OSEAS 5 - Qullan Arunaka DC

1-2“Sacerdotenaka, aka arunak ist'apxam;

Israel marka apnaqirinaka, ist'asipxam,

reyin utapan utjirinaka, ist'apxarakim:

Nayan markaxar sallqjapxatamatsti,

taripasin mutuyapxäma.

Israel markaxarux juk'amp kutkatasir tukuyapxtaxa.

Mispá, Tabor uka qullan utanakan

munkir jan munkir yaqha diosanakar yupaychayapxtaxa.

3Israelitanaka,

Nayax jumanakan sarnaqatanakam yattwa;

wachuqa jucha lurir warmjamaw sarnaqapxtaxa.”

4Yaqha diosanakaruw yupaychapxtaxa,

janiw nayarux jumanakan Diosamat katuqapkistati,

janirakiw jucha luratanakamatsa kutikipstanipktati.

5Jumanakax jach'a jach'a tukur jaqinakäpxtawa,

ukat q'al t'unjatäpxäta;

¡Judá markankirinakas ukham t'unjatäpxarakiniwa!

6Ovejanakapampi, vacanakapampi kunaw

nayarux luqtäwi churañatak thaqhir jutapxäta,

ukampis janiw jikxatapkitätati.

¡Nayax jaytanukuwayapxämawa!

7Wachuqa jucha lurir warmjamaw sarnaqapxtaxa:

yaqha diosanakar yupaychasaw nayar sallqjapxistaxa,

jichhax wawanakamax janiw nayan markaxäkxaniti.

Ukatpï jumanakasa,

uraqinakamas q'ala tukjatänixa.

Israel markampina, Judá markampin mutuyäwipa

8¡Guibeá chiqan nuwasiñatak putut phust'apxam,

Ramá chiqansti trompet phust'apxarakim!

¡Bet-avén chiqansti p'arxtayapxam!

¡Benjamín ayllunkirinakarusti, amuyasipxpan sapxarakim!

9Mutuyäwi urupanxa israelitanakax tukjatäniwa:

Nayaw akxa Israel markankirinakarux yatiyta,

kunatix luraskani ukanakata.

10Tatitux siwa:

“Judá markankir jilïrinakapaxa,

khitinakatix uraqinakan qurpanakap mayjt'ayapki ukhamäpxiwa.

¡Jupanakxarusti phiñasiñaxampiw umjam warxatanï!

11Israelitanakax t'aqhisiyatawa,

k'ari diosanakar arkatapatsti,

kuna askinakatix jupanakar wakt'ki ukanakax

q'ala aparatarakiwa.

12Ukat nayax uka Israel markaru,

Judá markarus q'al tukjä,

kunjämatix kharusa, thuthasa q'al tukjki ukhama.

13“Kunapachatix Israel markaxa,

Judá markasa jan walt'añan jikxatasipkani ukkhaxa,

jupanakax Asiria apnaqir reyiruw

yanap mayirix sarapxani,

ukampis uka reyix janiw yanapt'kaniti.

14Kunjämatix mä leonax wal qhurutasixa,

ukhamaw nayax Israel markampiru, Judá markampirux qhuruchasis katjarakï;

naya pachpaw jisk'a jisk'a tukjä,

janirakiw khiti arxatt'iris utjkaniti.

15“Juchanakapat kutikipstañapkamasti, utjäwixaruw kuttä,

kunapachatix juchanakap uñt'asxapxani ukkhasti,

llakisiñanakampiw phuqhantasipxani,

ukhamat nayar thaqhapxitani”.