2 CRÓNICAS 28 - Qullan Arunaka DC

Ahaz reyin Judá marka apnaqatapa(2 R 16.1-20)

1Ahaz reyix, pä tunka maranïkän ukkhaw Judá marka apnaqañ qalltäna, jupasti Jerusalén markan tunka suxtan maraw marka apnaqäna; ukampis jupan luräwinakapax Tatit nayraqatan janiw David nayra awkipan luräwinakapjam chiqapäkänti,

2jan ukasti, Israelankir reyinakan sarnaqäwiparuw arkäna, jupasti metal umatatayasin Baal diosan lantinakap lurayäna,

3Ben-hinom qhirwan incienso nakhayäna, wawanakaparusti wilañcha luqtasin nakhantayäna, kawkïr markanakarutix Tatitux israelitanak nayraqatat jaqunukkatayna ukanakan axtkañ luräwinakap lurasa.

4Ukhamarus qullu patanakan utjir yaqha diosanakar yupaychañ utanakana, ukhamarak walja laphinakani quqa kayunakan wilañchanak luqtäna, inciensonaksa nakhayarakïna.

5Ukat Tatit Diosapax siriankir reyin amparapar jupar katuyäna, sirio jaqinakasti atipjasinxa, walja katurat jaqinak Damasco markar apapxäna. Ukatsti Tatitux Israelan reyipan amparaparuw katuyarakïna, jupasti q'ala atipjataw uñjasïna.

6Remalías chachan Pécah yuqapasti, mä urunak Judá uraqinxa pataka pä tunkan waranqa wali aytat jaqinakar jiwarayäna, jupanakan nayra awkinakapan Tatit Diosaparu apanukupxatap layku.

7Efraín ayllunkiri, Zicrí sat wali nuwasir jaqix reyin yuqapa Maaseiasaruw jiwayäna, ukatsti reyi uta uñjir Azricam jilïriparu, reyin wali aytat jilïriparux jiwayarakïnwa.

8Ukxarusti Israelankir soldadonakax pä pataka waranqa jaqinak katuntapxäna, Judá uraqinkiri warminakata, yuqalla, imilla wawanakata, ukatsti walja yänak katuntasisax Samaria markaruw apasxapxäna.

9Uka markansti Tatitun mä profetapaw utjäna, Oded sata, jupasti ejerciton Samaria markar mantasinkiriruw jikxatäna, jupanakarusti sarakïnwa:

—Nayra awkinakaman Tatit Diosapan Judá markatak q'apisitap laykuw, jumanakan amparamar uka marka katuyapxtam. Jumanakasti wali qhuru chuymampiw jupanakarux jiwayapxtaxa, uka luratanakamax alaxpachkamaw puri.

10Ukhamarus jumanakax, Judá, Jerusalén markanakan wawanakaparux, chacharusa warmirusa jumanakan luqtirimaruw tukuyañ munapxtaxa. ¿Janiti jumanak pachpasti Tatit Diosam nayraqatan jucha lurapkaraktasti?

11Ukhamïpansti jaysapxita, apanipkta uka katuntat jaqinak antutnukxapxam, jupanakax jumanakan jilanakamawa, Tatitux jumanakatakix wali q'apisitawa —sasa.

12Ukatsti Johanán chachan Azarías yuqapa, Mesilemot chachan Berequías yuqapa, Salum chachan Ezequías yuqapa, Hadlai chachan Amasá yuqapa, jupanakax Efraín ayllun wali aytat jilïrinakapänwa, jupanakasti Obed profetan arunakap ist'asax, soldadonakan nayraqataparuw sayt'asipxäna,

13jupanakarusti sapxarakïnwa:

—Jan uka katuntat jaqinakarux akar irpanipxamti, uka luratax Tatitun nayraqatapan juchanit uñt'ayistani. Kuntix jumanakax lurañ munapkta ukampix jiwasan juchanakasa, jan walt'añanakasak juk'amp yapt'asiñäni, Tatitusti Israelampix juk'ampiw q'apisini —sasa.

14Ukat soldadonakax katuntat jaqinakarux antutnukxapxäna, kuna yänaktix aparapkatayna ukanaksti, jilïrinakana, taqi jaqinakan nayraqataparuw uchxapxäna.

15Ukatsti uka pusi jilïri chachanakaw katuntat jaqinakarux uñjapxäna, ukatsti kawkïr yänaktix aparapkatayna uka pachpat isinak apsupxäna, jan isininakaru isthapiyañataki, jupanakarux isinakampi wiskhunakampi churapxäna, ukhamaraki manq'aña, umaña churapxäna, usuchjatanakarux qullt'apxarakïnwa, jan sartirjamäki ukanakarusti asnor qunxatayasin Jericó markar apxapxäna, palmeranakani markaru, ukatsti jupanakarux wila masinakap thiyaruw jaytanxapxäna. Ukham lurasin Samaria markarux kutt'anxapxäna.

16Uka urunakansti, Ahaz reyix khithanak Asiria markar khithäna reyipat yanap mayiñataki,

17Edom uraqinkir jaqinakax wasitat mantantasin, Judá markarux atipjapxatayna, ukatsti mä qawqha jaqinakar katuntasin apapxarakitayna.

18Mä tuqitsti, filisteonakax Judá uraqinkir Néguev markampita, pampankir markanakampitxa q'al lunthatsupxatayna; ukatsti Bet-semes, Aialón, Guederot, Socó, Timná, Guimzó sat markanak katuntasipxatayna jisk'a markanakapamppacha, ukatsti uka markanakan utjantasipxarakitayna.

19Tatitux Judá markankir Ahaz reyin juchap laykuw Judá markarux ukham jisk'achjayäna.

20Asiriankir Tiglat-piléser sat reyisti, Ahaz reyir yanapt'kamayax, jupamp nuwasiñatakiw sarantäna, ukat jan walt'añar puriyäna.

21Ahaz reyix, Asiria reyir churañatak Tatitun utapata, reyin utapata, jilïrinakan utanakapat jila alan yänak apsunkchïna ukasa, janiw ukampix kunsa jikxatkänti.

22Jan walin uñjaskasasa, Ahaz reyix, Tatit nayraqatan jucha luraskakïnwa. ¡Ahaz reyix ukhamänwa!

23Jupax Damasco chiqankir diosanakaparuw wilañchanak luqtäna, jupar aynacht'ayki uka diosanakaru. Jupax akham amuyäna: “Siriankir diosanakax reyinakaparux yanapt'iwa, uka diosanakaparutix wilañchanak luqtä ukaxa, nayarux yanapapxarakitaniwa” sasa. Ukampis uka luratanakapaw juparu, Israel markpacharux aynacht'ayäna.

24Ahaz reyix Tatitun utapan utjir yänak apthapisin jisk'a jisk'a tukjäna, Tatitun uta punkunakapsa jist'antayänwa, ukatxa Jerusalén markan taqi chiqan yaqha diosanakan altaranakap lurayäna.

25Judá uraqin markanakapansti yupaychañ utanak lurayäna, inciensonak yaqha diosanakar nakhayañataki, ukhamat nayra awkinakapan Tatitu Diosapar q'apisiyasa.

26Ahaz reyin ukat ukxar sarnaqäwipasa, kuntix lurkäna ukanakasa, qalltat tukuykamax Judá, Israel markankirinakan reyinakapan qillqatapankiwa.

27Jupax jiwxäna ukkhasti, Jerusalén markan nayra awkinakap thiyaruw imt'xapxäna, janiw juparux Israelankir reyinakan amay imäwiparu apapkänti. Uka qhipatsti jupa lantix, Ezequías yuqapaw marka apnaqxäna.