OSEAS 9 - Qullan Arunaka DC

Oseas profetax Israel markan mutuyäwip yatiyi

1Israel marka, jan kusiskamti;

janirak yaqha markanakjamas kusisiñat thuqunaqkamti,

Diosamar apanukusaxa,

yaqhanakampiw wachuqa juchanak lurtaxa.

Grano jawq'añ chiqanakan yaqhampi jan wal sarnaqatamatxa,

paylla katuqañ muntaxa.

2Israel markax janiw trigsa, vinsa uñjkaniti;

machaq vinopasti janiw kunatakïkanisa.

3Israelax Egipto markaruw kuttxani,

Asiria markansti q'añu manq'anak manq'arakini.

Janiw jichhax juk'ampi Tatitun markapan jakxapxaniti:

4Janiw Tatitur jach'añchas juk'ampi vino umkxapxaniti,

janirakiw ukan wilañchanak jupar luqtapkaniti.

T'ant'a manq'atanakapas llaki t'ant'jamäniwa,

khitinakatix manq'apkani ukanakax q'añur tukutäniwa.

Uka t'ant'anakax jupanakatakikïniwa,

ukampis janiw Tatitun utapar apapkaniti.

5¿Kunsa jumanakax jach'a phunchhäwi urun lurapxäta,

Tatitun uka jach'a phunchhäwi urupanxa?

6Jumanakax t'unjatäñat jaltxapxäta ukaxa;

Egiptonkirinakaw katurapxätam,

ukatsti Menfis chiqar allintatäpxätawa.

Qullqit lurat yänakamasti itapallumpi phuqhantatäniwa,

utjäwinakamansti ch'aphinakaw jilantarakini.

7¡Mutuyäwi urunakax purinxiwa!

¡Luratanakamat katuqañ urux purinxiwa!

¡Israel markax ukanakan puritap yatirakiniwa!

Jumanakasti sapxtawa: “Profetax pisi amuyt'an jaqiwa,

suma amuyt'ayat jaqisti luqhirakiwa” sasa.

Ñanqha lurañanakampi phuqhantatäpxatamata,

uñisiñanakaman jach'ätapat ukham sapxtaxa.

8Tatitusti profetaparux Israel markar uñjañapatakiw uskusi,

ukampis jumanakax sarnaqäwinakaparux sipitanak uskupxtaxa;

Tatitun utapansa uñisisipkaktawa.

9Guibeá markan urunakapanjam

ñanqha lurañanakapampix q'al aynacht'xapxi.

Ukampis Tatitux ñanqha luratanakapat amtasiniwa,

juchanakapatsti mutuyarakiniwa.

Israel markax jucha luratapat t'aqhisini

10Tatitux siwa:

“Kunapachatix Israel markar jikxatkäyät ukapachax kusisiyätwa,

kunjämatix wasaran uva jikxatirix kusiski ukhama.

Nayra awkinakamax nayatakix,

nayrawir achuqir higonakjamänwa.

Ukampis kunapachatix Baal-peor chiqar puripki ukkhaxa,

k'ari diosanakaruw yupaychapxi,

ukatsti wali jisk'achkañaw tukupxi,

jupanakax munapkänsa uka yaqha diosanakjama.

11Israelan jach'a kankañapasti, jamach'ir uñtataw sarawayxani.

Janiw juk'ampi wawanakas yurkxaniti,

janiw usur warminakas utjkxaniti,

janirakiw warminakas usur jaqiptkxapxaniti.

12Wawanakapar uywasipkchini ukasa,

uka wawanakap jan mayan aparäxa.

¡Jupanakar apanukkä ukapachaxa, kunakïkani aka jaqinakatxa!

13Israel markasa, Tiro markasa amuyatax kipkakïpxiwa,

paypach markanakaw suma uraqinakanïpxi,

ukampis Israelax jiwañ thakhiruw wawanakaparux irpaski.”

14¡Tatay, kunatix churañamäki uk churam!

¡Jan wawachasiri, phara ñuñuni warminak churarakim!

Tatitun Israel markatak q'apisitapa

15Tatitux siwa:

“Guilgal chiqan taqi jan walinak lurapxäna,

ukkhanrak jupanakar uñisiñ nayax qalltta.

Jan wali luräwinak lurapxatapatxa;

utaxat ananuküwa,

janirakiw juk'amp munkxäti,

taqi jilïrinakapasti nayatak sayt'asirkamakiwa.

16Israelax chhuxriñchjatawa;

saphi wañsuta

jan achur quqar uñtatawa.

Wawanakanïkchinisa,

uka wawanakaparux nayaw jiwarayä.”

17Aka markax

janiw Tatituxarux ist'añ munkiti;

ukat Tatituxax jupanakar apanukuni,

ukatsti markat marka muyupxarakini.