JUECES 11 - Qullan Arunaka DC

Jefté

1Jefté sat chachax, Galaad chiqankir jan axsaras nuwasir jaqïnwa. Jupasti mä jan wali sarnaqir warmimpina, Galaad sat chachampin wawapänwa,

2Galaad chachan warmipasti jupatak yaqha wawanakampi wawachasirakitayna, uka wawanakasti jilsxasinxa, Jefté waynarux utat alisnukxapxäna, juparusti sapxänwa: “Jumax yaqha warmin wawapätawa, janiw jumarux awkixan yänakapat kunas wakt'ktamti” sasa.

3Ukat Jefté waynax jilanakap jak'at jaltxäna, Tob chiqaruw jakir sarxäna, ukawjansti mä tama qhuru jaqinakampiw jikisxäna, ukanakasti jupamp chikaw jan wali lurañanakan sarnaqxapxäna.

4Mä qawqha pachatsti amonitanakax israelitanakampi nuwasiñaruw mantapxäna,

5Galaad chiqankir jilïrinakasti, Jefté waynaruw Tob uraqit irptayanipxäna,

6juparusti sapxänwa:

—Jutam, amonitanakampi nuwasiñanxa, nanakan jilïrïñam munapxta —sasa.

7Jefté chachasti sänwa:

—¿Janit jumanakasti nayar uñisisa awkixan utapat alisnukunipkistasti? ¿Jan walt'añankasa uñjasisakit jichhasti nayan ukar jutapxtasti? —sasa.

8Jupanakasti sapxänwa:

—Chiqpachansa ukham jan walt'añankasapï jumar thaqhir jutapxsmaxa. Nanakax jutañam munapxta, nanakamp chika sarasin amonitanakampi nuwasiñama, ukhamaraki Galaad chiqan taqi jakirinakan jilïripäñama —sasa.

9Jefté chachasti sänwa:

—Jumanakatix amonitanakampi nuwasiñaxataki nayan kutt'añax munapxsta; ukat Tatitutix amonitanakar atipt'ayitani ukaxa, nayax jumanakan jilïrimäyäwa —sasa.

10Ukxarusti Galaad chiqankir jilïrinakax sapxänwa:

—Tatituw uñjaskistu, arsutamarux phuqhapxäwa —sasa.

11Ukhamasti Jefté chachax jupanakampiw saräna, ukatsti markax jilïr irpiripat utt'ayäna. Mispá chiqansti, Jefté chachax Tatit nayraqatan kuntix arskatayna uk wasitat arsüna.

12Uka qhipatsti, Jefté chachax amonitanakan reyipan ukaruw yatiyirinak khithäna, akham jiskt'iri: “¿Kuna ñanqharak jumampi nayampi lurastansti, nayatak sayt'asin markaxampi nuwasir jutañamatakisti?” sasa.

13Amonitanakan reyipasti Jefté chachan yatiyirinakaparux sänwa: “Jumanaka israelitanakax Egiptot mistunisinxa, nanakan uraqinakax aparapxista, Arnón jawirat qalltasina Jaboc, Jordán jawiranakkama. Jichhasti, uka uraqinak sumatak kutt'ayxapxita” sasa.

14Jefté chachasti wasitat yatiyirinak amonitanakan reyipan ukarux khithäna,

15akham sasa: “Jefté chachax akham siwa: Nanak israelitanakax janiw moabitanakaru, amonitanakarusa uraqinakap apaqapkti.

16Kunapachatix Egiptot mistunipkta ukkhaxa, wasaranjam sarakipasaw Mar Rojo qutakam purinipxta, ukatsti Cadés chiqaruw puripxta.

17Ukapachasti Edom markan reyipan ukaruw mä yatiyirinak khithapxta, uraqinakap chiqa sarakipañatak mayisa, ukampis jupax janiw uraqinakap chiqa sarakipayañ munapkituti. Moab markan reyiparusa mayipxaraktwa, jupasti janirakikiw sarakipayañ munapkituti. Ukat nanakax Cadés chiqan qhiparapxta.

18Ukatsti, wasaranjam sarasinxa Edom, Moab uraqinak chiqa muytawayapxta, Moab chiqata inti jalsu tuqir puriñkama, ukatsti ukawjaruw utjnuqtapxta, Arnón jawirat mayskataru. Ukampis janiw makhatapkti, ukawjat Moab uraqinakan qalltatap layku.

19Ukat nanakax, Hesbón chiqankir Sihón sat amorreo reyin ukaru yatiyirinak khithapxta, uraqinakap chiqa sarakipañatak mayiri, ukat sarakipasin uraqinakaxar puriñataki.

20Ukampis Sihón reyix nanakat jan wal amuyasin, janiw uraqinakapnäm sarakipayañ munapkituti; jan ukasti, taqpach ejercitop tantacht'asïna, ukatsti Jahas chiqar utjnuqtasin nanakar katuntapxitu.

21Ukampis Israel markapan Tatitu Diosapaw Sihón reyin ejercitoparu atipt'ayapxitu, ukat nanakax taqi uka chiqankiri amorreonakan uraqip katuntasipxta:

22amorreonakan taqpach uraqipatxa, Arnón jawirata Jaboc chiqakam katuntasipxta, ukhamarak wasar chiqata Jordán jawirkama.

23¿Jichhasti jumax, kuna uraqinaktix Tatitux amorreonakat apaqasin churapkitu uka uraqinakatti alisnukuñ munapxista?

24Quemós diosamatix mä kunsa jumankañapatak churätam ukaxa, jumax ukanakxa jumankirit uñt'astaxa, ¿janich ukhamäkixa? Uka kipkarakiw nanakax kuntix Tatitux nanakar churapkitu ukanakxa, nanakankirit uñt'asxapxta.

25¿Jumasti Moab reyin, Sipor chachan Balac yuqapat sipan jilt'atapunit amuyasta? Jupax janiw nanakampi nuwasir jutkiti.

26Nanakasti Hesbón, Aroer uraqina, ukhamarak uka jak'ankir uraqinakansa, Arnón jawir thiyankir markanakansa kimsa patak maraw jakxapxta, ¿kunatarak jumanakasti uka uraqinakat taqi uka maranakan jan arsusipktasti?

27Nayax janiw jumarux kuna jan walsa lurksmati. Jumaw nanakampi nuwasir jutasax jan wal lurasipkista. Ukampis Tatituw chiqapar uñjirixa, jupaw israelitanakampiru, amonitanakampirux taripaskani” sasa.

28Jefté chachan yatiyäwi arunakap ist'kasinsa, amonitanakan reyipax janiw jayskänti.

Jefté chachan arsutapa

29Uka qhipatsti Tatitun ajayupaw Jefté chachxarux jutäna, ukat jupax Galaad, Manasés uraqinak sarakipäna, Galaad chiqankir Mispá sarakipasa, amonitanakan uraqip katuntasiñataki.

30Jefté chachasti Tatituruw arsüna, akham sasa: “Jumatix amonitanakar atipjayität ukaxa,

31nayax nakt'at wilañcha luqtäma, khititix utaxat nayraqat nayar katuqir mistunkani ukaru” sasa.

32Jefté chachax amonitanakan uraqinakapar mantaranttasin jupanakarux katuntäna, Tatitusti juparux atipt'ayänwa.

33Jefté chachax walja uñisirinakaparuw jiwarayäna, ukatsti pä tunka markanak katuntarakïna, Aroer markat qalltasin, Minit, Abel-queramim markakam purisa. Ukhamat israelitanakax amonitanakar apnaqäna.

34Kunapachatix Jefté chachax Mispá chiqankir utapar kutt'xän ukkhasti, phuchhaw thuqt'asisa, panderetanak chhulluqt'ayasis jupar katuqir mistunïna. Jefté chachax uka sapa phuchhanikïnwa, janiw yaqha wawanakapax utjkänti,

35phuchhapa jutir uñjasinsti, Jefté chachax llakisiñat isip ch'iyanuqasïna, ukatsti sänwa:

—¡Ay, imill wawaxa, walpun llakthaptayista! ¡Jumapunïñamänti nayan chijir puriñaxatakisti! Nayax Tatituruw arsta, jichhasti uka arsutaxa jupar phuqhañaxawa! —sasa.

36Ukat phuchhapax säna:

—Awkixay, kuntix Tatitur arskta ukxa nayampix luraskakim, jupasti arsutaparux phuqhiwa amonita uñisirinakamar atipjayasa.

37Ukampis nayax may achikt'asiñ munsma, qullunakan tawaqu masinakaxampi jacht'asis sarnaqt'awayañaxatak pä phaxsiy churita, jan jaqichasis jiwañaxataki —sasa.

38Jefté chachasti phuchhaparux uka pä phaxsi churäna, uka phaxsinxa jupax tawaq masinakapampiw qullunakan sarnaqäna jacht'asisa, jan jaqichasis jiwañap yatisa.

39Uka pä phaxsi phuqhasxipansti, jupax awkipan ukaruw kutt'xäna, awkipasti Tatitur arskatayna ukhamarjamaw phuqhäna. Jefté chachan phuchhapax chacha jan uñt'asaw jiwxäna.

40Ukat israelitanak taypin uka saräwix utji, sapa maraw tawaqunakax tantachasipxi, Jefté chachan phuchhapat pusi uru jachañataki.