DANIEL 5 - Qullan Arunaka DC

Pirqan mä qillqanaka uñstatapa

1Babilonia marka apnaqir Belsasar reyix mä jach'a manq'äwi luräna, ukarusti jach'a jilïri jaqinakapat waranqaniruw jawsayäna, uka manq'äwinsti reyimpi uka jawsayata jaqinakapampix walpun vino umapxäna.

2-3Umatäxasinsti, Belsasar reyix mayirakïnwa kuna qurita, qullqita lurat qirunaktix Nabucodonosor awkipax Jerusalenat Tatitun utapat apsuwaykatayna ukanak aptanipxañapataki. Aptayanisinsti, uka qurit qullqit lurat qirunakat reyisa, warminakapasa, uñt'atanakapasa, taqi jawsayatanakapasa vino umapxäna.

4Taqiniw vino umapxäna ukatsti qurita, qullqita, bronceta, hierrota, lawata, qalat lurat diosanakaparuw yupaychapxarakïna.

5Ukapachaw mä jaqina amparapax reyin utapan janq'u pirqapxan uñstäna, ukat qillqañ qalltäna. Micha qhanampix kunjämtix qillqkäna ukax sumpun uñstäna. Ukhama uka ampara qillqaskir uñjasinsti,

6reyix q'illuw tukuwayäna, axsarañatsa walpun khathatirakïna.

7Ukatsti wararisaw Babilonian utjir taqi yatirinakaru, yatiñan jaqinakaru, warawaranak uñch'ukis yatir jaqinakar jawsäna, ukat jupanakar sarakïna:

—Khititix aka pirqan qillqatäki uk ullarkani, ukatsti kuntix ukax sañ munki uksa qhanañchkarakitani, ukax suma isinakamp isthapiyatäniwa, kunkaparusti mä quri wallqamp ajuntayatarakïniwa, markaxan apnaqäwipansti kimsïri jilïri apnaqirit utt'ayatarakïniwa —sasa.

8Ukampis yatiñani jaqinakasa, yatirinakasa janiw uka qillqat amuyt'irjamäpkänti, janirakiw reyirus ukxat qhanañchirjamäpkänti.

9Ukhamasti Belsasar reyix juk'ampiw axsarayasxäna, ajanupasti q'illupuniw tuküna. Marka apnaqir jach'a jilïr jaqinakapasti janiw kuns kamacht'irjamäpkänti.

10Reyin taykapasti, yuqapana, ukhamaraki jawsayatanakan arnaqasitanakap ist'asinxa, manq'äwi jach'a utaruw mantawayäna, ukat reyir sarakïna:

—Reyix wiñayatak jakpan. Jan juk'amp llakisimti, janirak axsarayasimsa,

11aka Babilonia markan mä ch'ikhi, yatiñan jaqiw utji. Juparux qullan Diosan ajayupaw irpaski. Kunapachatix juma reyin awkimax reyïkäna ukapachaw uka jaqix qhana amuyunïtapa ch'ikhïtapa, yatiñanïtap uñacht'ayäna, diosanakjam yatiñanïkaspas ukhama. Ukatpï Nabucodonosor reyix, juma reyin awkimax uka jaqir taqi yatirinakana, layqanakana, yatiñan jaqinakana, warawaranak uñch'ukis yatir jaqinakan jilïripat utt'ayänxa.

12Uka jaqix samkanaksa, jan amuyt'kañjamanaksa, imantatanak qhanañchañatakis ch'amaniwa. Jupax Daniel sutiniwa, Nabucodonosor reyiw Beltsasar sasa sutichäna. Jichhasti juma reyix Danielar jawsayanim, jupasti pirqan qillqatäki uka arunak qhanañcharakïtamwa —sasa.

13Ukatsti, Danielar reyin nayraqataparuw irpanipxäna, reyisti jupar jiskt'arakïnwa:

—¿Jumätati Danielaxa, khitirutix Nabucodonosor rey awkixax Judá uraqit katuntat apankäna ukaxa?

14Juman chuymaman Diosan ajayupa jakaskatapa nayar yatiyapxitu, ukat jumax wali ch'ikhi, suma amuyt'an jaqïtama.

