1 REYES 14 - Qullan Arunaka DC

Ahías profetax Jeroboam reyin aynacht'añap yatiyi

1Khä urunakan Jeroboam reyin Abías sat wawapaw usut jikxatasïna.

2Ukat Jeroboam reyix warmipar säna:

—Yaqhat isthapisim, nayan warmixätam jan jumar uñt'apxañapataki, ukatsti Siló chiqar saram, Ahías profetax ukan jaki, jupaw nayar aka markan reyïñaxataki yatiyitu.

3Jupatakisti, tunka t'ant'ampi, tortanakampi, mä wayucha misk'impi apxarusiwayam, ukatsti jupan ukaru saram, aka wawasax kunänisa uk yatxatiri —sasa.

4Jeroboam reyin warmipasti ukham luräna. Wakicht'asisin Siló chiqaruw saräna, ukatsti Ahías profetan utaparuw purïna. Ahías profetax janiw sum uñjkxänti, awkïxatap laykusti nayrapax juk'at juk'at ch'amakt'askäna.

5Ukampis Tatituw juparux Jeroboaman warmipan jutañapxat yatiyatayna, usut wawapat yatxatañataki. Kunjämtix uka warmir sañapäki uk yatiyarakïnwa, yaqhat isthapit jutañapatsa.

Warmisti purisin, yaqha warmïkaspas ukhamaw tuküna.

6Ukampis Ahías profetax punkunjam mantanitap ist'asinsti, juparux sänwa:

—Jeroboam reyin warmipa, mantanim. ¿Kunatsa yaqha warmïkasmas ukham isthapista? Nayax mä jan wali yatiyäwi jumatak katuqta,

7ukhamasti kutt'xam, Jeroboam chachamar sarakim: “Israelan Tatit Diosapax akham siwa: ‘Nayaw markachirinak taypit irpsunsma, ukatsti Israel markaxan jilïripat uchsma.

8Nayaw Davidan saraqiripat marka apnaqäwi apaqta jumar churañataki. Ukampis jumax janiw Davidjamäktati, jupax kamachinakaxarux phuqhawayiwa, ukatsti taqi chuymampiw arkitäna, jupan luratanakapasti naya nayraqataxan chiqapänwa;

9ukampis jumax, jumat nayräpki uka reyinakat sipan juk'amp jan walpun sarnaqtaxa; jumax, nayar q'apisiyañatakix, hierro umatatayasin yaqha diosanaka, yaqha uñtasitanak lurastaxa, nayarusti jisk'achistawa.

10Ukat jichhax juman wila masinakamxarux jan walt'añanak apayanï: Jumat saraqir taqi yuqall wawanakaruw Israelan jiwayä; janiw khitis qhiparkaniti. Juman saraqirinakamarux q'alpun pichanukü, uywanakan thaxapax pichanukutäki ukhama.

11Markan jiwapkani uka wila masinakamarusti anunakaw manq'antani; pampan jiwapkani ukanakarusti jach'a jamach'inakaw manq'antarakini, naya Tatituwa, ukhamäñapatak amtta’” sasa.

12Ukatsti Ahías profetax Jeroboaman warmipar akham säna:

—Jumax warmi, sartasim, utamar sarxam. Kayumax markaru purisin takt'kani ukkhaw wawax jiwxani.

13Ukatsti Israel markpachaw wawatjam wal jachani, ukat imt'xapxarakini; Jeroboaman saraqiripat, jupa sapakiw amay imäwir imt'atäni. Jeroboam chachan taqi saraqiripatxa, jupa sapanak Israelan Tatit Diosapax jupatakjam aski jikxatatap layku.

14Ukxarusti Diosax Israel markxar mä rey uchani, ukaw Jeroboaman saraqirinakapar q'ala tukjani, ¡ukasti jank'akiw lurasini!

