DANIEL 7 - Qullan Arunaka DC

II. PAYÏR JALJA(7—12)Pusi axsarkañ jach'a laq'unakat unañchäwi

1Mä arumaxa, Belsasar reyix, mä mara Babilonia marka apnaqaskäna ukkhasti, Danielax mä samka samkasitayna, unañchäwinak uñjarakitayna. Ikit uñatatasinsti, kuntix samkan uñjkatayna taqi ukanak qillqsüna:

2“Nayax samkaxan pusi tuqit thayax thayt'asinkiri, jach'a qutan umanakap wal unxtayaskir uñch'ukiskäyäta.

3Ukatsti akatjamat pusi axsarkañ jach'a laq'unakax uka jach'a qutat misturanipxäna, ukanakasti sapa mayas yaqha, yaqhänwa.

4Nayrïr jach'a laq'ux mä leonar uñtatänwa, chiqhapasti jach'a pakan chhiqhapjamänwa. Nayax ukhamaw uka jach'a laq'ur uñch'ukiskäyäta, ukhamaruw chhiqhanakap jik'iqapxäna, uraqit waytasin qhipäx kayunakapxaruw sayt'asiyapxäna, mä jaqïkaspas ukhama, chuymapasti mä jaqin chuymapäkaspas ukhamaw tukuwayxarakïna.

5“Payïr jach'a laq'usti mä jukumarir uñtatänwa, maysa tuqit juk'amp waytata, maysa tuqitsti janiraki, laka ch'akhanakapan kimsa jaraphi ch'akhanak acht'atänwa; ukatsti uka jach'a laq'ur akham sapxir ist'arakta: ‘¡Sartam, sisantañkam aycha manq'antarakim!’ sasa.

6“Kimsïr jach'a laq'usti, leopardor uñtatänwa, ukampis jikhanipxarux pusi chhiqhanïnwa; pusi p'iqinirakïnwa, uka laq'urusti taqi munañanïñaw churatarakïna.

7“Nayax samkasiskakïyätwa, akatjamat pusïri laq'ur uñstanir uñjarakta. Ukasti sinti axsarkañapunïnwa, mulljaskaña, wali ch'amanirakïnwa. Laka ch'akhanakapasti wali jach'anaka hierrotkamakïnwa; manq'antasax taqi kun tukjarakïna, jilt'anaksti takisirakïnwa. Maya laq'unakat sipansa mayjapunïnwa, p'iqipansti tunka waxranïnwa.

8“Waxranak uñch'ukiñkamasti, uka waxranak taypit yaqha jisk'a waxraw jilsunïna, ukatsti kimsa waxranakxa jik'irapxänwa, ukanak lantisti qhipa mistunir jisk'a waxraw ukankxäna, uka waxrax jaqi nayrat nayranïnwa, lakapasti wali jach'a jach'a tukusaw arsüna.Diosan taripäwipa

9“Nayasti uñch'ukiskakïyätwa,

reyi qunuñanak uchapxäna,

ukatsti mä chuyman jaqiw qunt'asirakïna.

Isipax khunjam janq'ünwa,

ñik'utanakapasti t'axsit t'awrjamarakïnwa.

Qunuñapasa, uka qunuñan muyurinakapas nina lawrakamakïnwa.

10Jupa nayraqatasti mä nina jawirjamaw misturakïna.

Waranqanakaw juparux yupaychapxäna,

waranqa waranqanakaw jupa nayräxan sayt'atäpxäna.

Taripäwi qalltasinsti,

qillqatanakax jist'arataw uñjasïna.

11“Nayax ukhamaw uñch'ukiskäyäta, kuntix uka jisk'a waxrax wali jach'achasiñamp kunayman arunak parlkän uk ist'asa; uñch'ukiñkamasti uka axsarkañ jach'a laq'uruw jiwayapxäna, ukatsti jisk'a jisk'a wikhanuqapxäna, ninaruw jaquntapxarakïna ukan nakhantañapataki.

12Uka yaqha jach'a laq'unakarusti munañanïñap apaqxapxarakïna, ukampis janiw jiwarayapkänti, jan ukasti pachap puriniñapkam jakayasipkakïnwa.

