DANIEL 4 - Qullan Arunaka DC

Nabucodonosor reyin luqhiratapa

1 1 (31) “Naya, Nabucodonosor reyix muntwa, aka uraqin utjir taqi markanakan jakir jaqinakatakix sumankañasa, taqi kunan phuqt'atäñas utjañapa.

2 2 (31) Jumanakan yatipxañanakam munarakta, kunja jach'a muspharkañanaktix alaxpachankir Diosax nayatak lurki ukanaka.

3 3 (31) ¡Kunja jach'as luräwinakapaxa, muspharkañ luratanakapasa! Jupan marka apnaqäwipasti wiñayatakïniwa, munañanïñapas wawanakapansa wawanakapatakïniwa.

4 4 (1) “Naya, Nabucodonosor reyix, jach'a utaxan k'uchikiw jakasiskäyäta, wali qamirirakïyätwa.

5 5 (2) Ukampis mä arumaw ikiñankasin mä samka samkasta, ukasti walpun mulljitu, kunayman lup'ïwinakampi, unañchäwinakampix axsarañat khathatiyitu.

6 6 (3) Ukat nayax, Babilonia uraqin utjir taqi yatiñan jaqinakaruw jawsayta, kuntix uka samkax sañ munki uk nayar qhanañchapxañapataki.

7 7 (4) Ukatsti, Babilonia markan utjiri yatir jaqinaka, yatirinaka, yatiñaninaka, warawaranak uñch'ukis yatirinakaw jutapxäna, ukat nayax jupanakar samkax yatiyasta, ukampis jupanakax janiw uk qhanañchirjamäpkänti.

8 8 (5) Uka qhipat Danielax uñstani, khititix nayan diosax layku Beltsasar sutichatäki uka, Danielan jakäwipasti qullan Diosan ajayupan irpatawa, nayasti jupar samkax yatiyarakta, akham sasa:

9 9 (6) ‘Beltsasar, taqi yatir jaqinakan jilïripa, nayax yattwa qullan Diosan ajayupa jumar irpaskatapa, ukhamaraki taqi imantatanak uñt'atamsa. Jichhax kuntix samkaxan uñjkta ukanak ist'itaya, ukatsti uka samka qhanañcharakitaya.

10 10 (7) Ikt'ataskäyäta ukkhaw akham samkasta:

“ ‘Chika taypi uraqin mä jach'a quqaw utjäna.

11 11 (8) Quqasti jilsusin wali thurupuniw tukuwayxäna;

alipasti alaxpachkamaw purïna,

wali jayatpach uñtasïna, uraq tukusitsa uñstaskakïnwa.

12 12 (9) Laphinakapax wali sumänwa,

achunakapas waljapunïnwa,

taqi jaqinakar manq'ayañatakiw utjarakïna.

Pampankir laq'unakax uka quqan ch'iwiparuw ch'iwicht'asir jutapxäna;

jamach'inakas layminakapan tapachasipxäna,

taqi akapachan jakirinakax uka quqan achunakapat manq'asipxäna.

13 13 (10) “ ‘Samkaxansti akatjamat alaxpachat mä angelar saraqasinkir uñjta,

14 14 (11) uka angelax jach'at art'asisaw sarakïna:

“ ‘Uka quqa liwinukupxam;

layminakapsti khuchhurapxam,

laphinakapsa wikharapxam,

achunakapsa willitatapxam.

Ch'iwipankki uka pampa laq'unakas jaltxapxpan,

layminakapan tapachasir jamach'inakas chhuktawayxapxarakpan.

15 15 (12) Ukampis tunu aliparu, saphinakaparu pachpa uraqir qhiparayapxam;

hierrota, broncet lurat cadenanakamp ñach'antasin pampankir quranak taypin apanukupxam.

Ukarusti sullax sullxatarakpan,

pampankir laq'unakamp chik quranak manq'pan.

16 16 (13) Amuyupas mayjt'pan,

mä animalan amuyupjam tukpan,

uka jan walt'añasti paqallq maranakarakïpan.

17 17 (14) Tatitun qullan angelanakapaw juchañchäwi arunak arsuwayapxi,

ukhamat taqi jaqinakax yatipxani, alaxpachankir Diosax ch'amanïtapa,

jaqinakan marka apnaqañanakapxaru,

jupaw marka apnaqañanaksa churaraki, khitirutix churañ munki ukaru,

ukatsti mä markan jilïripat utt'ayaraki, khititix taqi jaqinakat sipan llamp'u chuymanïki ukaru.’ ”

18 18 (15) “ ‘Uka samka naya, Nabucodonosor reyix samkasta. Jichhasti Beltsasar, qhanañchita kuntix uka samkax sañ munki uka, janiw khitisa yatiñani jaqinak taypit uk amuyt'apkiti; ukampis jumax qhanañchasmawa; qullan Diosan ajayupax jumampïskatap layku.”

19 19 (16) “ ‘Danielasti, khitirutix Beltsasar sas sutichapkarakïna ukax musphataw uñjasïna, kuna lup'ïwinakatix p'iqipar jutkäna ukampi wali mayjt'ataw uñjasirakïna. Ukampis naya, reyix jupar saraktwa: ‘Beltsasar, jan jumax samkaxat llakisimti, janirak qhanañchäwipatsa llakisimti’ sasa. Beltsasarasti ukxarux sarakituwa: ‘¡Munañan rey, kuntix uka samkax sañ munki ukanakax uñisirinakamxar wakt'pan!

