ISAÍAS 25 - Qullan Arunaka DC

Diosar yuspagarañ q'uchu

1Tatay, jumätaw nayan Diosaxaxa;

nayax jumaruw yupaychsma,

muspharkañ amtatanakam phuqhatamata,

nayra pachatpach ukanakan chiqätapata,

sutimsa jach'aruw aptarakta.

2Markanaksti qala chhaxwanak tukuytaxa,

suma pirqantat markanaksti q'al t'unthaptaxa;

uñisirinakan reyi utanakapsa q'al allthaptaxa,

janirakiw mayampis utachatäkxaniti.

3Jichhax qhuru jaqinakax

jach'añchäwi churaraktamxa.

4Jumax jan kunaninakaruw arxattaxa,

khititix aynacht'atäki ukarus arxataraktawa,

jan walt'añan jumaw arxattaxa

lupinsa jumaw ch'iwiñcht'araktaxa.

Qhuru jaqinakan samanapasti

thaya pachan jach'a thayar uñtatawa,

5jan ukax waña uraqin wali lupir uñtatawa.

Uñisirinakan ch'amampi sartatapsti jumax t'unjtawa

kunjämtix lupin junt'uparux mä ch'iwimpi samaraykta ukhama.

Qhuru jaqinakarusti amukt'ayaraktawa.

6Taqi ch'aman Tatitusti,

taqi markanakatakiw Jerusalén markan

mä suma manq'äwi wakichani,

suma manq'anakampi,

suma vinonakampi.

7Uka markan Tatitux

taqi markanakan llakisiñanakap apaqxani.

8Tatitux wiñayatakiw jiwañarux t'unjani,

taqi jaqinakan jachanakapsa picharaniwa,

markapan aynacht'atapsti

taqi aka uraqpachat chhaqtayxani.

Tatituw ukham arsu.

9Uka urunsti satarakïniwa:

“Akapï jiwasan Tatitusaxa,

juparuw iyawstan, juparakiw qhispiyistu,

kusisipxañäni, k'uchirt'asipxañäni,

jupaw qhispiyistu.”

10Tatituw Jerusalén markarux imaskani,

Moab markarusti takisiniwa,

kunjämtix t'unanakax takisitäki ukhama.

11Moab markasti wasitat sartasiñ munani,

ukampis inakiw ch'amachasiskani,

Tatitux pachpak jach'a jach'a tukuñap aynacht'ayani.

12Tatitusti uka jach'a alay thuru pirqanakap liwisiyaniwa;

uraqir tinkurayat apanukuwayani.