13“Nayax uka unañchäwinak arumax uñjaskakïyätwa:

“Qinayanak taypin maynir jutaskir uñjta,

jaqin yuqapar uñtata,

jupasti chuymani Jilïr jaqiruw jak'achasi,

ukat nayraqatapar irpkatapxaraki.

14Jupasti munañan kankañampi,

qhapaq kankañampi katuqäna, aka uraqpach apnaqañataki,

ukatsti taqi markankir jaqinaka, kunayman arut parlir jaqinakarakiw juparux luqtapxäna.

Jupan munañan kankañapax wiñayawa,

marka apnaqäwipas janipuniw tukuskaniti.

15“Naya, Danielasti, axsarayasïyätwa; taqi kunanaktix uñjkäyäta ukanakat llakt'asisa,

16ukat nayax sayt'atäpkän ukanakat maynïriruw jak'achasta, juparuw achikt'asta taqi ukanakat nayar chiqap qhanañchañapataki. Jupasti nayarux ukanakat qhanañcharakitu akham sasa:

17“Uka pusi jach'a axsarkañ jach'a laq'unakax, aka uraqpach apnaqapkani uka pusi jach'a reyinakawa.

18Ukampis uka qhipat akapach apnaqäwix alaxpachankir Tatitun markapar katuyatäxaniwa, wiñayatakiw jupankxani” sasa.

19“Nayax juk'amp uka pusïri axsarkañ jach'a laq'ut yatxatañ munäyäta, uka laq'usti mayninakatsa mayjänwa, axtaskañarakïnwa, hierro laka ch'akhanakani, bronce sillunakanïnwa; taqi kun manq'antäna t'unjarakïna, jilt'anaksa takisirakïnwa.

20Nayax juk'amp yatxatañ munarakïyäta tunka waxrapata, ukhamaraki uka waxranak taypit mä jisk'a waxra mistunkän ukata, kawkïritix nayrani, wali jach'achasiñampi parlir lakanïkän ukata, uka jisk'a waxrasti amuyatatxa maynïr waxranakat sipan juk'amp jach'jamakïnwa, uka jisk'a waxran mistuniñapatakisti, kimsa waxranakax jalaqtxapxataynawa.

21Ukatsti, uka waxran Tatitun markapampi nuwasiskir uñjarakta, jupanakarusti atipjänwa,

22ukapachaw uka chuymani Jilïr jaqix purinïna, ukatsti Diosan markaparux chiqaparuw uñjäna, pachax phuqhasxataynawa Tatitun markapan apnaqäwi katuntasxañapataki.

23Ukatsti sarakïnwa:

“ ‘Uka pusïri axsarkañ jach'a laq'ux,

kunatix aka uraqin pusïri apnaqäwi utjkani ukäniwa,

mayni apnaqäwinakatsa mayjarakïniwa.

Taqi aka uraqpach manq'antani,

takisiniwa, t'unjarakiniwa.

24Tunka waxranakasti tunka reyinakawa,

aka uraqi apnaqapkani ukanakawa.

Jupanak qhipatsti yaqha reyiw qunt'asini,

nayrïri reyinakat sipansa mayjapunïniwa,

uka reyisti kimsa reyinakaruw aynacht'ayani.

25Alaxpachankir Diosarusti jisk'achjaniwa;

markaparus tukjarakiniwa;

Diosan kamachinakapsa, amtäwi uruyañanaksa mayjt'ayañ munarakini,

Diosan markapasti jupan apnaqatarakïniwa,

kimsa mara chikatankama.

26Ukampis uka reyix taripatäniwa,

munañanïñapasti apaqatäxaniwa,

q'ala tukjataw uñjasirakini.

27Ukatsti marka apnaqäwisa, munañan kankañasa, qhapaq kankañasa, taqi akapachankir apnaqäwinakasa,

alaxpachankir Tatitun markapar katuyatäxaniwa.

Marka apnaqäwipasti wiñayatakipunïniwa,

juparuw taqi akapachankir markanakax luqtapxani, jaysapxarakini.’

28“Ukaw uka unañchäwin tukuyäwipaxa. Naya, Danielasti, wali mayjt'atapuniw jikxatasïyäta, ajanuxas q'illuw tukuwayarakïna; ukampis janiw khitirus ukxat arskti.”