HECHOS 21 - Qullan Arunaka DC

6. Pablor katuntapxatapampita, Roma markar saratapampita(21.1—28.31)Pablon Jerusalén markar saratapa

1Éfeso marka iglesiankir jilatanakar jaytxasinsti, barcoruw mantxapxta, ukatsti Cos sat wat'arux chiqak sarxapxta. Qhipürusti, ukat sartasin Rodas sat wat'a tuqiruw sarapxarakta, ukawjatsti Pátara sat wat'a tuqirurakiw sarapxta.

2Pátara markansti mä barco jikxatapxta Fenicia markar saraskiri, uka barcot sarxapxta.

3Sarkasinsti, Chipre sat wat'a ch'iqäx tuqi uñtapxta. Siria markakamaw sarapxta, ukatsti Tiro markaruw puripxta, barcon irnaqirinakaw q'ipinak ukan jaytañapäna, ukat ukar mistupxta.

4Ukansti iyawsir jilatanakaruw jikxatapxta, ukatsti paqallq uruw jupanakamp qamarapxta. Jupanakasti Qullan Ajayun yatiyataw Pablor achikt'apxäna, Jerusalenar jan sarañapataki.

5Ukampis ukat paqallq ururusti saraskakiñatakiw mistuwayxapxta. Jilatanakasti warminakampi, wawanakampi kunaw nanak chikarak marka anqäxkam sarapxi. Quta thiyar purisinsti killt'asisaw Tatitur mayisipxta.

6Ukatsti jupanakamp qhumantasisin jaytjawayxapxta, nanakasti barcoruw mantxapxta, jupanakasti utanakaparuw kutt'xapxi.

7Nanakax barcot sarasipkaktwa, Tiro markata, Tolemaida markar puriñkama. Ukansti iglesiankir jilatanakampiw jikisipxta, ukürusti jupanakampiw qamart'apxta.

8Qhipürusti ukawjat mistuwayasin waña uraqinjam sarasax Cesarea markaruw puripxta. Ukansti Felipen utapan qamarapxta, jupasti Diosan arunakap yatiyirïnwa, apostolunakan paqallqu yanapirinakapat maynïrïnwa.

9Felipesti pusi phuchhanïnwa, jupanakasti Diosat katuqat arunak parlirïpxänwa.

10Walja urunakaw Cesarea markankxapxäyäta, ukapachaw Judea uraqit Agabo sutin mä profetax purini.

11Jupasti nanakaruw jak'achasini, ukatsti Pablon cinturonap katusin kayunakapampi, amparanakapamp ñach'antasi. Ukat saraki:

—Qullan Ajayux akham siwa: “Jerusalenanxa, judionakax aka cinturonanirux akham ñach'antapxani, ukatsti Roma apnaqir jilïrinakaruw katuyapxani” —sasa.

12Uk ist'asinsti nanakampi Cesareankir jilatanakampix, Pabloruw achikt'apxta Jerusalenar jan sarañapataki.

13Ukampis Pablox sänwa:

—¿Kunatsa jachapxta? Ukham jachasax nayar llakisiyapxistawa. Nayax ñach'antayasiñatakisa, Jerusalén markan Tatit Jesús layku jiwañatakis wakicht'atakïsktwa —sasa.

14Jan kunjämat jupar jark'añjamïpansti, nanakax sapxtwa:

—Tatitun munañapak lurasxpan —sasa.

15Uka urunak qhipatsti, wakicht'asisin Jerusalén markaruw sarxapxta.

16Cesarea iglesiankir mä qawqha jilatanakax nanak chikaw sarapxi. Jupanakasti Mnasón sat mä chachan utaparuw irpapxitu, ukat utapan qurpachasipxta. Mnasón chachax jaya maranakaw Tatitur arkatayna, jupasti Chipre wat'ankirïnwa.

Pablox Santiagoruw tumpt'i

17Jerusalenar purxapxta ukkhasti, iyawsir jilatanakax wali kusisiñampiw katuqapxitu.

18Qhipürusti Pablox nanakamp chikaw Santiagor tumpt'ir saräna. Iglesiankir jilïr jilatanakasti ukankasipkarakitaynawa.

19Aruntasinsti, Pablox jupanakar taqi kuntix Diosax jupa tuqi jan judío jaqinak taypin lurkatayna ukanak mayat mayat yatiyi.

20Ukanak ist'asinsti jupanakax Diosaruw wal yuspagarapxäna. Pablorusti sapxänwa:

—Walikiw jilata, walja judío jaqinakaw Jesusar iyawsapxi, jumax niy uñjtawa. Ukampis taqi jupanakax sapxiwa: “Moisesan kamachinakap phuqhañax wakisiskakiwa” sasa.

21Jupanakax yaqha markan jakir judionakar akham yatichatam yatipxi: “Moisesan kamachinakapar janiw jaysañäkiti, yuqall wawanakarusti janiw circuncisión luräwi katuqayañäkiti, janirakiw jiwas judío jaqinakan saranakasarjam sarnaqañax wakiskiti” sasa.