15Jichhürut uksarusti Tatitux Israel markar t'aqhisiyaniwa, kunjämtix wali jalir jawirax mä quqar qatatki ukhama. Aka suma uraqi nayra awkinakapar jupax churkän ukxa, apaqxaniwa, ukatsti Éufrates jawirat juk'amp khuriruw jaqunukuni, Astarté idolon lantinakap luratanakapata, ukampi Tatitur q'apisiyatap layku.

16Jeroboaman juchanaka luratap layku, Israel markaru jucha lurayatap laykurakiw Tatitux Israel markaru apanukuni —sasa.

17Ukatsti Jeroboaman warmipax sartasin sarawayxäna; Tirsá markaruw purxäna, ukat uta manqhir mantaskän ukkhaw wawax jiwxäna.

18Ukatsti Israel markpachaw imäwipar saräna, jupatjam wal jachapxarakïna, kunjämtix Tatitux Ahías profetap tuqi yatiykatayna ukhamarjama.

19Taqi kuntix Jeroboam chachax marka apnaqäwipan lurkän ukanakampi, atipjäwinakapampisa, Israelankir reyinakan sarnaqäwipa qillqatankiwa.

20Jeroboam reyisti pä tunka payan maraw marka apnaqäna; jupan jiwxatapatsti Nadab yuqapaw jupa lanti marka apnaqxäna.

Roboam reyin Judá uraqi apnaqatapa(2 Cr 12.1-16)

21Salomonan Roboam yuqapax Judá uraqin reyipänwa. Jupasti marka apnaqañ qalltkän ukapachax, pusi tunka mayan maranïnwa; tunka paqallqun maraw Jerusalenan marka apnaqäna. Tatituw Israelan ayllunakapankir markanakat Jerusalén marka ajllisitayna, sutipan ukankañapataki. Roboaman taykapax Naamá sutinïnwa, jupasti amonita warmïnwa.

22Judá uraqi markachirinakax jan walinak Tatitun nayraqatapan lurapxäna, nayra awkinakapan jucha luratanakapat sipansa juk'amp juchachasipxäna, ukasti walpun Tatitur q'apisiyäna.

23Jupanakasti, yaqha diosanakatakiw yupaychañ utanak lurasipxäna, ukatsti qullu patanakan qalanakata, lawanakat diosanak sayt'ayapxäna, ukhamaraki walja laphinakani quqanakan kayunakaparusa.

24Ukhamarakiw uka uraqinkir chachanakax chacha masinakapampi jan wali lurañ yatipxäna, diosanakapataki aski lurapkaspa ukhama, ukanakasti jucharar markanakana jan wali luräwinakapänwa, kawkïr markanakarutix Tatitux israelitanakan nayraqatapat jaqunukkatayna uka markanaka.

25Roboam reyin phisqa mara marka apnaqäwipansti, Egipto markankir Sisac sat reyipax sarasin Jerusalén markaruw nuwantäna,

26ukatsti Tatitun utapampita, reyin jach'a utapampit suma imatäki uka jila alani yänak katuntasïna. Taqpun apasxäna, Salomonax lurkatayna uka quri jark'aqasiñanaksa apasxarakïnwa.

27Roboam reyisti quri jark'aqasiñanak lantix, bronce jark'aqasiñanak lurayxäna, ukatsti reyin utapar mantaña uñjirinakan jilïrinakaparuw uñjapxañapataki katuyxäna.

28Sapa kuti reyix Tatitun utapar sarkän ukkhawa uñjirinakax uka jark'aqasiñanak apapxäna. Uka qhipatsti wasitat uñjirinakan utapar uchxapxäna.

29Taqi kuntix Roboam chachax sarnaqäwipan lurkäna ukanakaxa, Judá uraqinkir reyinakapan luräwinakapa sat qillqatankiwa.

30Roboam reyimpi, Jeroboam reyimpix, sapa kutiw nuwasiñankapxäna.

31Roboam reyin taykapax Naamá sutinïnwa, jupasti Amón markankirïnwa. Roboam reyix jiwxäna ukkhasti, nayra awkinakap thiyaruw Davidan markapan imt'xapxäna. Uka qhipatsti Abiam sat yuqapaw jupa lantix marka apnaqxäna.