20 20 (17) Jumax uñjkta uka jach'a lankhu quqasti, kawkïritix alaxpachkam purkäna, ukhamarak taqi chiqatsa uñjkayäkäna,

21 21 (18) suma laphinakani, achunakapas waljaraki, taqi jaqinakar manq'ayañatakjama, pampankir laq'unakas uka quqan ch'iwipar jutapkäna, jamach'inakas layminakapar tapachasipkarakïna;

22 22 (19) uka quqax, juma reyïtawa, jiltasinsti, wali ch'amanipuniw tuktaxa. Jach'a ch'aman kankañamasti alaxpachar puriñkamaw jilxatti, munañanïñamasa taqi aka uraqpacharuw puriraki.

23 23 (20) Juma reyisti, uñjaraktawa alaxpachat mä qullan angelar saraqasinkiri, uka angelasti sarakïnwa: Uka quqa liwinukupxam, t'unjapxarakim, ukampis tunupampi, saphinakapampix pachpa uraqir qhiparayapxam; hierrota, broncet lurat cadenanakamp ñach'antasin pampa quranak taypir apanukupxam; ukarusti sullax sullxatarakpan, pampankir laq'unakamp chik quranak manq'pan, paqallq mara phuqhasiñapkama, sasa.

24 24 (21) Ukan qhanañchäwipasti akawa: alaxpachankir Diosax juma reyir juchañchañatakiw amti.

25 25 (22) Juma reyix jaqinak taypit yaqhachatäxätawa, pampa laq'unakamp chikaw jakarakïta, vacanakjamaw quranak manq'äta, janchimxarus sullaw sullantarakini. Ukhamaw juma jach'a reyix paqallq mara jakäta, alaxpachankir Diosan taqi akapachan marka apnaqäwinakxarus munañanïtapa yatiqañamkama, khitirutix jupax munki ukaru marka apnaqirit utt'ayatapa.

26 26 (23) Uka tunumpi saphinakapampi pachpa uraqir qhiparayañatak arsutaxa, mä urux juma reyix wasitat marka apnaqxäta, kunapachatix jumax alaxpachankir ch'aman Diosan taqi kunxarus munañanïtapa uñt'käta ukapacha, ukax uk sañ muni.

27 27 (24) Ukhamïpansti, reyixay, kuntix iwxkäma ukarux jaysitaya: taqi kuns chiqaparupun uñjam, janirak juk'amp juchachaskxamti, ñanqha luräwinakam apanukum, jan kunaninakar yanapt'arakim. Inas ukhamat juma reyix sumankañampina, qamir kankañampin jakaskakchisma’ ” sasa.

28 28 (25) Kunanaktix Danielax Nabucodonosor reyir yatiykäna ukanakax, phuqhasipunïnwa:

29 29 (26) Mä mara qhipatsti, reyix Babilonia markan jach'a utap patanakapan sarnaqaskäna,

30 30 (27) ukapachaw jupax säna: “Uñjapxam, kunja jach'as Babilonia markaxa. Nayaw jach'a ch'amaxamp apnaqäwixan jach'a markapäñapatak ukham lurayta, ukhamat nayan jach'a kankañaxat uñacht'ayañataki” sasa.

31 31 (28) Reyix janïraw parlañsa tukuykänti ukapachaw akatjamat mä arux alaxpachat ist'asïna: “Nabucodonosor rey, aka arunak ist'am: Marka apnaqäwimax janiw jumankxiti;

32 32 (29) jaqinak taypit apanukutäyätawa, paqallq maraw pampa jach'a laq'unakamp jakäta, vacanakjamaw quranak manq'äta, alaxpachankir Diosan aka uraqin utjir taqi markanakxarus munañanïtap uñt'käta ukkhakama, khitirutix jupax munki ukar marka apnaqirit utt'ayatapa” sasa.

33 33 (30) Ukspachaw uka arsüwinakax phuqhasïna, Nabucodonosor reyisti jaqinak taypit yaqhachatäxänwa, vacanakjamaw quranak manq'äna, sullasti jañchip ch'aranjäna, ñik'utapasa, sillunakapasa, jach'a pakan phuyunakapjama, sillunakapjamaw jilantxarakïna.

Nabucodonosor reyin k'umarachasxatapa

34 34 (31) “Kunapachatix uka juchañchäwi urunakax phuqhasxäna ukapachasti, naya Nabucodonosor reyix alaxpacha uñtta, ukatsti luqhi kankañaxat qullatätaxa amuyasirakta, ukat nayax alaxpachankir Diosar jach'añchta, aka arunakampiw wiñayatak jakiriru yupaycharakta:

“ ‘Ch'amapax wiñayatakipunïniwa;

jupan marka apnaqañapax wawanakansa wawanakapatakïniwa.

35 35 (32) Jupa nayraqatan taqi akapachankir jaqinakax janiw kunäkisa;

jupax munañaparjamaw apnaqi,

alaxpachansa, akapachansa.

Janiw khitis ch'amapar saykatirjamax utjkiti,

janirakiw khitis jupar jiskt'karakispati ¿kunatsa ukham lurta?’ sasa.

36 36 (33) “Ukapachaw nayax amuythapisxta, ukatsti markaxan apnaqäwipsa, jach'añchäwinakaxsa, ch'aman kankañaxsa wasitat katxarakta. Yanapirinakaxasa, markan jilïri apnaqirinakapas nayar thaqhiriw jutapxitu, nayasti wasitat markaxa apnaqañ qalltxarakta, ch'aman kankañaxasti nayra pachat sipansa juk'ampiw jilxattxarakïna.

37 37 (34) “Ukat jichhaxa, naya, Nabucodonosor reyix alaxpachankir Reyiru yupaychta, jach'añchta, waqaycharakta, jupan luräwinakapax chiqapapuniwa, jach'a jach'a tukurinakarusti jisk'achjarakiwa.”