15Ukhamasti, aka markan utjir taqi uka yatiñani jaqinakaw akankapxäna pirqan qillqatäki uk ullarañataki, ukat uk qhanañchañatakiraki, ukampis janiw kunätapsa amuyapkiti.

16Ukampis nayax ist'twa jumax taqi pächasiñanaka, jan amuyt'kañanak qhanañchirïtama. Jumatix uka arunak ullaräta, ukat kuntix ukax sañ munki uk qhanañcharakitätaxa, jumax suma isinakamp isthapiyatäyätawa, kunkamarusti mä quri wallqamp ajuntayataraki, nayan marka apnaqäwixansti kimsïri jilïrit utt'ayatarakïyätawa —sasa.

17Danielasti ukxarux sarakïnwa:

—Nayaw pirqan qillqatäki uk qhanañchäma. Ukampis jan kuns waxt'kistati, janirak markaman apnaqäwipan nayar jilïrit utt'aykistati.

18“Alaxpachankir Diosaw Nabucodonosor awkimarux churäna marka apnaqaña, jach'a kankaña, qamir kankaña, taqi jach'añchäwinaksa.

19Jupar munañan kankañ churatap laykuw, taqi akapachankir markanakaxa, kunayman parlani jaqinakasa, awkimarux axsarapxänwa, jupa nayraqatan khathatipxarakïnwa. Jupax khitirutix jiwayañ munkäna ukarusti jiwayakïnwa, khitirutix jakayañ munkän ukarus jakayakïnwa, mayninakarux jach'aruw aptäna, yaqhipanakarusti jisk'achjarakïnwa.

20Ukampisa, sinti munañani, jach'a jach'a tukxäna ukapachasti, Tatitux taqi ch'amapsa, reyi kankañapsa apaqxänwa.

21Jaqinak taypit yaqhachatäxänwa, mä pampa laq'uruw tuküna; monte asnonakamp chikaw jakäna, uywanakjamaw quranak manq'äna, sullaw jañchiparus ch'aranjäna; alaxpach Diosax taqi jaqinakxarus munañanïtapa, juparaki marka apnaqirinaksa khitirutix munki ukarus utt'ayatapa uk yatiñapkama.

22Jumasti Belsasar jach'a rey, uka reyin yuqapätawa, askirakiw yatisktaxa, kunatix awkimatak utjkäna uksa, ukampis janirakiw alt'at chuymamp sarnaqktati.

23Jan ukasti, alaxpachankir Tatitut larustawa, jupan utapankir qirunakampi aptayanisax, jawsayat jaqinakamamp chikaw uka qirunakat vino umtaxa; ukhamarusa, qurita, qullqita, bronceta, hierrota, lawata, qalat lurat diosanakaruw yupaychtaxa; uka diosanakasti janiw uñjapkiti, janiw ist'apkisa, janirakiw kuns yatipkiti. Janiw jumax Diosar jach'añchktati, juma reyin jakañamax jupan amparapankiwa, kuntix lurkta ukanakasa jupïpan lurasi.

24Ukatpï jupax uka ampar apayanïnxa uka arunak qillqañapataki.

25Uka arunakasti: MENÉ, MENÉ, TEKEL, PARSÍN, ukanakawa,

26uka arunakax akham sañ munaraki: MENÉ aruxa: Tatitux juma reyin marka apnaqañ urunakam jakt'iwa, tukuyapsa chimpt'arakiwa.

27TEKEL arusti: juma jach'a reyix balanzar waytataw uñjastaxa, tupusti janiw phuqhatäkiti.

28PARSÍN arusti: juman apnaqäwimax payar jaljtatawa, jichhasti medonakaru, persanakar katuyatarakïniwa” sañ muni —sasa.

29Ukspachaw Belsasar reyix arsurakïna, Danielar wila chupika isinakamp isthapiyapxañapataki, kunkaparus mä quri wallqamp ajt'ayapxañapataki, ukatsti taqi jaqinakaruw yatiyarakïna, marka apnaqäwi taypin kimsïri jilïrit ukspach Danielan utt'ayatäñapataki.

30-31Ukatsti uka arumpachaw Belsasar reyir jiwayxapxäna, jupasti caldeo jaqinakan reyipänwa, ukatsti Media uraqinkir Darío reyiw uka marka apnaqäwi katuntasxarakïna. Ukapachasti Darío reyix suxta tunk payan maranïnwa.