1 1 (2) Jan qarjasisaw Tatiturux jach'añchä,
lakaxax jupar jach'añchapuniniwa.
2 2 (3) Ajayuxax Tatitunkasaw jach'achasi;
¡llamp'u chuymaninaka, ist'apxam, kusisipxam!
3 3 (4) Tatitun jach'a kankañap
taqpachan yupaychapxañäni.
4 4 (5) Tatituruw nayax art'asta, jupasti ist'ituwa,
taqi llakinakaxatarak irpsutu.
5 5 (6) Jupar uñtirinakasti,
kusisitaw qhiparapxani,
janipuniw p'inqachat uñjasipkaniti.
6 6 (7) Tatitur art'asir llakit jaqirux, jupax ist'iwa,
taqi llakinakapat qhispiyaraki.
7 7 (8) Tatitun angelapaw iyawsirinakarux uñjaski,
Tatitur waqaychirinakarus imaskaraki.
8 8 (9) Yant'apxam, uñjapxarakim,
Tatitux suma jaqiwa.
¡Jupar taqi chuymamp makhatirix kusisiñaniwa!
9 9 (10) Jupan qullanañchat jaqinakapa,
Tatitur axsartapxam,
jupar axsartirinakarux janiw kunas pist'kaniti.
10 10 (11) Qamirinakax jan kunaniruw tukupxi,
manq'at t'aqhisipxaraki,
Tatitur thaqhirinakasti janiw kunatsa t'aqhisipkaniti.
11 11 (12) Wawanakaxay, jutapxam, ist'apxita:
Tatitur axsartañ yatichapxäma.
12 12 (13) ¿Walja maranak jakañ munasmati?
¿Taqi kunan phuqt'at jakañ munasmati?
13 13 (14) Ukhamax ñanqha arunak jan arsumti,
janirak k'ari arunaksa parlamti.
14 14 (15) Ñanqha lurañat jithiqtasim,
askïki ukakpun luram,
sumankañ thaqham, qhipap arkarakim.
15 15 (16) Tatitux aski jaqinakaruw imaski,
arnaqasitanakaparus ist'arakiwa.
16 16 (17) Tatitux ñanqha luririnakatakiw sayt'i,
aka uraqit jupanakar chhaqtayañataki.
17 17 (18) Tatitux aski jaqin arnaqasitaparux ist'iwa,
taqi llakinakapatsa waysurakiwa.
18 18 (19) Tatitux llakimpi aynacht'atanakan jak'apankaskiwa,
aynacht'at chuymap qhispiyañatakix jak'apankaskiwa.
19 19 (20) Tatitunkirinakax t'aqhisiñankapxiwa,
ukampis Tatituw uka t'aqhisiñanakar atipjañ yanapi.
20 20 (21) Tatituw jupanakarux imaski,
janiw kuna jan walt'añas jupanakxar purkaniti.
21 21 (22) Ñanqha lurir jaqirux
pachpa ñanqha luratapaw jiwayi,
aski jaqir uñisirinakasti mutuyatäpxaniwa.
22 22 (23) Tatitusti uywatanakaparux qhispiyiwa;
¡jupar iyawsirinakax janiw juchañchatäpkaniti!
Who We AreWhat We EelieveWhat We Do
2025 by iamachristian.org,Inc All rights reserved.
