakatak q'apisirakïna, ukatsti Davidaruw amtayäna, Israel markampita, Judá markampit jaqinak jakthapiñapataki.

2Ukat reyix ejercitopan jach'a jilïripa Joab chachar säna:

—Israel uraqin utjir taqpach ayllunakapar muytanim, Dan chiqata Berseba chiqakama, ukatsti markachirinakar jakthapim, qawqha jaqinakas utjatayna uk nayan yatiñaxataki —sasa.

3Ukampis Joab chachax reyir sänwa:

—Tatitu Diosamax, markamar patak ukkhampi utjki ukar yapxatpan, jumasti uka uñjañatak jakarakim; ukampisa, ¿kunatakirak juma reyisti jaqinak jakthapiñ muntasti? —sasa.

4Ukampis reyin arsutapax jan atipkayänwa, ukhamasti Joab chachampi, ejerciton jilïrinakapampix reyin nayraqatapat mistuwayxapxäna, Israel markankirinakar jakthapiri.

5Jupanakasti Jordán jawir makhatawayapxäna, ukatsti Aroer markan jaqinak jakthapiñ qalltapxäna, kawkïr markatix qhirwa taypin jikxataskän ukata, Gad, Jazer chiqanakar sarañ thakhina.

6Ukatsti Galaad markaruw sarapxäna, ukawjatsti hitita jaqinakan uraqipankir Cadés sat chiqaru. Ukatxa Dan chiqaruw puripxäna, ukawjat muytawayapxäna Sidón markar puriñkama.

7Ukatsti Tiro chiqankir uyuchrantat markaruw sarapxäna, ukhamaraki, heveonakana, cananeonakan taqpach markanakaparu, Judá uraqin aynacha tuqir mistuñkama, Beerseba markäki ukkhakama.

8Jupanakasti llätunk phaxsi, pä tunka urumpi taqpach markanak muytanisinxa, Jerusalén markaruw purinxapxäna.

9Joab chachasti reyiruw yatiyxäna, jakt'at jaqinakax qawqhäkäntix ukanaka, ukat yatisirakïna, Israelan kimsaqallqu patak waranqa nuwasiñatak wakicht'at chachanak utjatapa, Judá uraqinsti phisqa patak waranqa chachanaka utjataparaki.

10Davidasti taqi jaqinak jakthapiyasax chuymapan jan wali luratap amuyasïna, ukat Tatitur arsusxäna: “Tatay, nayax uk lurasax mä jach'a jucha lurta, ukampis Tatay, juchaxat pampacht'itaya, jan amuyt'asir jaqjamaw uk lurta” sasa.

11Qhipärmanthisti, Davidax sartasiskän ukapachaw, Tatitux Davidan yatiyiripa Gad profetar säna:

12“Davidar uñjir saram, nayan sutixaruw säta, juparux mutuyäwa, aka kimsa mutuyäwinakat ajllispan” sasa.

13Gad profetasti Davidan ukar sarasin jupar jiskt'äna:

—Kawkïrsa jichhax munta: ¿Aka markan mach'ax paqallqu mara utjañapti, jan ukax, kimsa phaxsi uñisirinakaman arknaqatäñcha, jan ukax, kimsa uru mä jach'a usu aka markan utjañapcha muntaxa? Ukhamasti jichhax amuyt'asim, khithankitu ukar yatiyxañaxataki —sasa.

14Davidasti ukxaruw Gad profetar sarakïna:

—¡Nayatakix wali ch'amaw uka kimsat may ajlliñaxa! Ukampis Tatitux khuyapayasiriwa, ukhamasti jupakiy kunjämarutix munki ukhamarjam mutuyitpan. Janiw uñisirinakaxan t'aqhisiyat uñjasiñ munkti —sasa.

15Ukhamasti, Tatitux mä jach'a usu taqpach Israel markxar apayanïna, ukärmanthit qalltasina, kimsïr urukama; ukatsti Dan markata, Beerseba markakamax paqallq tunka waranqa jaqinakaw jiwaräna.

16Kunapachatix Tatitun angelapax Jerusalén markar niya t'unjañampïskän ukapachasti, Tatitux chuymapan amthapisïna uka jach'a jan wali apayanitapata, ukat uka angelarux säna: “¡Ukkhakamaki, jan juk'ampi lurkxamti!” sasa.

Ukapachasti Tatitun angelapax kawkhantix Arauna sat jebuseo jaqix trigo jawq'askän uka jak'ankaskänwa.

17Davidasti angelar jaqinak tukjir uñjasaxa, Tatituruw säna:

—¡Nayaw jucha lurta! ¡Nayaw juchanïtxa! ¿Aka jaqinakasti kuna juchanirakisti? ¡Nayasti achikt'asiraksmawa, mutuyäwimax nayampitaki, wila masinakaxampitakïpan! —sasa.

Davidax mä altar luri(1 Cr 21.18-27)

18Uka pachpa uruw Gad profetax Davidan ukar saräna, ukat jupar sarakïna: “Makhatam, ukatsti Tatitutak mä altar sayt'ayam, kawkhantix Arauna jebuseo jaqix trigo jawq'askän ukawjaru” sasa.

19Davidasti sarawayänwa, Tatitux Gad profeta tuqi arskatayna ukarjam lurañataki.

20Arauna jaqix reyimpiru, luqtirinakapampir jupa tuqir jutasipkir uñjasinxa, mistuwayasin reyin nayraqatapan uraqkam alt'asaw killt'asïna,

21akham sasa:

—¿Reyixay, kunatarak naya uywatamar uñjt'ir juttasti? —sasa.

Davidasti sarakïnwa:

—Trigo jawq'añ chiqawjam alasiñ munta, uka chiqar Tatitutak mä altar sayt'ayañataki, ukhamat aka jach'a usux markat sarxañapataki —sasa.

22Arauna jaqisti sarakïnwa:

—Reyixay, aka uraqi katusiskakim, ukatsti munkta ukhamarjam nakt'at waxt'äwinak Tatitur luqtarakim. Akansti urqu vacanakax wilañcha luqtañatakix utjiwa, jawq'añanakampi, yukunakampix phäñatakïniwa.

23Nayax taqi ukanak jumar churxsma, juman waxt'äwimasti Tatitu Diosan chuymapar purt'kirïpan! —sasa.

24Reyisti ukxaruw sarakïna:

—Janiw lurataxax Diosatakjamäkaspati, nayax qullqimpiw alasiñ munta, janiw nayax Tatitu Diosaxar kunatix jan alanïki uka waxt'äwinak luqtkiristti —sasa.

Ukhamaw Davidax uraqimpi, uka urqu vacanakamp phisqa tunka qullqimpi aläna,

25ukawjaruw jupax Tatitutak mä altar sayt'ayäna, ukatsti nakt'at waxt'äwinaka, sumankañ wilañchanak luqtarakïna. Tatitusti Davidan marka layku mayisitanakap ist'änwa, Israel markar t'aqhisiykän uka jach'a ususti chhaqtawayxänwa.