22¿Kuns lurañäni, jaqinakatix akankatam yatipxani ukkhasti?

23Jichhasti akham luräta: Nanak taypin pusi chachaw utji, Diosar arsupkatayna uk jichhürunakan phuqhañapäsipkiwa.

24Jupanakar Tatitun utapar irpam, ukatsti jupanakamp chik q'umachasiñ luräwi phuqham, ñik'utanakap mururayasipxañapatakisti qullqim churam. Ukhamat taqinis amuyapxani kuntix jumxat arsupki ukan jan chiqätapa, Moisesan kamachipsa sum phuqhaskatama.

25Jan judío iyawsirinakarusti nanakax amtapkta uka qillqat apayapxta, akham sasa: “Idolonakar luqtat animalanakan aychap jan manq'apxamti; janirak wilap umapxamti, kunkat jaychjat jiwayat uywanaksa jan manq'apxamti, janirak kuna wachuq jucha lurañanakansa sarnaqapxamti” sasa.

Diosan utapan Pablorux katuntapxi

26Ukatsti Pablox uka pusi jaqiruw irpxarusiwayi, qhipürusti jupanak chikaw q'umachasiñ luräwi phuqhi. Ukatsti Tatitun utaparuw manti, kunürutix juchat q'umachasiñ urux tukusiñapäki uk jupanakar yatiyañataki, ukhamat sapaqat mayni apanipxañapäki uka waxt'äwinak luqtañataki.

27Niya paqallq uru phuqhasirjamäxipansti, Asia suyut jutir mä qawqha judionakaw Pablor Tatitun utap manqhan uñjasin ukspach jaqinakar uxtayapxi. Pablorusti katuntapxarakiwa,

28jach'at arnaqasisa: “¡Israelitanaka, yanapt'apxita! ¡Aka jaqiw taqi chiqan markasataki, Moisesan kamachipataki, Tatitun utapatak jan walinak yatichas sarnaqi! Jichhasti jan judío jaqinakaruw Tatitun utapar irpantaniraki, qullan Chiqäwja q'añuchayasa” sasa.

29Jupanakax Pablor Éfeso markankir Trófimo sat chachampi markan sarnaqaskir uñjapxatayna, ukat ukham sapxäna, Pablox uka jaqir Tatitun utaparus irpankaspa ukham amuyapxatayna.

30Jaqinakasti markpachaw uxtapxäna, jalakam ukawjar purinisinsti, mäkiw Pablor katuntasin templo anqäxar qatatsunipxäna, ukspachaw punkunak jist'antapxarakïna.

31Pablor jiwayañatakïxapxän ukapachasti, romano soldadonakan jilïriparuw yatiyapxäna, Jerusalén markpach uxtapxatapata.

32Uk yatisin jupax, ukspachaw soldadonakampiru, jilïrinakapampir irpxarusin jalakamakiw uka chiqar puripxäna. Jaqinakasti soldadonakampiru, jilïripampir uñjasinxa, janiw Pablorux nuwjapkxänti.

33Jilïristi jak'achasisin Pablorux katuntäna, ukatsti pä cadenampiw ñach'antayäna. Ukat jaqinakar jiskt'araki: “¿Khitis aka jaqixa? ¿Kunarak lurataynasti?” sasa.

34Jaqinakasti wal ch'axwapxäna, kunayman arnaqasa. Jilïristi uka ch'axwanakampix janiw kuns jiskt'irjamäkänti; ukat Pablorux cuartelar irpayxäna.

35Cuartelan makhatañanakapar purisinsti, soldadonakax Pablorux q'ipxaruwayxapxänwa, jaqinakan jan nuwjapxañapataki;

36taqiniw wali arnaqt'asis qhipat arkapxäna: “¡Jiwayapxam!” sasa.

Pablox markachirinak nayraqatan arsusi

37Soldadonakax Pablor cuartelar irpantañatakïsipkän ukapachaw jupax soldadonakan jilïripar jiskt'äna:

—¿Mä qawqha arunak arst'asiristti? —sasa.

Jilïristi mayjt'ataw säna:

—¿Griego parlañ yatiraktati?

38¿Janit jumax sayt'asiñatak pusi waranqa jaqinak wasarar ansuwayki uka egipcio jaqïktasti? —sasa.

39Pablosti sänwa:

—Janiwa, nayax Tarso markan yurir judío jaqïtwa, Cilicia suyunkir wali aytat markatätwa. ¿Jaqinak nayräxan arst'asiyitasmati? —sasa.

40Jilïristi Pablorux: “Arst'asiskakim” sänwa, Pablosti makhatañanakar sayt'asisin jaqinakan amukt'añapatak ampar ayti, jaqinakasti taqiniw amukt'apxäna. Jupasti hebreo arut jupanakar parläna, akham sasa: