FILEMÓN QALLTA ARUNAKA - Qullan Arunaka DC
QALLTA ARUNAKAPablox katuntat jikxataskäna ukkhaxa, Onésimo sat mä k'itha uywataw akatjamat jupamp jikisïna, ukatsti Tatitun arunakap tuqiw qhispiyasïna, Pablon lurañanakapan yanapt'asirakïna. Jupax Pablotaki mä suma yanapt'änwa. Ukampis romanonakan kamachiparjamax uywiripar kutt'ayxañaw wakisïna. Uka uywat jaqin uywiripasti Jesusar iyawsir jaqïnwa, Filemón sutini; juparusti Pablox sumrak uñt'äna, Filemón jilatax wali yäqat jaqïnwa, ukhamarus amuyatatxa Colosas iglesian mä jilïrïnwa. Pablox Onesimorux uywiripan ukaruw khitxäna, Filemón jilatarusti mä qillqat apayäna, uywatapar sum katuqañapataki, jan mä t'aqhisit uywatar uñtatxa, jan ukasti, iyawsañanxa maynïr jilaparjama.Aka qillqatax mä suma uñtasïwiwa, suma amuyumpi, munasiñampi, khuyapayasiñ chuymampi qillqatätapata; Pablox janiw Filemón jilatarux maykänti Onesimon taqi jan walinak luratapat kutsuyasiñapa. Jan ukasti, munasiñ chuymampi jupar uñjañapatakiw mayïna.Janiw sum yatiskiti Pablo apostolux kunapachatix aka qillqat qillqkäna ukkhax kawkhan kantuntatas jikxatasïna ukaxa, yaqhipanakax Roma, Cesearea jan ukax Éfeso uka markanakan katuntatäpachänwa sapxiwa, janirakiw kuna maransa qillqkatayna ukas sum yatiskiti.
